ಚೀನಾ ಲೋನ್​ ಆ್ಯಪ್​ ಹಗರಣ; 7 ಕಂಪನಿಗಳ ಆಸ್ತಿ ಜಪ್ತಿ, 76.67 ಕೋಟಿ ರೂ ವಶಕ್ಕೆ

ಬೆಂಗಳೂರು; ಸುಲಭದಲ್ಲಿ ಸಾಲ ನೀಡುವುದಾಗಿ ಹೇಳಿ ಜನರಿಗೆ ಕಿರುಕುಳ ನೀಡುತ್ತಿದ್ದ ಚೀನಾ ಲೋನ್​ ಆ್ಯಪ್​ ಕಂಪನಿ ಮತ್ತು ಸ್ಥಳಿಯ ಸಹಭಾಗಿ ಕಂಪನಿಗಳಿಗೆ ಸೇರಿದ 76.67 ಕೋಟಿ ರೂ. ಮೌಲ್ಯ ಆಸ್ತಿಯನ್ನು ಜಾರಿ ನಿರ್ದೇಶನಾಲಯ (ಇಡಿ) ಜಪ್ತಿ ಮಾಡಿದೆ.

ಕರೊನಾ ಲಾಕ್​ಡೌನ್​ ಸಮಯದಲ್ಲಿ ಕೆಲಸ ಕಳೆದುಕೊಂಡವರನ್ನೇ ಟಾರ್ಗೆಟ್​ ಮಾಡಿ ಆ್ಯಪ್​ನಲ್ಲಿ ಸುಲಭವಾಗಿ ಸಾಲ ಕೊಡುವ ಕಂಪನಿಗಳನ್ನು ಚೀನಾ ಉದ್ಯಮಿಗಳು ತೆರೆದಿದ್ದರು. ಕೇವಲ ಮೊಬೈಲ್​ನಲ್ಲಿ ಆ್ಯಪ್​ ಡೌನ್​ಲೋಡ್​ ಮಾಡಿಸಿ ಒಟಿಪಿ ನಂಬರ್​ ಪಡೆದು 5,000 ರಿಂದ 50 ಸಾವಿರ ರೂ. ವರೆಗಿನ ಸಾಲ ಕೊಡುತ್ತಿದ್ದರು.

ಮೊಬೈಲ್​ನಲ್ಲಿ ಆ್ಯಪ್​ ಡೌನ್​ಲೋಡ್​ ಮಾಡಿಸುವ ಡೇಟಾ ಕಳವು ಮಾಡುತ್ತಿದ್ದರು. ಆನಂತರ ಸಾಲಗಾರನಿಂದ ಹೆಚ್ಚಿನ ಅಸಲು ಮತ್ತು ಹೆಚ್ಚಿನ ಬಡ್ಡಿ ವಸೂಲಿ ಮಾಡುತ್ತಿದ್ದರು. ಕೊಡದೆ ಇದ್ದರೇ ಈ ಮೊದಲೇ ಸಾಲಗಾರ ಮೊಬೈಲ್​ನಲ್ಲಿ ಕಳವು ಮಾಡಿದ್ದ ಸ್ನೇಹಿತರ ಮತ್ತು ಆಪ್ತರಿಗೆ ವಾಟ್ಸ್​ಆ್ಯಪ್​ ಮಾಡಿ ಮರ್ಯಾದೆ ತೆಗೆಯುವ ಮೂಲಕ ಕಿರುಕುಳ ನೀಡುತ್ತಿದ್ದರು.

ರಿಸರ್ವ್​ ಬ್ಯಾಂಕ್​ ಆ್​ ಇಂಡಿಯಾದ ಮಾರ್ಗಸೂಚಿ ಪಾಲನೆ ಮಾಡುತ್ತಿರಲಿಲ್ಲ. ಸಾಲಗಾರರು ಭಯಕ್ಕೆ ಹಲವರು ಹೆಚ್ಚಿನ ಬಡ್ಡಿಯೂ ಪಾವತಿ ಮಾಡಿದ್ದರು. ತಮಿಳುನಾಡಿನಲ್ಲಿ ಯುವಕನೊಬ್ಬ ಆತ್ಮಹತ್ಯೆ ಸಹ ಮಾಡಿಕೊಂಡಿದ್ದ.

ಇದನ್ನೂ ಓದಿ; ಜಿ7 ಶೃಂಗಸಭೆ ಪ್ರವಾಸವನ್ನು ರದ್ದುಗೊಳಿಸಿದ ಪ್ರಧಾನಿ ನರೇಂದ್ರ ಮೋದಿ

ದಕ್ಷಿಣ ಭಾರತದಲ್ಲಿ ಪ್ರಕರಣ ಗಂಭೀರತೆ ಪಡೆದು ರಾಜ್ಯದಲ್ಲಿಯೂ ಹಲವು ಪ್ರಕರಣಗಳು ದಾಖಲಾಗಿದ್ದವು. ಹೆಚ್ಚಿನ ತನಿಖೆ ಕೈಗೊಂಡ ಸಿಐಡಿ ಪೊಲೀಸರು, ನೊಂದ ಸಾಲಗಾರರಿಂದ ಹಲವು ದೂರುಗಳನ್ನು ಸ್ವೀಕರಿಸಿದ್ದರು. ಚೀನಾದ 7 ಕಂಪನಿಗಳನ್ನು ಪತ್ತೆ ಮಾಡಿ ಸ್ಥಳಿಯ ಸಹಭಾಗಿ ಕಂಪನಿಗಳ ವಿರುದ್ಧವೂ ಕ್ರಮ ತೆಗೆದುಕೊಂಡಿದ್ದರು. ಎಲ್ಲ ಕಂಪನಿಗಳ ಕಚೇರಿ ಮತ್ತು ಬ್ಯಾಂಕ್​ ಖಾತೆಗಳನ್ನು ಜಪ್ತಿ ಮಾಡಿ ಇಡಿ ಇಲಾಖೆಗೆ ವರದಿ ಒಪ್ಪಿಸಿದ್ದರು. ಈ ಮೇರೆಗೆ ಆರೋಪಿತ ಚೀನಾದ 7 ಕಂಪನಿ ಮತ್ತು ಸ್ಥಳಿಯ ಸಹಭಾಗಿ ಕಂಪನಿಗಳ ಆಸ್ತಿಯನ್ನು ಜಪ್ತಿ ಮಾಡಲಾಗಿದೆ ಎಂದು ಇಡಿ ಅಧಿಕಾರಿಗಳು ತಿಳಿಸಿದ್ದಾರೆ.