VIDEO: ಅಮೆರಿಕದಲ್ಲಿ ಜೋ ಬಿಡೆನ್​ ಗೆಲ್ಲಲಿದ್ದಾರೆಂದು ಭವಿಷ್ಯ ಹೇಳಿದ ರಷ್ಯಾದ ಕರಡಿ, ಹುಲಿಗಳು

ಸೈಬೀರಿಯಾ: ಅಮೆರಿಕದ ಅಧ್ಯಕ್ಷೀಯ ಮತ್ತು ಉಪಾಧ್ಯಕ್ಷೀಯ ಚುನಾವಣೆ ನಿನ್ನೆ ಮುಕ್ತಾಯವಾಗಿದೆ. ಹಂತಹಂತವಾಗಿ ಮತ ಎಣಿಕೆ ಕಾರ್ಯವೂ ನಡೆಯುತ್ತಿದೆ.

ಅನೇಕ ರಾಜಕೀಯ ವಿಶ್ಲೇಷಣೆಗಳು ಅಮೆರಿಕದಲ್ಲಿ ಯಾರು ಗೆಲುವು ಸಾಧಿಸಬಹುದು ಎಂಬುದನ್ನು ಊಹಿಸಿವೆ. ಆದರೆ ರಷ್ಯಾದ ಕ್ರಾಸ್ನೊಯಾರ್ಸ್ಕ್ ದ ಪ್ರಾಣಿ ಸಂಗ್ರಹಾಲಯದ ತಜ್ಞರು ಅಮೆರಿಕ ಅಧ್ಯಕ್ಷರು ಯಾರಾಗುತ್ತಾರೆ ಎಂಬ ಭವಿಷ್ಯ ಹೊರಬಿದಿದ್ದಿದೆ.

ತಜ್ಞರು ಎಂದರೆ ಮನುಷ್ಯರು ಎಂದುಕೊಳ್ಳಬೇಡಿ. ಭವಿಷ್ಯ ಹೇಳಿರುವವರು ಕರಡಿ ಮತ್ತು ಹುಲಿಗಳು. ಈ ಪ್ರಾಣಿಗಲು ಕಲ್ಲಂಗಡಿಹಣ್ಣಿನ ಮೂಲಕ ಅಮೆರಿಕ ಅಧ್ಯಕ್ಷರು ಯಾರಾಗುತ್ತಾರೆ ಎಂಬುದನ್ನು ತಿಳಿಸಿವೆ. ಕ್ರಾಸ್ನೊಯಾರ್ಸ್ಕ್​​​​ದ ರೊಯೆವ್ ರೋಚೆ ಮೃಗಾಲಯದಲ್ಲಿರುವ ಖಾನ್ ಎಂಬ ಹುಲಿ ಮತ್ತು ಬುಯಾನ್​ ಹೆಸರಿನ ಕಂದು ಬಣ್ಣದ ಕರಡಿ ಹೇಳಿರುವ ಭವಿಷ್ಯದ ಪ್ರಕಾರ ಅಮೆರಿಕದಲ್ಲಿ ಜೋ ಬಿಡೆನ್​ ಅವರೇ ಮುಂದಿನ ಅಧ್ಯಕ್ಷರು. ಇದನ್ನೂ ಓದಿ: ತುರ್ತುಪರಿಸ್ಥಿತಿಯನ್ನು ನೆನಪಿಸುವಂತಿದೆ ಗೋಸ್ವಾಮಿ ಬಂಧನ: ಕೇಂದ್ರ ಸಚಿವ ಜಾವಡೇಕರ್

ಎರಡು ಕಲ್ಲಂಗಡಿ ಹಣ್ಣುಗಳನ್ನು ಕಟ್​ ಮಾಡಿ, ಒಂದರ ಮೇಲೆ ಟ್ರಂಪ್​ ಚಿತ್ರ ಹಾಗೂ ಮತ್ತೊಂದರ ಮೇಲೆ ಜೋ ಬಿಡೆನ್​ ಚಿತ್ರವನ್ನು ಕೆತ್ತಲಾಗಿತ್ತು. ಎರಡೂ ಹಣ್ಣುಗಳನ್ನು ಅಕ್ಕಪಕ್ಕ ಇಡಲಾಗಿತ್ತು.  ಬುಯಾನ್ ಕರಡಿಯೆದುರು ಇದ್ದ ಹಣ್ಣುಗಳಲ್ಲಿ ಜೋ ಬಿಡೆನ್​ ಅವರ ಚಿತ್ರ ಇರುವ ಹಣ್ಣನ್ನು ಅದು ತಿಂದಿದೆ. ಹಾಗೇ, ಖಾನ್​ ಎದುರು ಇಡಲಾಗಿದ್ದ ಎರಡೂ ಹಣ್ಣುಗಳಲ್ಲಿ ಕೂಡ ಬಿಡೆನ್​ ಚಿತ್ರ ಇರುವ ಹಣ್ಣನ್ನೇ ಅದು ತನ್ನ ಕಾಲುಗಳಿಂದ ಉರುಳಿಸಿದೆ. ಈ ವಿಡಿಯೋ ಕೂಡ ಎಲ್ಲ ಕಡೆ ವೈರಲ್ ಆಗಿದೆ. ಹಾಗೇ ಬಾರ್ಕನ್​ ಎಂಬ ಇನ್ನೊಂದು ಹುಲಿಯೂ ಬಿಡೆನ್​ ಅವರೇ ಗೆಲ್ಲುತ್ತಾರೆ ಎಂಬುದನ್ನು ತೋರಿಸಿದೆ.

2016ರಲ್ಲಿ ಇದೇ ಮೃಗಾಲಯದ ಫೆಲಿಕ್ಸ್​ ಎಂಬ ಕರಡಿ, ಟ್ರಂಪ್​ ಹೆಸರು ಇರುವ ಕುಂಬಳಕಾಯಿಯನ್ನು ಎತ್ತಿಕೊಳ್ಳುವ ಮೂಲಕ ಡೊನಾಲ್ಡ್​ ಟ್ರಂಪ್ ಅವರೇ ಅಮೆರಿಕ ಅಧ್ಯಕ್ಷರಾಗುತ್ತಾರೆ ಎಂದು ಸರಿಯಾಗಿ ಭವಿಷ್ಯ ನುಡಿದಿತ್ತು. ಇದೀಗ ಈ ಮೂರು ಪ್ರಾಣಿಗಳ ಭವಿಷ್ಯ ಕುತೂಹಲ ಕೆರಳಿಸಿದೆ. (ಏಜೆನ್ಸೀಸ್​)