ಸಾಮಾಜಿಕ ಜಾಲತಾಣ ಪ್ರವೇಶಿಸುವ ಹದಿಹರೆಯದ ಮಕ್ಕಳಲ್ಲಿ ಶೇ. 40ಕ್ಕೂ ಹೆಚ್ಚು ಮಂದಿ ಅಶ್ಲೀಲ ವಿಡಿಯೋ ವೀಕ್ಷಿಸುತ್ತಾರೆ. ಶೇ. 50ಕ್ಕೂ ಹೆಚ್ಚಿನವರು ಶಾಲೆ ಮತ್ತು ಕಾಲೇಜುಗಳಲ್ಲಿ ಸಹಪಾಠಿಗಳ ಜತೆ ಅಶ್ಲೀಲತೆ ಬಗ್ಗೆ ಚರ್ಚೆ ಮಾಡುತ್ತಾರೆ. ಭಾರತದ ನಗರವಾಸಿಗಳಲ್ಲಿ 9 ರಿಂದ 17 ವರ್ಷದ ಮಕ್ಕಳು ವಿಡಿಯೋ ಹಾಗೂ ಗೇಮಿಂಗ್ ಸೇರಿ ಸಾಮಾಜಿಕ ಜಾಲತಾಣಗಳ ಚಟಕ್ಕೆ ಒಗ್ಗಿಕೊಂಡಿದ್ದಾರೆ ಎಂಬುದು ಖಾಸಗಿ ಸಂಸ್ಥೆಯೊಂದು ನಡೆಸಿರುವ ಸಮೀಕ್ಷೆಯಲ್ಲಿ ಬಹಿರಂಗವಾಗಿದೆ. 9 ರಿಂದ 13 ವರ್ಷದ ಶೇ. 55 ಮಕ್ಕಳು ಹಾಗೂ 13 ರಿಂದ 17 ವರ್ಷದ ಶೇ. 71 ಮಕ್ಕಳು ಸ್ಮಾರ್ಟ್ಫೋನ್ ವ್ಯಸನಿಗಳಾಗಿದ್ದಾರೆ. ಆನ್ಲೈನ್ ತರಗತಿಗಾಗಿ ಮಕ್ಕಳು ಗ್ಯಾಜೆಟ್ (ಸ್ಮಾರ್ಟ್ಫೋನ್, ಟ್ಯಾಬ್, ಕಂಪ್ಯೂಟರ್, ಲ್ಯಾಪ್ಟಾಪ್ ಇತ್ಯಾದಿ)ಗಳನ್ನು ಬಳಸಬೇಕಾಯಿತು. ಆದರೆ, ನಂತರದಲ್ಲಿ ಅದರ ಅತಿಯಾದ ಬಳಕೆ ಈಗ ಮಕ್ಕಳನ್ನು ವ್ಯಸನಕ್ಕೆ ದೂಡಿದೆ. ಮಕ್ಕಳ ಭವಿಷ್ಯದ ಬಗ್ಗೆ ಆತಂಕ ವ್ಯಕ್ತಪಡಿಸಿರುವ ಪಾಲಕರು, ಸ್ಮಾರ್ಟ್ಫೋನ್ ಬಳಕೆ ಸೇರಿ ಸಾಮಾಜಿಕ ಜಾಲತಾಣಗಳಲ್ಲಿ ಖಾತೆಗಳನ್ನು ತೆರೆಯಲು ವಯೋಮಿತಿ ನಿಗದಿಪಡಿಸಬೇಕು ಎಂದು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
