ಅಂಧರು, ಅಂಗವಿಕಲರು ಎಂದಾಕ್ಷಣ ಅವರಿಂದ ಏನೂ ಸಾಧ್ಯವಿಲ್ಲ, ಸರ್ಕಾರ ನೀಡುವ ಪಿಂಚಣಿಗಾಗಿ ಕಾಯುತ್ತಿರುತ್ತಾರೆ ಎಂಬ ಮನೋಭಾವ ತೊಡೆದು ಹಾಕಿ, ನಾವೂ ತೆರಿಗೆ ಪಾವತಿಸುವಂತಾಗಬೇಕು. ಅಂಗವಿಕಲರು ಎಂದರೆ ಜನರು ತಾತ್ಸಾರ ಮನೋಭಾವನೆಯಲ್ಲಿ ನೋಡುವುದು ಈಗ ಕಡಿಮೆಯಾಗಿರುವುದು ಉತ್ತಮ ಬೆಳವಣಿಗೆ. ಅದರೂ, ಕೆಲವರು ಈಗಲೂ ‘ನಾನು ಅಂಗವಿಕಲ, ನನ್ನಿಂದ ಏನೂ ಸಾಧ್ಯವಿಲ್ಲ’ ಎಂಬ ಮನೋಭಾವನೆಯಲ್ಲಿ ಬದುಕುತ್ತಿದ್ದಾರೆ. ಇದು ತಪು್ಪ. ಅಂಗವಿಕಲರಿಗೆ ಸರ್ಕಾರ ಪಿಂಚಣಿ ನೀಡುತ್ತದೆ. ಅದು ನಿಜ. ಆದರೆ, ಇವರು ತಮ್ಮಲ್ಲಿರುವ ಶಕ್ತಿಯಿಂದ ಗುರುತಿಸಿಕೊಂಡು ಜೀವನದಲ್ಲಿ ಮುಂದೆ ಬಂದು ಸರ್ಕಾರಕ್ಕೆ ತೆರಿಗೆ ಪಾವತಿಸುವ ಹಂತಕ್ಕೆ ಬೆಳೆಯಬೇಕು. ಛಲ ಮತ್ತು ದೃಢ ಗುರಿಯಿದ್ದಲ್ಲಿ ಇದು ಸಾಧ್ಯ. ಅಂಧರು ಸಹ ಸಮಾಜಕ್ಕೆ ವಿಶಿಷ್ಟ ಕೊಡುಗೆ ನೀಡಬೇಕು ಎಂಬ ಉದ್ದೇಶದಿಂದ ಸಮರ್ಥನಂ ಅಂಗವಿಕಲರ ಸಂಸ್ಥೆಯನ್ನು ಸ್ಥಾಪಿಸಿದ್ದೇನೆ. ಈ ನಿಟ್ಟಿನಲ್ಲಿ ಕೈಲಾದ ನೆರವು ನೀಡುತ್ತಿದ್ದೇನೆ. ಸಂಸ್ಥೆಯಿಂದ ಕನ್ನಡ ಮಾಧ್ಯಮದ ವಿದ್ಯಾರ್ಥಿಗಳಿಗೂ ಶಿಕ್ಷಣ ನೀಡುತ್ತಿದ್ದೇವೆ. ವಿದ್ಯಾರ್ಥಿಗಳು ಬಯಸಿದ ಮಾಧ್ಯಮದಲ್ಲಿ ಪುಸ್ತಕಗಳನ್ನು, ಧ್ವನಿ ಮುದ್ರಣಗಳನ್ನು ನೀಡುತ್ತಿದ್ದೇವೆ. ಧಾರವಾಡದಲ್ಲಿ ಸಮರ್ಥನಂ ಕೇಂದ್ರ ಆರಂಭಿಸುತ್ತಿದ್ದು, ಇಲ್ಲಿ ಶಿಕ್ಷಣ, ಕೌಶಲ ಶಿಕ್ಷಣ, ತಂತ್ರಜ್ಞಾನದ ಪರಿಚಯ ಮಾಡಿಕೊಡಲಾಗುತ್ತದೆ. ವಸತಿ ಸೌಲಭ್ಯ ಕಲ್ಪಿಸಲಾಗುತ್ತದೆ.
