ಬೆಂಗಳೂರು: ಕರ್ತವ್ಯ ನಿರ್ವಹಿಸುವ ವೇಳೆ ಸಂಚಾರ ಪೊಲೀಸರು ಕ್ಯಾಪ್ ಧರಿಸಬೇಕು ಎಂದು ಸಂಚಾರ ವಿಭಾಗದ ಜಂಟಿ ಪೊಲೀಸ್ ಆಯುಕ್ತ ಎಂ.ಎನ್.ಅನುಚೇತ್ ಆದೇಶಿಸಿದ್ದಾರೆ.
ಇತ್ತೀಚೆಗೆ ಹೆಬ್ಬಾಳ ಬಳಿ ಸಂಚಾರ ಕಾನ್ಸ್ಟೆಬಲ್ ಒಬ್ಬರು ಕ್ಯಾಪ್ ಧರಿಸದೇ ಕರ್ತವ್ಯ ನಿರ್ವಹಿಸುತ್ತಿದ್ದರು. ಈ ವೇಳೆ ವಕೀಲರೊಬ್ಬರು ಅದನ್ನು ಪ್ರಶ್ನೆ ಮಾಡಿ ವಿಡಿಯೋ ಮಾಡಿದ್ದರು. ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿತ್ತು. ವಿಡಿಯೋ ವೈರಲ್ ಆದ ಬೆನ್ನಲ್ಲೇ ಸೆ.೬ ರಂದು ಸಭೆ ನಡೆಸಿರುವ ಜಂಟಿ ಪೊಲೀಸ್ ಆಯುಕ್ತರು ಕೆಲವೊಂದು ಸೂಚನೆಗಳನ್ನು ನೀಡಿದ್ದಾರೆ. ಅದರಲ್ಲಿ ಪ್ರಮುಖವಾದದ್ದು ಸಂಚಾರ ಪೊಲೀಸರು ಕರ್ತವ್ಯ ನಿರ್ವಹಿಸುವ ವೇಳೆ ಕ್ಯಾಪ್ ಧರಿಸುವುದು ಕಡ್ಡಾಯ ಎಂದು ಸೂಚಿಸಲಾಗಿದೆ.
ಸೂಚನೆಗಳೇನು?
*ಠಾಣೆಯ ಎಲ್ಲ ಸಿಬ್ಬಂದಿ ಕರ್ತವ್ಯದ ಎಲ್ಲ ಸಮಯದಲ್ಲೂ ಕ್ಯಾಪ್ ಧರಿಸಿಕೊಂಡು ಕರ್ತವ್ಯ ನಿರ್ವಹಿಸುವುದು.
*ಪ್ರತಿ ದಿನ ಸಂಜೆ ೫ ಗಂಟೆಯ ನಂತರ ಎಲ್ಲಾ ಪಿಎಸ್ಐ ಎಎಸ್ಐ ಹಾಗೂ ಸಿಬ್ಬಂದಿ ರ್ಲಿೆಕ್ಟೀವ್ ಜಾಕೇಟ್ ಧರಿಸಿ ಕರ್ತವ್ಯ ನಿರ್ವಹಿಸಬೇಕು.
*ಠಾಣೆಯ ಎಲ್ಲ ಕೋಬ್ರಾ ಸಿಬ್ಬಂದಿ ಪ್ರತಿ ದಿನ ೮ ಗಂಟೆಗೆ ಟ್ಯಾಬ್ ಆನ್ ಮಾಡಿಕೊಂಡು ಕರ್ತವ್ಯ ನಿರ್ವಹಿಸಬೇಕು.
*ಪಿಎಸ್ಐ ಹಾಗೂ ಎಸ್ಎಸ್ಐ ಅವರುಗಳು ಐಎಂವಿ ಪ್ರಕರಣಗಳನ್ನು ದಾಖಲು ಮಾಡುವಾಗ ಬೈಕ್ ಮೇಲೆ ಕುಳಿತುಕೊಂಡು ಪ್ರಕರಣ ದಾಖಲು ಮಾಡುವಂತಿಲ್ಲ. ಕ್ಯಾಪ್ ಧರಿಸಿಕೊಂಡು ಪ್ರಕರಣಗಳನ್ನು ದಾಖಲು ಮಾಡಬೇಕು.
*ಎಲ್ಲ ಸಿಬ್ಬಂದಿ ಕರ್ತವ್ಯದ ಸಮಯದಲ್ಲಿ ಬೈಕ್ ಮೇಲೆ ಅಥವಾ ಕಾಲುಮೇಲೆ ಕಾಲು ಹಾಕಿಕೊಂಡು ಕುಳಿತುಕೊಳ್ಳಬಾರದು. ಒಂದು ವೇಳೆ ಕರ್ತವ್ಯದ ಸಮಯದಲ್ಲಿ ಬೈಕ್ ಮೇಲೆ ಕುಳಿತುಕೊಂಡಿರುವುದು ಮೇಲಾಧಿಕಾರಿಗಳ ಗಮನಕ್ಕೆ ಬಂದಲ್ಲಿ ಮುಂದಿನ ಆಗು ಹೋಗುಗಳಿಗೆ ನಿವೇ ಜವಬ್ಧಾರರಾಗಿರುತ್ತೀರಾ ಎಂದು ಆದೇಶದಲ್ಲಿ ಎಚ್ಚರಿಸಲಾಗಿದೆ.
