ಮುನಿರತ್ನ ಅವರಿಗೆ ಆರ್​​ಆರ್​ ನಗರ ಟಿಕೆಟ್​ ವಿಚಾರದಲ್ಲಿ ಅನ್ಯಾಯ ಆಗೋದಿಲ್ಲ: ಸಚಿವ ಸುಧಾಕರ್​ ಭರವಸೆ

ಬೆಂಗಳೂರು: ತುಮಕೂರಿನ ಶಿರಾ ಮತ್ತು ಬೆಂಗಳೂರಿನ ರಾಜರಾಜೇಶ್ವರಿ ನಗರ ವಿಧಾನಸಭಾ ಕ್ಷೇತ್ರಗಳ ಉಪಚುನಾವಣೆ ದಿನಾಂಕವನ್ನು ಚುನಾವಣಾ ಆಯೋಗ ಇಂದು ಪ್ರಕಟಿಸಿದ ಬೆನ್ನಲ್ಲೇ ರಾಜಕೀಯ ವಲಯದಲ್ಲಿ ಚಟುವಟಿಕೆಗಳು ಗರಿಗೆದರಿವೆ.

ರಾಜರಾಜೇಶ್ವರಿ ಕ್ಷೇತ್ರದಲ್ಲಿ ಮುನಿರತ್ನ ಅವರಿಗೆ ಟಿಕೆಟ್​ ಪಕ್ಕಾ ಎಂದು ಹೇಳಲಾಗುತ್ತಿದ್ದರೂ ತುಳಸಿಮುನಿರಾಜಗೌಡ ಅವರೂ ಆಕಾಂಕ್ಷಿ ಹೌದು. ಮುನಿರತ್ನ ಅವರಿಗೆ ಟಿಕೆಟ್​ ನೀಡುವುದನ್ನು ಮುನಿರಾಜು ವಿರೋಧಿಸಿದ್ದಾರೆ. ಈ ಕುತೂಹಲದ ಮಧ್ಯೆಯೇ ಸಚಿವ ಡಾ. ಸುಧಾಕರ್​ ಅವರು ಮುನಿರತ್ನ ಪರ ಮಾತನಾಡಿದ್ದಾರೆ.

ಈ ಸರ್ಕಾರ ಮತ್ತು ಬಿಜೆಪಿ ಪಕ್ಷಕ್ಕಾಗಿ ಮುನಿರತ್ನ ದೊಡ್ಡ ಕೊಡುಗೆಯನ್ನೇ ಕೊಟ್ಟಿದ್ದಾರೆ. ಅವರಿಗೆ ಆರ್​ಆರ್​ ನಗರ ಟಿಕೆಟ್​ ವಿಚಾರದಲ್ಲಿ ಅನ್ಯಾಯ ಆಗೋದಿಲ್ಲ. ಮುನಿರತ್ನ ಅವರು ಸಲೀಸಾಗಿ, ಹೆಚ್ಚಿನ ಮತಗಳೊಂದಿಗೆ ಚುನಾವಣೆಯಲ್ಲಿ ಗೆಲುವು ಸಾಧಿಸುತ್ತಾರೆ ಎಂದು ಸುಧಾಕರ್​ ಹೇಳಿದ್ದಾರೆ. ಇದನ್ನೂ ಓದಿ: ಕರೊನಾ ಸೋಂಕಿಗೆ ಆಯುರ್ವೇದ ಚಿಕಿತ್ಸೆ? ಕ್ಲಿನಿಕಲ್​ ಟ್ರಯಲ್​​ನಿಂದ ಹೊರಬಿತ್ತು ಅಚ್ಚರಿಯ ಫಲಿತಾಂಶ

ನಾವೆಲ್ಲರೂ ಪಕ್ಷಕ್ಕೆ ಬರುವಾಗ ಕೆಲವೊಂದು ಭರವಸೆಗಳನ್ನು ಕೊಟ್ಟಿದ್ದರು. ಅದನ್ನು ಖಂಡಿತ ಪಕ್ಷ ಈಡೇರಿಸುತ್ತದೆ ಎಂದು ಭರವಸೆ ವ್ಯಕ್ತಪಡಿಸಿದ್ದಾರೆ.

ನಾಳೆ ಸಿಎಂ ಭೇಟಿ

ಉಪಚುನಾವಣೆ ದಿನಾಂಕ ಘೋಷಣೆ ಆದ ಹಿನ್ನೆಲೆಯಲ್ಲಿ ಆರ್​ಆರ್​ ಕ್ಷೇತ್ರ ಟಿಕೆಟ್ ಆಕಾಂಕ್ಷಿಯಾಗಿರುವ ಮುನಿರತ್ನ ಅವರು ನಾಳೆ (ಸೆ.30) ಮುಖ್ಯಮಂತ್ರಿ ಯಡಿಯೂರಪ್ಪನವರನ್ನು ಭೇಟಿಯಾಗಲಿದ್ದಾರೆ.

https://www.vijayavani.net/tumkur-sira-rajarajeshwari-nagar-rr-nagar-by-election/