ಬೆಂಗಳೂರು: ಬಹುನಿರೀಕ್ಷಿತ ಸಚಿವ ಸಂಪುಟ ವಿಸ್ತರಣೆಗೆ ದಿನಾಂಕ ನಿಗದಿಯಾದ ಬೆನ್ನ ಹಿಂದೆಯೇ ಉಪಚುನಾವಣೆ ಗೆದ್ದ ಶಾಸಕರಲ್ಲಿ ಪ್ರಭಾವಿ ಖಾತೆಗಳಿಗೆ ಪೈಪೋಟಿ ಆರಂಭವಾಗಿದೆ. ರಾಜಧಾನಿ ಶಾಸಕರು ಬೆಂಗಳೂರು ನಗರಾಭಿವೃದ್ಧಿ ಖಾತೆಗೆ ಪಟ್ಟು ಹಿಡಿದಿದ್ದರೆ, ಉಳಿದವರು ಲೋಕೋಪಯೋಗಿ, ಸಮಾಜ ಕಲ್ಯಾಣ, ಜಲಸಂಪನ್ಮೂಲ, ಇಂಧನ ಖಾತೆಗಳಿಗೆ ಒತ್ತಡ ಹಾಕುತ್ತಿದ್ದಾರೆ. ಇದರಿಂದಾಗಿ ವಿಸ್ತರಣೆಗೆ ಮುನ್ನವೇ ಸಿಎಂಗೆ ದೊಡ್ಡ ತಲೆನೋವು ಆರಂಭವಾಗಿದೆ. ಬೈರತಿ ಬಸವರಾಜು ಹಾಗೂ ಎಸ್.ಟಿ.ಸೋಮಶೇಖರ್ ನಡುವೆ ಬೆಂಗಳೂರು ನಗರಾಭಿವೃದ್ಧಿ ಖಾತೆಗೆ ಒತ್ತಾಯ ಕೇಳಿ ಬಂದಿದೆ. ಬೆಂಗಳೂರಿನ ಮೂಲ ಬಿಜೆಪಿ ಸಚಿವರು ಸಹ ಈ ಖಾತೆ ಬಗ್ಗೆ ಆಸೆ ವ್ಯಕ್ತಪಡಿಸಿದ್ದಾರೆ. ಸಿಎಂ ಬಳಿಯೇ ಈ ಖಾತೆ ಇದೆ. ರಮೇಶ್ ಜಾರಕಿಹೊಳಿ ಜಲಸಂಪನ್ಮೂಲಕ್ಕೆ ಬೇಡಿಕೆ ಇಟ್ಟಿದ್ದಾರೆ. ಇದೊಂದು ಪ್ರಮುಖ ಖಾತೆಯಾಗಿದ್ದು ನ್ಯಾಯಾಲಯ ಪ್ರಕರಣಗಳು, ಅಂತಾರಾಜ್ಯ ವಿವಾದ, ಕೇಂದ್ರದ ಜತೆ ಸಂಪರ್ಕ ಇರುವುದರಿಂದ ಜವಾಬ್ದಾರಿಯಿಂದ ಖಾತೆ ನಿರ್ವಹಣೆ ಮಾಡುವವರಿಗೆ ನೀಡಬೇಕೆಂದು ಮೂಲ ಬಿಜೆಪಿಗರ ಒತ್ತಾಯವಾಗಿದೆ. ಆ ಮೂಲಕ ರಮೇಶ್ ಆಸೆಗೆ ತಣ್ಣೀರು ಎರಚುವ ಪ್ರಯತ್ನ ಮಾಡುತ್ತಿದ್ದಾರೆ. ವರಿಷ್ಠರು ಯಾರಿಗೆ ಯಾವ ಖಾತೆ ನೀಡುತ್ತಾರೆಂಬುದು ಕುತೂಹಲಕ್ಕೆ ಕಾರಣವಾಗಿದೆ.
