ಬೇಕಾಬಿಟ್ಟಿ ಮುಂಬಡ್ತಿ!: ಚೀಫ್ ಇಂಜಿನಿಯರ್ ಹುದ್ದೆ ನಿಯಮಮೀರಿ ಸೃಷ್ಟಿ; 120ರಲ್ಲಿ ಸ್ಮಾರ್ಟ್ ಸಿಟಿ ಯೋಜನೆಗೇ 40 ಹುದ್ದೆ

| ಕೀರ್ತಿನಾರಾಯಣ ಸಿ. ಬೆಂಗಳೂರು

ಸರ್ಕಾರದ ಇಲಾಖೆಗಳು ಹಾಗೂ ಯೋಜನೆಗಳಲ್ಲಿ ಮುಖ್ಯ ಇಂಜಿನಿಯರ್ ಮತ್ತು ಪ್ರಧಾನ ಇಂಜಿನಿಯರ್ ಹುದ್ದೆಗಳನ್ನು ಬೇಕಾಬಿಟ್ಟಿಯಾಗಿ ಸೃಷ್ಟಿಸಿ ಕಾನೂನುಬಾಹಿರವಾಗಿ ‘ಮುಂಬಡ್ತಿ’ ಕೊಟ್ಟಿರುವ ವಿಚಾರ ಬೆಳಕಿಗೆ ಬಂದಿದೆ. ನಿಯಮ ಇಲ್ಲದೆಯೇ ಹುಟ್ಟಿಕೊಂಡ ಈ ಪ್ರಮುಖ ಹುದ್ದೆಗಳಿಗೇರಲು ರಾಜಕೀಯ ಕೃಪಾಕಟಾಕ್ಷದ ಜತೆಗೆ ಕೋಟಿ ಕೋಟಿ ಲಂಚದ ರೇಟ್ ಕೂಡ ನಿಗದಿಯಾಗಿದೆ. ಪ್ರಸ್ತುತ ವಿವಿಧ ಇಲಾಖೆಗಳು ಹಾಗೂ ಯೋಜನೆಗಳಲ್ಲಿ 150ಕ್ಕೂ ಅಧಿಕ ಮುಖ್ಯ ಇಂಜಿನಿಯರ್ ಹಾಗೂ ಪ್ರಧಾನ ಇಂಜಿನಿಯರ್​ಗಳು ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಇವರೆಲ್ಲರೂ ಅಧೀಕ್ಷಕ ಇಂಜಿನಿಯರ್ ವೃಂದದ ಹುದ್ದೆಯಿಂದ ಚೀಫ್ ಇಂಜಿನಿಯರ್, ಇಂಜಿನಿಯರ್ ಇನ್ ಚೀಫ್ ಹುದ್ದೆಗಳಿಗೆ ಮುಂಬಡ್ತಿ ಹೊಂದಿದ್ದಾರೆ. ಆದರೆ, ಕಾನೂನು ಬಾಹಿರವಾಗಿ ಇಂಥ ಮುಂಬಡ್ತಿ ಕೊಡಲಾಗಿದೆ. ಇಲಾಖೆಯ ಯಾವುದೇ ಹುದ್ದೆಗೆ ನೇಮಕ ಹಾಗೂ ಮುಂಬಡ್ತಿ ನೀಡಲು ವೃಂದ ಮತ್ತು ನೇಮಕಾತಿ ನಿಯಮ ರೂಪಿಸಿರಬೇಕು. ಆ ಇಲಾಖೆಗೆ ಮಂಜೂರಾದ ಶಾಶ್ವತ, ತಾತ್ಕಾಲಿಕ ಹುದ್ದೆಗಳ ಸಂಖ್ಯೆ, ಅದಕ್ಕೆ ಬೇಕಿರುವ ಅರ್ಹತೆಗಳನ್ನು ವೃಂದ ಮತ್ತು ನೇಮಕಾತಿ ನಿಯಮಗಳಲ್ಲಿ ಕಡ್ಡಾಯವಾಗಿ ನಮೂದಿಸಿರಬೇಕು.

