ಮೃತ ಹರ್ಷ ಕುಟುಂಬಕ್ಕೆ ಬಂದ ಧನಸಹಾಯದ ಒಂದು ಭಾಗ ಸಮಾಜಸೇವೆಗೆ; ಟ್ರಸ್ಟ್​ ಕಾರ್ಯಾರಂಭ..

ಶಿವಮೊಗ್ಗ: ಹತ್ಯೆಗೀಡಾಗಿದ್ದ ಬಜರಂಗದಳದ ಕಾರ್ಯಕರ್ತ ಹರ್ಷನ ಹೆಸರಲ್ಲಿ ಆತನ ಕುಟುಂಬಸ್ಥರು ಚಾರಿಟಬಲ್ ಟ್ರಸ್ಟ್ ಸ್ಥಾಪನೆ ಮಾಡಿದ್ದಾರೆ. ಶನಿವಾರದಿಂದಲೇ ಟ್ರಸ್ಟ್ ಕಾರ್ಯಾರಂಭಗೊಂಡಿದ್ದು ಹರ್ಷನ ಕುಟುಂಬಕ್ಕೆ ಸಹಾಯವಾಗಿ ಬಂದಿದ್ದ ಹಣದ ಒಂದು ಭಾಗವನ್ನು ಇದಕ್ಕಾಗಿ ಮೀಸಲಿಡಲಾಗಿದೆ.

ಫೆ. 20ರಂದು ರಾತ್ರಿ ಹರ್ಷನ ಕೊಲೆ ನಡೆದಿದ್ದು ಮರುದಿನವೇ ಕಲ್ಲು ತೂರಾಟ ನಡೆದು ಕೋಮುಗಲಭೆಗೆ ಕಾರಣವಾಗಿದ್ದರಿಂದ ರಾಷ್ಟ್ರಮಟ್ಟದಲ್ಲಿ ಸುದ್ದಿ ಆಗಿತ್ತು. ರಾಜ್ಯ ಸರ್ಕಾರ, ಸಂಘ-ಸಂಸ್ಥೆಗಳು ಹಾಗೂ ದೇಶ-ವಿದೇಶಗಳಿಲ್ಲಿನ ಹಿಂದುಗಳು ಹರ್ಷನ ಕುಟುಂಬಕ್ಕೆ ಆರ್ಥಿಕ ಮತ್ತು ನೈತಿಕ ಬೆಂಬಲ ನೀಡಿದ್ದರು. ಹಾಗಾಗಿ ಹರ್ಷನ ಹೆಸರಲ್ಲಿ ಟ್ರಸ್ಟ್ ಸ್ಥಾಪಿಸಿ ಸಾಮಾಜಿಕ ಕಾರ್ಯಗಳಲ್ಲಿ ತೊಡಗಿಕೊಳ್ಳಲು ಕುಟುಂಬ ನಿರ್ಧರಿಸಿದೆ.

ಟ್ರಸ್ಟ್‌ನ ಉದ್ದೇಶ: ಬಡತನದ ನಡುವೆಯೂ ಉತ್ತಮ ಸಾಧನೆ ಮಾಡಿ ಆರ್ಥಿಕ ಸಮಸ್ಯೆಯಿಂದ ವಿದ್ಯಾಭ್ಯಾಸ ಮುಂದುವರಿಸಲು ಕಷ್ಟಪಡುವ ಬಡ ವಿದ್ಯಾರ್ಥಿಗಳಿಗೆ ಇನ್ಮುಂದೆ ಈ ಟ್ರಸ್ಟ್ ಆಸರೆಯಾಗಲಿದೆ. ಅನಾರೋಗ್ಯದಿಂದಿರುವ ಬಡವರಿಗೆ ನೆರವು ನೀಡಲಿದೆ. ಗೋಶಾಲೆಗಳ ನಿರ್ಮಾಣ ಮಾಡಲಿದೆ. ಪ್ರಸಕ್ತ ವರ್ಷ ಶಿಕ್ಷಣಕ್ಕೆ ಹೆಚ್ಚಿನ ಒತ್ತು ನೀಡಲಿದ್ದು ದಾನಿಗಳು ಟ್ರಸ್ಟ್‌ಗೆ ಆರ್ಥಿಕ ನೆರವು ನೀಡಬಹುದು.

ಈಗಾಗಲೇ ಟ್ರಸ್ಟ್ ಪಿಎಫ್‌ಐ ಪ್ರಚೋದಿತ ಗಲಭೆಯಲ್ಲಿ ಮೃತಪಟ್ಟ ವಿಶ್ವನಾಥ ಶೆಟ್ಟಿ ಪುತ್ರ ಯಶಸ್‌ನ ವಿದ್ಯಾಭ್ಯಾಸಕ್ಕೆ ಮತ್ತು ಕಾಸರಗೋಡಿನಲ್ಲಿ ಮೃತಪಟ್ಟ ಆರ್‌ಎಸ್‌ಎಸ್ ಕಾರ್ಯಕರ್ತ ಜ್ಯೋತಿಷ್ ಅವರ ಕುಟುಂಬಕ್ಕೆ ತಲಾ 2 ಲಕ್ಷ ರೂ. ನೀಡಿದೆ. ಅವರ ಎರಡನೇ ಮಗನ ವಿದ್ಯಾಭ್ಯಾಸಕ್ಕೂ ಸಹಾಯ ಮಾಡಲು ಹರ್ಷನ ಕುಟುಂಬ ಒಪ್ಪಿಗೆ ನೀಡಿದೆ.

ಟ್ರಸ್ಟ್ ಪದಾಧಿಕಾರಿಗಳು

• ಅಶ್ವಿನಿ: ಅಧ್ಯಕ್ಷೆ
• ರಜನಿ: ಉಪಾಧ್ಯಕ್ಷೆ
• ಕೆ.ಇ.ಕಾಂತೇಶ್: ವ್ಯವಸ್ಥಾಪಕ ಟ್ರಸ್ಟಿ
• ಸಚಿನ್ ರಾಯ್ಕರ್: ಕಾರ್ಯದರ್ಶಿ
• ಕೆ.ಕೆ.ಪುರುಷೋತ್ತಮ್: ಸಹ ಕಾರ್ಯದರ್ಶಿ
• ಕೆ.ಫಣೀಶ್: ಖಜಾಂಚಿ

https://www.vijayavani.net/india-declares-hafiz-saeeds-son-talha-saeed-as-designated-terrorist/

https://www.vijayavani.net/two-former-cm-and-62-writers-got-life-threat/

https://www.vijayavani.net/harsha-murder-case-nia-filed-fir/