Leopard Attack: ಆಹಾರ ಅರಸಿ ಜನವಸತಿ ಪ್ರದೇಶಕ್ಕೆ ಬಂದ ಚಿರತೆಯೊಂದು ಮನೆಯೊಳಗೆ ನುಗ್ಗಿ ಸಾಕು ನಾಯಿಯ ಮೇಲೆ ದಾಳಿ ಮಾಡಿರುವ ಘಟನೆ ಉತ್ತರಾಖಂಡದಲ್ಲಿ ನಡೆದಿದೆ. ನಾಯಿಯನ್ನು ಎಳೆದುಕೊಂಡು ಬಾತ್‌ರೂಮ್ ಒಳಗೆ ಹೋದ ಚಿರತೆಯನ್ನು ಮನೆಯವರು ಸಮಯಪ್ರಜ್ಞೆ ಮೆರೆದು ಒಳಗೇ ಕೂಡಿಹಾಕಿದ್ದಾರೆ.
ರುದ್ರಪ್ರಯಾಗ ಜಿಲ್ಲೆಯ ಜಖೋಲಿ ಬ್ಲಾಕ್‌ನ ಸುಮಾಡಿ ಮಾರುಕಟ್ಟೆ ಪ್ರದೇಶದಲ್ಲಿ ಈ ಘಟನೆ ನಡೆದಿದೆ. ದಿನೇಶ್ ಥಪ್ಲಿಯಾಲ್ ಎಂಬುವವರ ಮನೆಯಲ್ಲಿ ಚಿರತೆ ದಾಳಿ ಮಾಡಿದೆ. ರಾತ್ರಿ ಅಥವಾ ಮುಂಜಾನೆ ನಡೆದ ಈ ಘಟನೆ ಬೆಳಿಗ್ಗೆ ಮನೆಯವರ ಗಮನಕ್ಕೆ ಬಂದಿದೆ.
ಬಾತ್‌ರೂಮ್‌ನಲ್ಲಿ ಚಿರತೆ ಕಂಡು ಬೆಚ್ಚಿಬಿದ್ದ ಕುಟುಂಬ
ಆಹಾರ ಅರಸುತ್ತಾ ಬಂದ ಚಿರತೆ ಮನೆಯಲ್ಲಿದ್ದ ಸಾಕು ನಾಯಿಯ ಮೇಲೆ ದಾಳಿ ಮಾಡಿದೆ. ಬಳಿಕ ನಾಯಿಯನ್ನು ಎಳೆದುಕೊಂಡು ಮನೆಯ ಬಾತ್‌ರೂಮ್ ಒಳಗೆ ಹೋಗಿದೆ. ಈ ವೇಳೆ ಬಾತ್‌ರೂಮ್‌ನಿಂದ ಶಬ್ದ ಕೇಳಿದ ಮನೆಯವರು ಒಳಗೆ ಹೋಗಿ ನೋಡಿದಾಗ ಚಿರತೆ ಇರುವುದು ಕಂಡು ಬೆಚ್ಚಿಬಿದ್ದಿದ್ದಾರೆ.
