ರಾಜ್ಯಗಳಿಗೆ ಕೋವಿಡ್​ ತುರ್ತು ನಿಧಿ ಬಿಡುಗಡೆಗೆ ಕೇಂದ್ರ ನಿರ್ಧಾರ, 5 ವರ್ಷಗಳವರೆಗೆ ಬರಲಿದೆ 15 ಸಾವಿರ ಕೋಟಿ ರೂ. ನೆರವು

ನವದೆಹಲಿ: ಕರೊನಾ ಪಿಡುಗು ಹಿನ್ನೆಲೆಯಲ್ಲಿ ಎಲ್ಲ ರಾಜ್ಯಗಳಲ್ಲಿ ಇರುವ ಕೇಂದ್ರ ಮತ್ತು ರಾಜ್ಯ ಆರೋಗ್ಯ ಕೇಂದ್ರಗಳನ್ನು ಅಭಿವೃದ್ಧಿಪಡಿಸಲು ಕೇಂದ್ರ ಸರ್ಕಾರ ನಿರ್ಧರಿಸಿದೆ. ಈ ಹಿನ್ನೆಲೆಯಲ್ಲಿ ಎಲ್ಲ ರಾಜ್ಯ ಸರ್ಕಾರಗಳಿಗೆ ಮುಂದಿನ 5 ವರ್ಷಗಳವರೆಗೆ 15 ಸಾವಿರ ಕೋಟಿ ರೂ. ನೆರವು ನೀಡಲು ನಿರ್ಧರಿಸಿದೆ.

ಕೇಂದ್ರ ಸರ್ಕಾರ ಬುಧವಾರ ಈ ನಿರ್ಧಾರ ಕೈಗೊಂಡಿದ್ದು, 15 ಸಾವಿರ ಕೋಟಿ ರೂ.ಗಳನ್ನು ಎಲ್ಲ ರಾಜ್ಯಗಳಿಗೂ ಸಮನಾಗಿ ಹಂಚಿ ಮೂರು ಹಂತಗಳಲ್ಲಿ ಬಿಡುಗಡೆ ಮಾಡಲಿದೆ. ಕೋವಿಡ್​ 19 ತುರ್ತು ಪ್ರತಿಕ್ರಿಯೆ ಮತ್ತು ಆರೋಗ್ಯ ವ್ಯವಸ್ಥೆ ಸನ್ನದ್ಧತೆ ಪ್ಯಾಕೇಜ್​ (ಕೋವಿಡ್​-19 ಎಮರ್ಜೆನ್ಸಿ ರೆಸ್ಪಾನ್ಸ್​ ಆ್ಯಂಡ್​ ಹೆಲ್ತ್​ ಸಿಸ್ಟಂ ಪ್ರಿಪೇರ್ಡ್​ನೆಸ್​ ಪ್ಯಾಕೇಜ್​) ಎಂಬ ಹೆಸರಿನ ಈ ಪ್ಯಾಕೇಜ್​ ಅನ್ನು 2020 ಜನವರಿಯಿಂದ 2020 ಜೂನ್​, 2020ರ ಜುಲೈನಿಂದ 2021ರ ಮಾರ್ಚ್​ ಮತ್ತು 2021ರ ಏಪ್ರಿಲ್​ನಿಂದ 2024ರ ಮಾರ್ಚ್​ವರೆಗೆ ಅನುಷ್ಠಾನಗೊಳಿಸಲಾಗುವುದು ಎಂದು ಕೇಂದ್ರ ಸರ್ಕಾರ ಹೇಳಿದೆ.

ಕೋವಿಡ್​ 19 ಆಸ್ಪತ್ರೆಗಳ ಅಭಿವೃದ್ಧಿ, ಐಸಿಯುಗಳ ಅಭಿವೃದ್ಧಿ ಮತ್ತು ಆಕ್ಸಿಜನ್​ ಸಿಲಿಂಡರ್​ಗಳ ವ್ಯವಸ್ಥೆಗೆ ಈ ನಿಧಿಯ ಹಣವನ್ನು ಬಳಸಬಹುದಾಗಿದೆ.

ರಾಷ್ಟ್ರೀಯ ಆರೋಗ್ಯ ಮಿಷನ್​ನ ನಿರ್ದೇಶಕರು ಹೊರಡಿಸಿರುವ ಈ ಆದೇಶದ ಪ್ರಕಾರ ಈ ನಿಧಿಯ ಅನುದಾನವನ್ನು ಆಸ್ಪತ್ರೆಗಳು ಮತ್ತು ಆಂಬುಲೆನ್ಸ್​ಗಳನ್ನು ಸೋಂಕುನಿವಾರಕ ದ್ರಾವಣ ಸಿಂಪಡಿಸುವಿಕೆ, ಆಸ್ಪತ್ರೆಗಳಿಗೆ ಅಗತ್ಯವಾದ ವಸ್ತುಗಳ ಖರೀದಿ, ವೈಯಕ್ತಿಕ ರಕ್ಷಣಾ ಸಾಧನಗಳು (ಪಿಪಿಇ) ಮತ್ತು ಎನ್​95 ಮಾಸ್ಕ್​ಗಳ ಖರೀದಿ, ಔಷಧಗಳ ಖರೀದಿ ಮತ್ತು ಜೈವಿಕ ಭದ್ರತೆಯ ಸಿದ್ಧತೆಗೆ ಬಳಸಬಹುದಾಗಿದೆ.

https://www.vijayavani.net/federation-of-indian-exporters-seeks-compensation-of-rs-30000-crores-from-union-government/