Teacher ಬೈದಿದ್ದಕ್ಕೆ ಕೋಪಗೊಂಡು ಕುರ್ಚಿಯ ಕೆಳಗೆ ಬಾಂಬ್​ ತಯಾರಿಸಿ ಇಟ್ಟ ವಿದ್ಯಾರ್ಥಿಗಳು; ಮುಂದೆ ನಡೆದಿದ್ದು ಮಾತ್ರ...

ಚಂಡೀಗಢ: ಸ್ಮಾರ್ಟ್​ಫೋನ್​ ಯುಗದಲ್ಲಿ ಅನುಕೂಲಕ್ಕಿಂತ ಅನಾನುಕುಲತೆಗಳೇ ಹೆಚ್ಚಾಗುತ್ತಿದ್ದು, ಇದರಿಂದ ಜನರು ಬಾಧಿತರಾಗುತ್ತಿದ್ದಾರೆ. ತಂತ್ರಜ್ಞಾನದಿಂದ ಎಷ್ಟು ಅನುಕೂಲಗಳಿದೆಯೋ ಅಷ್ಟು ಅನಾನುಕೂಲತೆ ಅಷ್ಟೇ ಇದೆ ಎಂಬುದಕ್ಕೆ ಈ ಘಟನೆ ಸಾಕ್ಷಿಯಾಗಿದೆ. ಇದೀಗ ವಿದ್ಯಾರ್ಥಿಗಳ ಗುಂಪೊಂದು ಶಿಕ್ಷಕರ (Teacher) ಕುರ್ಚಿಯಡಿ ಬಾಂಬ್​ (Bomb) ಇಟ್ಟು ಸಿಡಿಸಿರುವ ಘಟನೆ ನಡೆದಿದ್ದು, ಇದು ಚರ್ಚಾಸ್ಪದ ವಿಚಾರವಾಗಿದೆ.

ಹರಿಯಾಣದ ಭಿವಾನಿ ಜಿಲ್ಲೆಯಲ್ಲಿ ಈ ಘಟನೆ ನಡೆದಿದ್ದು, ಕೃತ್ಯ ಎಸಗಿದ ವಿದ್ಯಾರ್ಥಿಗಳನ್ನು ಶಾಲೆಯಿಂದ ಅಮಾನತು ಮಾಡಲಾಗಿದೆ. ಘಟನೆಯಲ್ಲಿ ಯಾವುದೇ ಅಪಾಯವಾಗಿಲ್ಲ ಎಂದು ತಿಳಿದು ಬಂದಿದ್ದು, ಶಿಕ್ಷಣ ಇಲಾಖೆ ಹಾಗೂ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.

ಘಟನೆಯ ಕುರಿತು ಪ್ರತಿಕ್ರಿಯಿಸಿರುವ ಕ್ಷೇತ್ರ ಶಿಕ್ಷಣಾಧಿಕಾರಿ ನರೇಶ್​ ಮೆಹ್ತಾ, ವಿದ್ಯಾರ್ಥಿಗಳ ಗುಂಪೊಂದಕ್ಕೆ ವಿಜ್ಞಾನ ಶಿಕ್ಷಕಿ (Teacher) ಬೈದಿದ್ದರು. ಇದರಿಂದ ಸಿಟ್ಟಿಗೆದ್ದ ವಿದ್ಯಾರ್ಥಿಗಳ ಗುಂಪು ಯೂಟ್ಯೂಬ್​ ನೋಡಿ ಬಾಂಬ್​ (Bomb) ತಯಾರಿಸುವುದನ್ನು ಕಲಿತು ಅದನ್ನು ತಂದು ಶಿಕ್ಷಕಿ ಕೂರುವ ಕುರ್ಚಿಯ ಕೆಳಗೆ ಅಂಟಿಸಿ ರಿಮೋಟ್ ಮೂಲಕ ಅದನ್ನು ಸಿಡಿಸಿದ್ದಾರೆ. ಸ್ಫೋಟದ ರಭಸಕ್ಕೆ ಕುರ್ಚಿಯಲ್ಲಿ ರಂದ್ರ ಸೃಷ್ಟಿಯಾಗಿದ್ದು, ಶಿಕ್ಷಕಿಗೆ ಯಾವುದೇ ಗಾಯಗಳಾಗಿಲ್ಲ.

ಓರ್ವ ಕುರ್ಚಿಯಡಿ ಬಾಂಬ್ ಇಟ್ಟಿದ್ದರೆ ಇನ್ನೊಬ್ಬ ರಿಮೋಟ್​ನಿಂದ ಬಟನ್ ಒತ್ತಿ ಸಿಡಿಸಿದ್ದಾನೆ. ವಿಚಾರ ತಿಳಿದು ಸ್ಥಳಕ್ಕೆ ದೌಡಾಯಿಸಿದ ಶಿಕ್ಷಣ ಇಲಾಖೆ ಹಾಗೂ ಪೊಲೀಸ್​ ಅಧಿಕಾರಿಗಳು ಪರಿಶೀಲನೆ ನಡೆಸಿದ್ದಾರೆ. ಘಟನೆಗೆ ಕಾರಣವಾದ 13 ವಿದ್ಯಾರ್ಥಿಗಳನ್ನು ಶಾಲೆಯಿಂದ ಅಮಾನತು ಮಾಡಲಾಗಿದ್ದು, ಕ್ರಮ ಕೈಗೊಳ್ಳುವ ಬಗ್ಗೆ ಪರಿಶೀಲಿಸಲಾಗುತ್ತಿದೆ ಎಂದು ಕ್ಷೇತ್ರ ಶಿಕ್ಷಣಾಧಿಕಾರಿ ನರೇಶ್​ ಮೆಹ್ತಾ ತಿಳಿಸಿದ್ಧಾರೆ.

https://www.vijayavani.net/this-contestant-evicted-form-bigg-boss-two-more-entered-through-wildcard

https://www.vijayavani.net/mohammed-shami-to-join-team-india-for-border-gavaskar-trophy-set-to-leave-for-australia-with-rohit-sharma-report