ಜಾಗತಿಕ ನಾಯಕನಾಗಬೇಕು ಎಂಬ ಹುಚ್ಚು ಸ್ಪರ್ಧೆಯಲ್ಲಿ ಚೀನಾ ಮಾಡುತ್ತಿರುವ ಅವಾಂತರಗಳು, ಕುತಂತ್ರಗಳು ಒಂದೆರಡಲ್ಲ. ಭಾರತದ ವಿರುದ್ಧವಂತೂ ಅದು ವ್ಯವಸ್ಥಿತ ವ್ಯೂಹ ರಚಿಸುತ್ತಲೇ ಇದೆ. ಭಾರತದ ನೆರೆರಾಷ್ಟ್ರಗಳಾದ ನೇಪಾಳ, ಬಾಂಗ್ಲಾದೇಶ, ಶ್ರೀಲಂಕಾ ಹೀಗೆ ಹಲವೆಡೆ ಭಾರತವಿರೋಧಿ ಭಾವನೆಗಳನ್ನು ಬಿತ್ತುತ್ತಿದೆ. ಅಲ್ಲದೆ, ಪಾಕಿಸ್ತಾನವನ್ನಂತೂ ಭಾರತವಿರೋಧಿ ಚಟುವಟಿಕೆಗಳಿಗಾಗಿಯೇ ದಾಳವಾಗಿಸಿಕೊಳ್ಳುತ್ತಿದೆ. ಹಲವು ರಾಷ್ಟ್ರಗಳೊಂದಿಗೆ ಗಡಿ ವಿವಾದ ಹೊಂದಿರುವ ಚೀನಾ ಇತ್ತೀಚೆಗಷ್ಟೇ ಪೂರ್ವ ಲಡಾಖ್ನಲ್ಲಿ ಘರ್ಷಣೆ ಸೃಷ್ಟಿಸಿ ಭಾರತದೊಂದಿಗೆ ಗಡಿತಂಟೆ ತೆಗೆದು, ಪರಿಸ್ಥಿತಿಯನ್ನು ಉದ್ವಿಗ್ನವಾಗಿಸಲು ಯತ್ನಿಸಿತ್ತು. ಆದರೆ, ಡೋಕ್ಲಾಂ ವಿವಾದವನ್ನು ರಾಜತಾಂತ್ರಿಕ ಜಾಣ್ಮೆಯಿಂದ ಪರಿಹರಿಸಿದ್ದ ಭಾರತ ಈ ಬಾರಿಯೂ ಗಟ್ಟಿ ನಿಲುವು ತಳೆಯಿತು ಮತ್ತು ಗಲ್ವಾನ್ ಕಣಿವೆಯಿಂದ ಚೀನೀ ಸೇನೆ ಹಿಂದೆ ಸರಿಯಬೇಕು ಎಂದು ಪಟ್ಟು ಹಿಡಿಯಿತು. ಕೊನೆಗೂ, ಉಭಯ ರಾಷ್ಟ್ರಗಳ ಸೇನಾಧಿಕಾರಿಗಳ ನಡುವಿನ ಹಲವು ಸುತ್ತಿನ ಮಾತುಕತೆ ಮತ್ತು ಸುರಕ್ಷಾ ಸಲಹೆಗಾರ ಅಜಿತ್ ದೊವಲ್ ಚೀನಾದ ವಿದೇಶಾಂಗ ಕಾರ್ಯದರ್ಶಿ ಜತೆ ನಡೆಸಿದ ನಿರ್ಣಾಯಕ ಮಾತುಕತೆಯ ಬಳಿಕ ಚೀನಾ ಗಲ್ವಾನ್ ಕಣಿವೆಯ ವಿವಾದಿತ ಪ್ರದೇಶದಿಂದ ತನ್ನ ಸೇನೆಯನ್ನು ಹಿಂಪಡೆಯಲು ಒಪ್ಪಿಕೊಂಡಿತು.
