ಇಸ್ಲಾಂ ಜಗತ್ತಿನ ಪ್ರಮುಖ ದೇಶಗಳಾದ ಸೌದಿ ಅರೇಬಿಯಾ, ಯುಎಇ ಈಗ ಪಾಕ್ ಜತೆ ಇಲ್ಲ. ಪಾಕ್ನಿಂದ ಭಯೋತ್ಪಾದನೆ ರಫ್ತು ನಡೆಯುತ್ತಿದೆ ಎಂಬ ವಾಸ್ತವಾಂಶವನ್ನು ಅಂತಾರಾಷ್ಟ್ರೀಯ ವಲಯವೂ ಮನಗಂಡಿದೆ. ಹೀಗಾಗಿ, ಅನಿವಾರ್ಯವಾಗಿಯಾದರೂ ಅದು ಶಾಂತಿಮಾರ್ಗಕ್ಕೆ ಮರಳಬೇಕಿದೆ. ಈ ಹಿಂದೆ ಪಾಕಿಸ್ತಾನವೇ ಕದನವಿರಾಮ ಒಪ್ಪಂದವನ್ನು ಉಲ್ಲಂಘಿಸಿದ, ಗಡಿಯಲ್ಲಿ ಅಪ್ರಚೋದಿತ ದಾಳಿ ನಡೆಸಿದ ಅಸಂಖ್ಯ ನಿದರ್ಶನಗಳಿವೆ. ಇಡೀ ಜಗತ್ತು ಕರೊನಾ ಸಂಕಷ್ಟದ ವಿರುದ್ಧ ಹೋರಾಡುತ್ತಿದ್ದರೂ ಪಾಕ್ ಗಡಿಯಲ್ಲಿ ಅಶಾಂತಿ ಸೃಷ್ಟಿಸಲು, ಭಯೋತ್ಪಾದಕರನ್ನು ನುಸುಳಿಸಲು ಯತ್ನಿಸುತ್ತಿತ್ತು ಎಂಬುದು ಗೊತ್ತೇ ಇದೆ. ಅದರ ಈ ಎಲ್ಲ ಕೃತ್ಯಗಳ ಹಿಂದೆ ಚೀನಾದ ನೆರವು ಇದ್ದೇಇದೆ. ಭಾರತ ಮತ್ತು ಪಾಕಿಸ್ತಾನ ಪರಸ್ಪರ ಸಂಘರ್ಷ, ಅಶಾಂತಿಯಲ್ಲಿದ್ದಷ್ಟು ಚೀನಾಕ್ಕೆ ಲಾಭ. ಅದು ಪಾಕ್ ಮೂಲಕ ಭಯೋತ್ಪಾದನೆ ರಫ್ತು ಮಾಡಲು, ಹಿಂಸೆ ಹರಡಲು ಯತ್ನಿಸುತ್ತದೆ. ಹಾಗಾಗಿ, ಆ ಎರಡೂ ರಾಷ್ಟ್ರಗಳ ಪ್ರತೀ ಮಾತನ್ನೂ, ನಡೆಯನ್ನೂ ತುಂಬ ಎಚ್ಚರಿಕೆಯಿಂದ ಗಮನಿಸಬೇಕಾಗುತ್ತದೆ. ಭಾರತ ಸಾಮರಿಕವಾಗಿ, ರಾಜತಾಂತ್ರಿಕವಾಗಿ ಬಲಿಷ್ಠವಾಗಿದೆ ಎಂಬುದರಲ್ಲಿ ಎರಡು ಮಾತಿಲ್ಲ. ಆದರೆ, ‘ಶಾಂತಿಸ್ಥಾಪನೆ’ ನೆಪದಲ್ಲಿ ಚೀನಾ ಮತ್ತು ಪಾಕಿಸ್ತಾನ ಸೇರಿಕೊಂಡು ಭಾರತದ ವಿರುದ್ಧ ಮತ್ತೆ ಷಡ್ಯಂತ್ರ ರಚಿಸುವಂತಾಗಬಾರದು. ಹಾಗಾಗಿ, ಕದನವಿರಾಮ ಒಪ್ಪಂದದ ಹೊತ್ತಲ್ಲೂ ಭಾರತ ಎಚ್ಚರಿಕೆಯ ಹೆಜ್ಜೆಯನ್ನು ಇರಿಸಬೇಕು.