ಆದರೆ, ಈಗ ಸೃಷ್ಟಿಯಾಗಿರುವ ಮುಖ್ಯ ಇಂಜಿನಿಯರ್ ಹಾಗೂ ಪ್ರಧಾನ ಇಂಜಿನಿಯರ್​ಗಳ ಹುದ್ದೆಗಳಿಗೆ ವೃಂದ ಮತ್ತು ನೇಮಕಾತಿ ನಿಯಮಗಳೇ ಇಲ್ಲದಿರುವ ಸಂಗತಿ ಬಹಿರಂಗವಾಗಿದೆ. ನಿಯಮ ಇಲ್ಲದೆ ಮುಂಬಡ್ತಿ ನೀಡಿರುವುದಕ್ಕೆ ಸಂಬಂಧಪಟ್ಟ ದಾಖಲೆ ಪತ್ರಗಳು ‘ವಿಜಯವಾಣಿ’ಗೆ ಲಭ್ಯವಾಗಿವೆ.

ಶೇ.1 ಕಮೀಷನ್!: ಮುಖ್ಯ ಇಂಜಿನಿಯರ್ ಅಥವಾ ಪ್ರಧಾನ ಇಂಜಿನಿಯರ್ ಹುದ್ದೆಗೇರಿದವರ ಅಧಿಕಾರ ವ್ಯಾಪ್ತಿ ವಿಸ್ತಾರಗೊಳ್ಳುತ್ತದೆ. ಸಾವಿರಾರು ಕೋಟಿ ರೂ.ಗಳ ಯೋಜನೆಯ ಮುಖ್ಯಸ್ಥರಾದರೆ ಶೇ.1ರಿಂದ 2 ಕಮಿಷನ್ ಸಿಗುತ್ತದೆ. ಆದ್ದರಿಂದಲೇ ಈ ಹುದ್ದೆ ಗಿಟ್ಟಿಸಿಕೊಳ್ಳಲು ಭಾರೀ ಪೈಪೋಟಿ ಇದೆ. ಇಲಾಖೆಯ ಪ್ರಮುಖ ನಿರ್ಧಾರಗಳು ಸೇರಿ ಅನುದಾನ ನಿರ್ವಹಣೆ ಹಾಗೂ ಅನುಮೋದನೆ ಅಧಿಕಾರ ಇರುತ್ತದೆ. 1 ರಿಂದ 2 ಕೋಟಿ ರೂ.ವರೆಗೆ ತಲಾ ಹುದ್ದೆಗೆ ಲಂಚ ನಿಗದಿ ಪಡಿಸಲಾಗಿದೆ ಎಂದು ಖುದ್ದು ಅಧಿಕಾರಿಗಳೇ ಮಾಹಿತಿ ನೀಡುತ್ತಾರೆ.

ಸ್ಮಾರ್ಟ್ ಸಿಟಿಗೇ 40 ಹುದ್ದೆ?: ಬರೀ ಸ್ಮಾರ್ಟ್​ಸಿಟಿ ಯೋಜನೆ ಅನುಷ್ಠಾನಕ್ಕಾಗಿಯೇ 40 ಅಧೀಕ್ಷಕ ಇಂಜಿನಿಯರ್​ಗಳಿಗೆ ಮುಖ್ಯ ಇಂಜಿನಿಯರ್ ಹುದ್ದೆಗೆ ಮುಂಬಡ್ತಿ ಕೊಡಲಾಗಿದೆ. ಕೇಂದ್ರ ಸರ್ಕಾರದಿಂದಲೇ ಅನುಮತಿ ದೊರೆತಿರುವುದರಿಂದ ಬಡ್ತಿ ಕೊಡಲಾಗಿದೆ ಎಂದು ಅಧಿಕಾರಿಗಳು ಹೇಳುತ್ತಿದ್ದಾರೆ. ಆದರೆ, ಇಷ್ಟೊಂದು ಮುಖ್ಯ ಇಂಜಿನಿಯರ್​ಗಳ ಅಗತ್ಯವಿದೆಯೇ ಎಂಬ ಪ್ರಶ್ನೆ ಮೂಡುತ್ತದೆ. ಯೋಜನೆ ಪೂರ್ಣಗೊಂಡ ನಂತರ ಹೊಸದಾಗಿ ಸೃಷ್ಟಿಸಿರುವ ಹುದ್ದೆಗಳನ್ನು ರದ್ದುಪಡಿಸಬೇಕಿದೆ.

