ಛತ್ತೀಸ್ಗಢದ ಜನಪ್ರಿಯ ಸಿಎಂ ಎಂದೇ ಖ್ಯಾತಿಯಾಗಿದ್ದ ಭೂಪೇಶ್ ಬಘೇಲ್ ಸರ್ಕಾರವನ್ನು ಮರು ಆಯ್ಕೆ ಮಾಡಲು ರಾಜ್ಯದ ಜನ ಹಿಂದೇಟು ಹಾಕಿರುವುದು ಕಾಂಗ್ರೆಸ್ಗೆ ಪಂಚರಾಜ್ಯ ಚುನಾವಣೆಯ ಬಹುದೊಡ್ಡ ಆಘಾತ. ಬಿಜೆಪಿ ಮೋದಿ ನಾಯಕತ್ವವನ್ನೇ ನಂಬಿಕೊಂಡು ಚುನಾವಣೆ ಎದುರಿಸಿತು. ಮಾಜಿ ಸಿಎಂ ರಮಣ್ ಸಿಂಗ್ರನ್ನು ಸಿಎಂ ಅಭ್ಯರ್ಥಿ ಎಂದು ಘೊಷಿಸಲಿಲ್ಲ. ಬಹುತೇಕ ಮತಗಟ್ಟೆ ಸಮೀಕ್ಷೆಗಳು ರಾಜ್ಯದಲ್ಲಿ ಈ ಬಾರಿ ಕಾಂಗ್ರೆಸ್ ಸರ್ಕಾರದ ಮರುಸ್ಥಾಪನೆ ಎಂದೇ ವರದಿ ನೀಡಿದರೂ, ಬಿಜೆಪಿ ನಿರೀಕ್ಷೆಗೂ ಮೀರಿ 54 ಸೀಟುಗಳನ್ನು ಗೆದ್ದು ಅಭೂತಪೂರ್ವ ವಿಜಯ ಸಾಧಿಸಿರುವುದು ರಾಜಕೀಯ ಪಂಡಿತರ ಲೆಕ್ಕಾಚಾರಗಳನ್ನೇ ಉಲ್ಟಾ ಮಾಡಿದೆ. 2003ರಲ್ಲಿ ಮೊದಲ ಸಲದ ವಿಧಾನಸಭೆ ಚುನಾವಣೆಯಲ್ಲಿ ಬಿಜೆಪಿ ಶೇ.39.26ರಷ್ಟು ಮತಗಳಿಕೆಯೊಂದಿಗೆ 50 ಸ್ಥಾನ ಗೆದ್ದಿತ್ತು. ನಂತರದ 2008 ಮತ್ತು 2018ರ ಚುನಾವಣೆಯಲ್ಲಿ, ಸಿಎಂ ರಮಣ್ ಸಿಂಗ್ ನೇತೃತ್ವದಲ್ಲಿ ಬಿಜೆಪಿ ಕ್ರಮವಾಗಿ 50 ಮತ್ತು 49 ಸ್ಥಾನಗಳನ್ನು ತನ್ನದಾಗಿಸಿಕೊಂಡಿತು. 2018ರಲ್ಲಿ ಸೋತ ಬಳಿಕ ಈಗ ಮತ್ತೊಮ್ಮೆ ಎದೆಯುಬ್ಬಿಸಿ ನಿಂತಿದೆ. ಆದರೆ, ರಮಣ್ ಮತ್ತೆ ಸಿಎಂ ಆಗುತ್ತಾರಾ ಅಥವಾ ಹೊಸಮುಖಕ್ಕೆ ಅವಕಾಶ ಸಿಗುವುದೇ ಎಂಬ ಬಗ್ಗೆ ಖಚಿತತೆ ಇಲ್ಲ. ರೈತ ಕುಟುಂಬದ ಮತಗಳನ್ನು ಸೆಳೆಯಲು ಯತ್ನಿಸಿದ ಕಾಂಗ್ರೆಸ್, ಮತ್ತೆ ಅಧಿಕಾರಕ್ಕೆ ಬಂದರೆ, 2018ರಲ್ಲಿ ಜಾರಿಗೊಳಿಸಿದಂತೆ ಈ ಬಾರಿ ಎರಡನೇ ಹಂತದ ಕೃಷಿ ಸಾಲಮನ್ನಾ ಯೋಜನೆ ಅನುಷ್ಠಾನಗೊಳಿಸುವುದಾಗಿ ಭರವಸೆ ನೀಡಿತ್ತು. 2018ರ ಸಾಲಮನ್ನಾ ಘೊಷಣೆ 15 ವರ್ಷಗಳ ಅಂದಿನ ಸಿಎಂ ರಮಣ್ ಸಿಂಗ್ ಆಡಳಿತ ಕೊನೆಗೊಳಿಸುವಲ್ಲಿ ಮಹತ್ವದ ಪಾತ್ರವಹಿಸಿತ್ತು. ಛತ್ತೀಸ್ಗಢ ಸರ್ಕಾರ ಈ ಹಿಂದೆ 18.82 ಲಕ್ಷ ರೈತರ ರೂ 9,270 ಕೋಟಿ ಮೌಲ್ಯದ ಕೃಷಿ ಸಾಲ ಮನ್ನಾ ಮಾಡಿದೆ. ಸಾಲಮನ್ನಾ ಜತೆಗೆ ಜಾತಿ ಗಣತಿ, ಪ್ರತಿ ಎಕರೆ ಭತ್ತದ ಸಂಗ್ರಹವನ್ನು 15 ಕ್ವಿಂಟಾಲ್ ನಿಂದ 20 ಕ್ವಿಂಟಾಲ್ಗೆ ಹೆಚ್ಚಿಸುವುದು ಹಾಗೂ 1.75 ಮಿಲಿಯನ್ ಜನರಿಗೆ ಮನೆಗಳನ್ನು ಒದಗಿಸುವ ಭರವಸೆ ನೀಡಿತ್ತು. ಏತನ್ಮಧ್ಯೆ, ಹಿಂದುತ್ವ ಅಜೆಂಡಾಕ್ಕೆ ಬಘೇಲ್ ಒತ್ತು ನೀಡಿದ್ದ ಬಘೇಲ್, ಭಗವಾನ್ ಶ್ರೀರಾಮನ ತಾಯಿಗೆ ಸಮರ್ಪಿತವಾಗಿರುವ ಏಕೈಕ ಮಾತಾ ಕೌಸಲ್ಯೆ ದೇವಾಲಯವನ್ನು ನವೀಕರಣಗೊಳಿಸುವ ಮೂಲಕ ಹಿಂದು ಮತಗಳನ್ನು ಸೆಳೆಯುವ ಯತ್ನ ಮಾಡಿದ್ದರು. ಅವರ ಭಾಷಣಗಳಲ್ಲೂ ರಾಮಾಯಣದ ಉಲ್ಲೇಖಗಳು ಕೇಳಿಬಂದವು. ಆದರೆ ಮೋದಿ ಗ್ಯಾರಂಟಿ ಮಧ್ಯೆ ಇವ್ಯಾವುವೂ ಮತದಾರರನ್ನು ಸೆಳೆದಂತಿಲ್ಲ.
