ಬಚ್ಚಲಿನ ನೀರು ಹೊರಬರುವ ವೇಳೆಗೆ ಸಾಕಷ್ಟು ತಣಿದಿರುತ್ತದೆ. ಆದರೆ ಅದರಲ್ಲಿ ಸೋಪು, ಡಿಟರ್ಜೆಂಟ್, ಎಣ್ಣೆ ಏನೆಲ್ಲಾ ಸೇರಿರುತ್ತದೆ. ಹಳ್ಳಿಗಳಲ್ಲಿ ಈ ನೀರನ್ನು ತೊಂಡೆ, ಬಸಳೆ ಬಳ್ಳಿಗಳಿಗೆ ಹರಿಯಲು ಬಿಡುತ್ತಾರೆ. ತೆಂಗಿನಮರಕ್ಕೂ ಎರಡು ಅಡಿ ದೂರದಲ್ಲಿ ಉಂಗುರಕಣಿ ಮಾಡಿ ಹರಿಸಬಹುದು. ಬಚ್ಚಲಿನ ನೀರು ಹರಿವ ದಂಡೆಗಳಲ್ಲಿ ಲಾವಂಚ, ನಿಂಬೆಹುಲ್ಲು, ಪಾಮರೋಸಾ ಹುಲ್ಲು ಚೆನ್ನಾಗಿ ಬೆಳೆಯುತ್ತವೆ. ಇವು ಈ ನೀರಿನಲ್ಲಿನ ರಾಸಾಯನಿಕಗಳನ್ನು ನೆಲದಾಳಕ್ಕೆ ಇಂಗಿಸಲು ಸಹಕರಿಸುತ್ತವೆ. ಬಚ್ಚಲು ಹಾಗೂ ಶೌಚಾಲಯದ ನೀರು ಒಟ್ಟಿಗೆ ಸೇರಿ ಹರಿಯುವಂತೆ ಮಾಡಿದರೆ, ತರಕಾರಿಗಳನ್ನು ಬೆಳೆಯಬಹುದು. ಯಾವುದೇ ಗಿಡಕ್ಕೂ ನೀಡಬಹುದು. ನೀವು ಹೇಳಿರುವ ಡೆಟ್ಟಾಲ್, ಸಾವಲಿನ್ ಮುಂತಾದ ಎಲ್ಲಾ ದ್ರಾವಣಗಳು ಕ್ರಿಮಿನಾಶಕಗಳು. ಅವುಗಳನ್ನು ನಾವು ಮನುಷ್ಯರು ಬಳಸುವುದು ಸಾಮಾನ್ಯ. ಹಾಗೇ ಗಿಡಗಳಿಗೂ ಬಳಸಬಹುದು. ಆದರೆ ಪ್ರಮಾಣವನ್ನು ನೀವೇ ಪ್ರಯೋಗ ಮಾಡಿ ಕಂಡುಕೊಳ್ಳಬೇಕು. ನನಗೆ ಗೊತ್ತಿರುವಂತೆ ಯಾವುದೇ ವಿಜ್ಞಾನಿಗಳೂ ಇದರ ಪ್ರಯೋಗ ಮಾಡಿಲ್ಲ.
