ನವದೆಹಲಿ: ಚಂದ್ರಯಾನ -3 ಚಂದ್ರನ ಮೊದಲ ಚಿತ್ರಗಳನ್ನು ಹಂಚಿಕೊಂಡಿದ್ದು ಅವು ಅದ್ಭುತವಾಗಿ ಕಾಣುತ್ತಿವೆ! ಇಸ್ರೋನ ಮಹತ್ವಾಕಾಂಕ್ಷೆಯ ಯೋಜನೆಯಾಗಿರುವ ಚಂದ್ರಯಾನ-3 ಮಿಷನ್ನ ಬಾಹ್ಯಾಕಾಶ ನೌಕೆ ಶನಿವಾರ ಚಂದ್ರನ ಕಕ್ಷೆಯನ್ನು ಪ್ರವೇಶಿಸುತ್ತಿದ್ದಂತೆಯೇ ಚಂದ್ರನ ಕೆಲ ಫೋಟೊಗಳನ್ನು ಸೆರೆ ಹಿಡಿದಿದೆ. ಇದರ ವೀಡಿಯೊ ಕ್ಲಿಪ್ ಅನ್ನು ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ) ಭಾನುವಾರ, ಎಕ್ಸ್ ಅಥವಾ ಟ್ವಿಟರ್.ನಲ್ಲಿ ಹಂಚಿಕೊಂಡಿದೆ. ಚಂದ್ರನ ಮೇಲ್ಮೈಯಲ್ಲಿ ಮೃದುವಾಗಿ ಇಳಿಯಲು ಕೇವಲ 20 ದಿನಗಳಿಗೂ ಕಡಿಮೆ ಅವಧಿ ಉಳಿದಿದೆ. ಆದರೂ ಚಂದ್ರಯಾನ-3 ನೌಕೆ ಅದರ ಕಡೆಗೆ ಸಮೀಪಿಸುತ್ತಿದ್ದಂತೆ ಚಂದ್ರನ ಕುಳಿಗಳ ಸಂಕೀರ್ಣ ವಿವರಗಳ ಒಂದು ಸುಂದರ ಕ್ಲಿಪ್ ಕಾಣಬಹುದು.