ಅಧಿಕಾರಿಗಳು ಹೇಳೋದೇನು?: ಜಲಸಂಪನ್ಮೂಲ ಇಲಾಖೆ ಮತ್ತು ಲೋಕೋಪಯೋಗಿ ಇಲಾಖೆಗೆ ರೂಪಿಸಿರುವ ವೃಂದ ಮತ್ತು ನೇಮಕಾತಿ ನಿಯಮ ಆಧರಿಸಿ ಬಡ್ತಿ ಕೊಡಲಾಗುತ್ತಿದೆ ಎಂದು ಹೇಳಿದ್ದಾರೆ. ಆದರೆ, ನಿಯಮದ ಪ್ರಕಾರ ಪ್ರತಿ ಇಲಾಖೆಗೂ ಪ್ರತ್ಯೇಕ ವೃಂದ ಮತ್ತು ನೇಮಕ ನಿಯಮ ಇರಬೇಕು. ಈ ಬಗ್ಗೆ ಪ್ರಶ್ನಿಸಿದರೆ ಇಲಾಖೆ ಮಟ್ಟದಲ್ಲೇ ರ್ಚಚಿಸಿ, ಸೂಕ್ತ ನಿಯಮಾವಳಿಗಳನ್ನು ರೂಪಿಸಿಕೊಂಡೇ ಬಡ್ತಿ ಕೊಡಲಾಗುತ್ತದೆ. ಯೋಜನೆ ಪೂರ್ಣಗೊಂಡ ನಂತರ ಆ ಹುದ್ದೆಗಳನ್ನು ರದ್ದುಪಡಿಸಲಾಗುತ್ತದೆ ಎಂದು ಉತ್ತರಿಸುತ್ತಾರೆ. ಆದರೆ, ಇಲಾಖಾ ಮಟ್ಟದಲ್ಲಿ ರೂಪಿಸಿಕೊಂಡಿರುವ ನಿಯಮಾವಳಿಗಳ ದಾಖಲೆ ಕೇಳಿದರೆ ಇಲ್ಲ ಎನ್ನುತ್ತಾರೆ.

32 ಯೋಜನೆ ಪ್ರಗತಿ: ಪ್ರಸ್ತುತ ರಾಜ್ಯದಲ್ಲಿ ವಿಶ್ವೇಶ್ವರಯ್ಯ ಜಲನಿಗಮ (ವಿಜೆಎನ್​ಎಲ್), ಕರ್ನಾಟಕ ನೀರಾವರಿ ನಿಗಮ (ಕೆಎನ್​ಎನ್​ಎಲ್), ಕಾವೇರಿ ನೀರಾವರಿ ನಿಗಮ (ಸಿಎನ್​ಎನ್​ಎಲ್), ಕೃಷ್ಣ ಭಾಗ್ಯ ಜಲ ನಿಗಮ (ಕೆಬಿಟಿಎನ್​ಎಲ್) ಸೇರಿ 32 ಯೋಜನೆಗಳು ಪ್ರಗತಿಯಲ್ಲಿವೆ. ನಗರಾಭಿವೃದ್ಧಿ, ಇಂಧನ, ಆರ್​ಡಿಪಿಆರ್, ಬಿಬಿಎಂಪಿ, ನೀರಾವರಿ, ವಸತಿ, ಬಿಡಿಎ ಸೇರಿ ಬಹುತೇಕ ಇಲಾಖೆಗಳಲ್ಲಿ ಮುಖ್ಯ ಇಂಜಿನಿಯರ್ ಹುದ್ದೆಗಳಿವೆ.

ಬಡ್ತಿ ನಿಯಮ ಏನಿದೆ?: ಕರ್ನಾಟಕ ನಾಗರಿಕ ಸೇವೆಗಳ ನಿಯಮಾವಳಿಗಳ (ಕೆಸಿಎಸ್​ಆರ್) ಪ್ರಕಾರ ನಿಯಮ 42ರಡಿ ಅರ್ಹತೆ ಹಾಗೂ ಜೇಷ್ಠತೆ ಅನ್ವಯ ಅಧೀಕ್ಷಕ ಇಂಜಿನಿಯರ್ ಹುದ್ದೆಯಿಂದ ಚೀಫ್ ಇಂಜಿನಿಯರ್ ಅಥವಾ ಇಂಜಿನಿಯರ್ ಇನ್ ಚೀಫ್ ಹುದ್ದೆಗೆ ಪದೋನ್ನತಿ ನೀಡಬೇಕು. ಒಂದು ವೇಳೆ ಸ್ಥಾನಪನ್ನ ಬಡ್ತಿಗೆ ಹುದ್ದೆ ಖಾಲಿ ಇರದಿದ್ದರೆ ಕೆಸಿಎಸ್​ಆರ್ ನಿಯಮ 32ರ ಅನ್ವಯ ಸ್ವತಂತ್ರ ಪ್ರಭಾರ ಹುದ್ದೆಯಲ್ಲಿರಿಸಬೇಕು. ಖಾಯಂ ಹುದ್ದೆಗಳು ನಿವೃತ್ತಿ ಅಥವಾ ಬೇರೆ ಕಾರಣಗಳಿಂದಾಗಿ ಖಾಲಿಯಾದರೆ ಪುನಃ ನಿಯಮ 42ರ ಅನ್ವಯ ಅಧಿಕಾರಿಯನ್ನು ವರ್ಗಾಯಿಸಿ ಖಾಯಂ ಮುಂಬಡ್ತಿ ಕೊಡಬೇಕು.

