ಪಕ್ಷದ ರಾಜ್ಯ ಕಚೇರಿಯಲ್ಲಿ ಸುದ್ದಿಗಾರರಿಗೆ ಭಾನುವಾರ ಪ್ರತಿಕ್ರಿಯಿಸಿದ ಅವರು, ಎಚ್ಡಿಕೆ ಸ್ವಜಾತಿ ಕೂಪ ಮಂಡೂಕ ಯೋಚನೆಗಳು, ತಮ್ಮ ಕುಟುಂಬ ಹಾಗೂ ಮನೆ ಬಿಟ್ಟು ಹೊರಗೆ ಬರಲಿದೆ ಎಂದು ತಿವಿದರು. ಜೆಡಿಎಸ್ ಪಂಚರತ್ನವಲ್ಲ ನವಗ್ರಹ ಯಾತ್ರೆ ಮಾಡಬೇಕು ಎಂದು ಜೋಶಿಯವರು ಸತ್ಯವನ್ನೇ ಹೇಳಿದ್ದು, ಅಷ್ಟಕ್ಕೇ ಎಚ್ಡಿಕೆಗೆ ಸಿಟ್ಟು ಬಂದಿದೆ. ಸ್ಮಾರ್ಥ ಹಾಗೂ ಪೇಶ್ವೆ ಬ್ರಾಹ್ಮಣರೆಂದು ಮಹಾರಾಷ್ಟ್ರದಲ್ಲಿದ್ದು, ರಾಜ್ಯದಲ್ಲಿ ಇಲ್ಲ. ಆ ವಿಷಯದಲ್ಲಿ ಎಚ್ಡಿಕೆ ಪಿಎಚ್ಡಿ ಮಾಡಿದ್ದಾರೆಯೆ? ಎಂದು ರವಿಕುಮಾರ್ ಕೇಳಿದರು. ಬಿಜೆಪಿ ಅಧಿಕಾರಕ್ಕೆ ಬರುತ್ತದೆ ಎಂಬ ಭಯದಿಂದ ಇಂತಹ ಹೇಳಿಕೆ ನೀಡಿದ್ದಾರೆ. ಅವರ ಕಿರುಕುಳಕ್ಕೆ ವೈ.ಎಸ್.ವಿ.ದತ್ತಾ ಜೆಡಿಎಸ್ ತೊರೆದು ಹೋಗಿದ್ದಾರೆ ಎಂದು ಕುಟುಕಿದರು. ಎಚ್ಡಿಕೆ ಬಗ್ಗೆ ಸಿಡಿ, ತಾಜ್ವೆಸ್ಟ್ಂಡ್ ಹೋಟೆಲ್, ತೋಟದ ಮನೆ ಇವೆಲ್ಲ ಪ್ರಕರಣಗಳು ನಮಗೂ ಗೊತ್ತಿದೆ ಎಂದು ಎನ್.ರವಿಕುಮಾರ್ ಎಚ್ಚರಿಕೆ ದಾಟಿಯಲ್ಲಿ ಹೇಳಿದರು. ಅವರೇನು ಸತ್ಯಹರಿಶ್ಚಂದ್ರರಲ್ಲ, ನಾವೂ ರಾಜಕಾರಣ ಮಾಡಲು ಬಂದವರು. ಅವರು ಇದೇ ರೀತಿ ಮುಂದುವರಿದರೆ ನಾವೂ ಮಾತನಾಡುತ್ತೇವೆ. ರಾಜ್ಯದ ಅತ್ಯಂತ ಸ್ವಾರ್ಥಿ ರಾಜಕಾರಣಿ ಕುಮಾರಸ್ವಾಮಿ. ರಾಜ್ಯದಲ್ಲಿ ಯಾರಿಗೂ ಬಹುಮತ ಬರಬಾರದು. ನಮ್ಮ ಮನೆ ಬಾಗಿಲಿಗೆ ಬರಬೇಕು ಅಂದುಕೊಂಡಿದ್ದಾರೆ ಎಂದು ಎನ್.ರವಿಕುಮಾರ್ ಕುಟುಕಿದರು.
