ಶಾಸಕ ಹಾಗೂ ಅಡಕೆ ಕಾರ್ಯಪಡೆ ಅಧ್ಯಕ್ಷ ಆರಗ ಜ್ಞಾನೇಂದ್ರ ನೇತೃತ್ವದ ನಿಯೋಗ ಬುಧವಾರ ಸಿಎಂ ಭೇಟಿಯಾಗಿ ಮನವಿ ಸಲ್ಲಿಸಿತು. ‘ಗುಟ್ಕಾ ನಿಷೇಧ ಹಾಗೂ ಅಡಕೆ ಬೆಳೆಗಾರರ ಸಂಕಷ್ಟ ಕುರಿತು ಕೇಳಿಬರುತ್ತಿರುವ ವದಂತಿಗಳ ಬಗ್ಗೆ ಚಿಂತೆ, ಆತಂಕ ಅನಗತ್ಯ. ನಾನು ಕೂಡ ಅಡಕೆ ಬೆಳೆಯುವ ಜಿಲ್ಲೆಯಿಂದ ಬಂದವ. ಬೆಳೆಗಾರರ ಹಿತಚಿಂತಕನಾಗಿದ್ದು, ಯಾವುದೇ ಸಮಸ್ಯೆಯಾಗದಂತೆ ಸರ್ಕಾರ ನೋಡಿಕೊಳ್ಳಲಿದೆ’ ಎಂದು ಸಿಎಂ ಭರವಸೆ ನೀಡಿದರು. ಎಂ.ಎಸ್. ರಾಮಯ್ಯ ವಿ.ವಿ. ತಜ್ಞರು ಆರಂಭಿಸಿರುವ ಅಡಕೆ ಬೆಳೆ ಅಧ್ಯಯನ ಹಾಗೂ ಸಂಶೋಧನೆ, ಕಾನೂನು ಹೋರಾಟ, ಇತ್ಯಾದಿ ಚಟುವಟಿಕೆಗಳಿಗೆ 2 ಕೋಟಿ ರೂ. ಅನುದಾನಕ್ಕೆ ಆರ್ಥಿಕ ಇಲಾಖೆ ಅಧಿಕಾರಿಗಳಿಗೆ ಸಿಎಂ ಸೂಚನೆ ನೀಡಿದರು.