ಸರ್ಕಾರಕ್ಕೆ ನಷ್ಟವೇನು?

• ಅಧೀಕ್ಷಕ ಇಂಜಿನಿಯರ್ ಹುದ್ದೆಗೂ ಮುಖ್ಯ ಇಂಜಿನಿಯರ್ ಹುದ್ದೆಗೂ ಕನಿಷ್ಠ 40 ಸಾವಿರ ವೇತನ ವ್ಯತ್ಯಾಸ, ಹೆಚ್ಚುವರಿ ವೇತನದ ಲೆಕ್ಕ ತೆಗೆದುಕೊಂಡರೆ ಒಬ್ಬರಿಗೆ ವಾರ್ಷಿಕ 4,80000 ಹೆಚ್ಚುವರಿ ಪಾವತಿಸಬೇಕು
• ನಿಯಮಬಾಹಿರವಾಗಿ ಮುಂಬಡ್ತಿ ಹೊಂದಿದವರಿಗೆ ಹೆಚ್ಚುವರಿ ವೇತನದಿಂದ ಕೋಟ್ಯಂತರ ರೂ. ನಷ್ಟ, ವಸತಿ, ವಾಹನ ವ್ಯವಸ್ಥೆ, ಕಚೇರಿ ನಿರ್ವಹಣಾ ವೆಚ್ಚ ಸೇರಿ ಮಾಸಿಕ ಲಕ್ಷಾಂತರ ರೂ. ವ್ಯಯಿಸಬೇಕಾಗುತ್ತದೆ

ನಿಯಮಬಾಹಿರ ಹೇಗೆ?

• ವೃಂದ ಮತ್ತು ನೇಮಕ ನಿಯಮ ರೂಪಿಸಿ, ಸಕ್ಷಮ ಪ್ರಾಧಿಕಾರದಿಂದ ಕ್ಯಾಬಿನೆಟ್ ಅನುಮತಿ ಪಡೆದಿಲ್ಲ, ಹೊಸ ಯೋಜನೆ ಗಳಿಗೆ ಅಗತ್ಯವಿಲ್ಲದಿದ್ದರೂ ಮುಖ್ಯ/ಪ್ರಧಾನ ಇಂಜಿನಿಯರ್ ಹುದ್ದೆ ಸೃಷ್ಟಿ
• ಉದ್ದೇಶಿತ ಯೋಜನೆ ಪೂರ್ಣಗೊಂಡ ನಂತರ ಹಿಂಬಡ್ತಿ ಕೊಡದೆ ಅದೇ ಹುದ್ದೆಯಲ್ಲಿ ಮುಂದುವರಿಕೆ, ಖಾಲಿ ಹುದ್ದೆ ಸಿಗದಿದ್ದಾಗ ಕೆಲಸ ಮಾಡದಿದ್ದರೂ ಕೂಡ ವೇತನ ಹಾಗೂ ಇತರ ಸೌಲಭ್ಯ ವಿತರಣೆ
• ಕೆಸಿಎಸ್​ಆರ್ ನಿಯಮ 42ರ ಅನ್ವಯ ತಾತ್ಕಾಲಿಕ ಹುದ್ದೆ ಖಾಯಂಗೊಳಿಸಲಾ ಗುತ್ತಿದೆ, ಪ್ರತಿಬಾರಿ ಸರ್ಕಾರ ಬದಲಾದಾಗ ಆಯಕಟ್ಟಿನ ಹುದ್ದೆಗಳಿಗೆ ಬೇಕಾದ ಅಧಿಕಾರಿಗಳ ನಿಯೋಜನೆ, ಜಾತಿ, ಪ್ರಾದೇ ಶಿಕತೆ, ಲಂಚ, ಪ್ರಭಾವ ಆಧರಿಸಿ ಪ್ರಮುಖ ಹುದ್ದೆಗೆ ಬಡ್ತಿ ಕೊಡುತ್ತಿರುವ ಆರೋಪ

https://www.vijayavani.net/puneeth-rajkumar-dream-project-title-teaser-launch-on-6th-december/

https://www.vijayavani.net/yakshagana-artists-gave-clarification-about-masaledose-incident/