ರಾಗಿಣಿ ವಾಟ್ಸ್​ಆ್ಯಪ್​​​ನಲ್ಲಿ 'ಶ್ರೀ' ಎಂದು ಸೇವ್​ ಆಗಿದ್ದವ ಅರೆಸ್ಟ್​; ನಟಿ ಇಲ್ಲದಾಗಲೂ ಫ್ಲ್ಯಾಟ್​ಗೆ ಹೋಗಿದ್ದ !

ಬೆಂಗಳೂರು: ಸ್ಯಾಂಡಲ್​ವುಡ್​ ಡ್ರಗ್ಸ್ ಜಾಲ ಪ್ರಕರಣಕ್ಕೆ ಸಂಬಂಧಪಟ್ಟಂತೆ ಇನ್ನೋರ್ವ ಪೆಡ್ಲರ್​​ನನ್ನು ಇಂದು ಸಿಸಿಬಿ ಪೊಲೀಸರು ಬಂಧಿಸಿದ್ದಾರೆ. ರಾಗಿಣಿ ಸಿಸಿಬಿ ಕಸ್ಟಡಿಯಲ್ಲಿ ಇದ್ದಾಗಲೇ ಇವನು ಆಕೆಯ ಫ್ಲ್ಯಾಟ್​​ಗೆ ಹೋಗಿದ್ದ ಎಂಬ ವಿಚಾರ ಬೆಳಕಿಗೆ ಬಂದಿದ್ದು, ತೀವ್ರ ಕುತೂಹಲಕ್ಕೆ ಕಾರಣವಾಗಿದೆ.

ಶ್ರೀನಿವಾಸ್​ ಸುಬ್ರಹ್ಮಣ್ಯನ್​ ಅಲಿಯಾಸ್​ ಶ್ರೀ (45) ಬಂಧಿತ. ನಟಿ ರಾಗಿಣಿಯವರ ಯಲಹಂಕದಲ್ಲಿರುವ ಫ್ಲ್ಯಾಟ್​​ಗೆ ಮೂರು ನಾಲ್ಕು ಬಾರಿ ಭೇಟಿ ಕೊಟ್ಟಿದ್ದ. ಈ ವಿಚಾರವನ್ನು ರಾಗಿಣಿ ಸಿಸಿಬಿ ಪೊಲೀಸರ ಎದುರು ಹೇಳಿದ್ದರು.

ರಾಗಿಣಿ ಹೇಳಿಕೆ ಆಧರಿಸಿ ಇಂದು ಸಿಸಿಬಿ ಅಧಿಕಾರಿಗಳು ಶ್ರೀನಿವಾಸ್​​ನ ಫ್ಲ್ಯಾಟ್​ ಮೇಲೆ ದಾಳಿ ನಡೆಸಿದ್ದಾರೆ. ಅಲ್ಲಿರುವ ಮಾದಕ ವಸ್ತುಗಳನ್ನೂ ಜಪ್ತಿ ಮಾಡಿದ್ದಾರೆ. ಆತನನ್ನು ಬಂಧಿಸಿ ಸಿಸಿಬಿ ಕಚೇರಿಗೆ ಕರೆತಂದಿದ್ದಾರೆ.

ಈ ಹಿಂದೆ ಬಂಧಿತ ರವಿಶಂಕರ್ ಮತ್ತು ರಾಗಿಣಿ ನಡುವಿನ ವಾಟ್ಸ್‌ಆ್ಯಪ್ ಚಾಟಿಂಗ್‌ನಲ್ಲಿ ಶ್ರೀ ಎಂದು ಉಲ್ಲೇಖಿಸಲಾಗಿತ್ತು. ರವಿಶಂಕರ್ ಮೊಬೈಲ್ ಪರಿಶೀಲನೆ ವೇಳೆ ಬೆಳಕಿಗೆ ಬಂದಿತ್ತು. ಶ್ರೀ ಎಂದರೆ ಯಾರೆಂದು ಸಿಸಿಬಿ ಪೊಲೀಸರು ಕಳೆದ 2 ವಾರಗಳಿಂದ ನಿಗಾ ವಹಿಸಿದ್ದರು. ಕೊನೆಗೂ ಶ್ರೀ ಎಂಬ ವ್ಯಕ್ತಿ ಪತ್ತೆಯಾಗಿದ್ದು, ಈತನ ವಿಚಾರಣೆ ವೇಳೆ ಮತ್ತಷ್ಟು ಸ್ಯಾಂಡಲ್‌ವುಡ್‌ಗೆ ಡ್ರಗ್ಸ್ ಲಿಂಕ್ ಇರುವುದು ಬಹಿರಂಗವಾಗುವಾಗಲಿದೆ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.

https://www.vijayavani.net/s-agriculture-bills-passed-in-rajyasabha/