ಒಂದೆಡೆ ಆಡಳಿತ ಸುಧಾರಣೆಯ ಆಶಯಗಳು, ಆ ಕುರಿತಾದ ಚರ್ಚೆಗಳು ನಡೆಯುತ್ತಲೇ ಇರುತ್ತವೆ. ಸರ್ಕಾರವೂ ಮಹತ್ವದ ಸುಧಾರಣೆಗಳನ್ನು ತರುತ್ತೇವೆ ಎಂಬ ಆಶ್ವಾಸನೆ ನೀಡುತ್ತದೆ. ಆದರೆ, ಸರ್ಕಾರದ ಮೂಗಿನಡಿಯಲ್ಲೇ, ಪ್ರಮುಖ ಇಲಾಖೆಯಲ್ಲೇ ಅಕ್ರಮ/ಅವ್ಯವಹಾರ ನಡೆಯುವುದು ತೀರಾ ದುರದೃಷ್ಟಕರ. ಪಾರದರ್ಶಕ ಆಡಳಿತಕ್ಕಾಗಿ ಹೊಸ ಮತ್ತು ಬಿಗಿ ನಿಯಮಗಳು ಬರುತ್ತಲೇ ಇವೆ. ಇದರ ಅನುಷ್ಠಾನ ಪರಿಣಾಮಕಾರಿಯಾಗಿ ನಡೆಯುವ ಮುನ್ನವೇ ಅಪಸವ್ಯಗಳು ಬಹಿರಂಗಗೊಳ್ಳುತ್ತಿವೆ. ಆರ್ಥಿಕ ಮತ್ತು ಸಾಂಖ್ಯಿಕ ನಿರ್ದೇಶನಾಲಯದಲ್ಲಿ ಜ್ಯೇಷ್ಠತೆಯ ಅರ್ಹತೆ ಇಲ್ಲದಿದ್ದರೂ ಬಡ್ತಿ ಪಡೆದವರಿಗೀಗ ಹಿಂಬಡ್ತಿಯ ಶಿಕ್ಷೆಯಾಗಿದ್ದರೆ, ನಕಲಿ ಪದವಿ ಪ್ರಮಾಣಪತ್ರ ಸಲ್ಲಿಸಿ ಪ್ರಮೋಷನ್ ಪಡೆದವರಿಗೆ ಹಿಂಬಡ್ತಿ ಜತೆಗೆ ಕ್ರಿಮಿನಲ್ ಕೇಸ್ ದಾಖಲಾಗಿದ್ದು, ಬಂಧನದ ಭೀತಿಯೂ ಎದುರಾಗಿದೆ. ಈ ಪ್ರಕರಣ ಗಂಭೀರವಾದ ಕಳವಳ ಮತ್ತು ಜಿಜ್ಞಾಸೆಯನ್ನು ಹುಟ್ಟುಹಾಕಿದೆ. ಇತರ ಇಲಾಖೆಗಳಲ್ಲಿ ಈ ಬಗೆಯ ಪ್ರಕರಣಗಳು, ಅಕ್ರಮಗಳು ನಡೆದಿವೆಯೇ ಎಂಬ ಅನುಮಾನ ಬಲಗೊಂಡಿದೆ. ನಕಲಿ ಪ್ರಮಾಣಪತ್ರ ನೀಡಿ ಬಡ್ತಿ ಪಡೆದಿರುವುದು ನೈತಿಕತೆಗೆ ಕಪು್ಪಚುಕ್ಕೆಯೇ ಸರಿ.
