Kolkata Dog Killing: ಪ್ರೇಮ ಸಂಬಂಧ ಮುರಿದುಬಿದ್ದಿದ್ದಕ್ಕೆ ಕೋಪಗೊಂಡ ವ್ಯಕ್ತಿಯೊಬ್ಬ ತನ್ನ ಮಾಜಿ ಪ್ರೇಯಸಿಯ ಎರಡು ಸಾಕು ನಾಯಿಗಳನ್ನು ಬರ್ಬರವಾಗಿ ಕೊಂದಿರುವ ಆಘಾತಕಾರಿ ಘಟನೆ ಪಶ್ಚಿಮ ಬಂಗಾಳದ ಕೋಲ್ಕತ್ತಾದಲ್ಲಿ ನಡೆದಿದೆ. ಅಷ್ಟೇ ಅಲ್ಲ, ಒಂದು ನಾಯಿಯನ್ನು ನೇಣು ಹಾಕಿರುವುದನ್ನು ವಿಡಿಯೋ ಕಾಲ್ ಮೂಲಕ ಮಾಜಿ ಪ್ರೇಯಸಿಗೆ ತೋರಿಸಿ ವಿಕೃತಿ ಮೆರೆದಿದ್ದಾನೆ.
ಕೋಲ್ಕತ್ತಾದ ಬಿಕ್ರಮ್‌ಗಢ್ ಪ್ರದೇಶದಲ್ಲಿ ಒಂದು ಆತಂಕಕಾರಿ ಘಟನೆ ಬೆಳಕಿಗೆ ಬಂದಿದೆ. ಡಿಜೆ ಆಗಿ ಕೆಲಸ ಮಾಡುತ್ತಿದ್ದ ಮಹಿಳೆಯೊಬ್ಬರು ತನ್ನ ಸಂಗಾತಿ ಸಂಜೀವ್ ಭಟ್ಟಾಚಾರ್ಯ ಎಂಬಾತನೊಂದಿಗೆ ಬಾಡಿಗೆ ಮನೆಯಲ್ಲಿ ವಾಸವಾಗಿದ್ದರು. ಮಹಿಳೆ ಕೆಲ ದಿನಗಳ ಹಿಂದೆ ಸಂಜೀವ್‌ನಿಂದ ದೂರಾಗಿದ್ದಳು. ಈ ವೇಳೆ ತನ್ನ ಎರಡು ಸಾಕು ನಾಯಿಗಳನ್ನು ಮಾತ್ರ ಸಂಜೀವ್‌ನ ಆರೈಕೆಯಲ್ಲಿ ಬಿಟ್ಟು ಹೋಗಿದ್ದಳು ಎಂದು ನೆರೆಹೊರೆಯವರು ತಿಳಿಸಿದ್ದಾರೆ
ಬ್ರೇಕಪ್ ಸೇಡಿಗೆ ಸಾಕು ನಾಯಿಗಳ ಬಲಿ
ಮಾಜಿ ಪ್ರೇಯಸಿ ದೂರವಾಗಿದ್ದಕ್ಕೆ ಕೋಪಗೊಂಡ ಸಂಜೀವ್, ಆಕೆಯ ಎರಡು ಸಾಕು ನಾಯಿಗಳನ್ನು ಕೊಂದಿದ್ದಾನೆ ಎನ್ನಲಾಗಿದೆ. ಅಲ್ಲದೆ ಅದನ್ನು ವಿಡಿಯೋ ಕಾಲ್ ಮೂಲಕ ಆಕೆಗೆ ತೋರಿಸಿದ್ದಾನೆ ಎಂದು ಸ್ತಳಿಯರು ತಿಳಿಸಿದ್ದಾರೆ. ಗಾಬರಿಗೊಂಡ ಮಹಿಳೆ ಸ್ಥಳೀಯರಿಗೆ ಕರೆ ಮಾಡಿ ಹೋಗಿ ನೋಡುವಂತೆ ಮನವಿ ಮಾಡಿದ್ದಾಳೆ.
