ಟಿಕೆಟ್ ಇಲ್ಲದೆ ವಿಮಾನದ ಹೊರಗೇ ಪ್ರಯಾಣಿಸಿದ! ಅವನು ಬದುಕುಳಿದಿದ್ದೇ ಚಮತ್ಕಾರ!

ಮ್ಯಾಸ್ಟ್ರಿಚ್, ನೆದರ್​ಲ್ಯಾಂಡ್ಸ್​: ರೈಲು, ಬಸ್ಸಿನಲ್ಲಿ ಟಿಕೆಟ್ ಇಲ್ಲದೆ ಪ್ರಯಾಣ ಮಾಡುವುದನ್ನು ಕೇಳಿದ್ದೀವಿ. ಆದರೆ ಟಿಕೆಟ್ ಇಲ್ಲದೆ ವಿಮಾನ ಪ್ರಯಾಣ ಮಾಡಬಹುದೆ ? ಅಪರೂಪದ ಪ್ರಸಂಗವೊಂದರಲ್ಲಿ ಹದಿಹರೆಯದ ಬಾಲಕನೊಬ್ಬ ಹೀಗೆ ಟಿಕೆಟ್ ಇಲ್ಲದೆ ವಿಮಾನಯಾನ ಮಾಡಿದ್ದಾನೆ! ಸೋಜಿಗದ ವಿಷಯವೆಂದರೆ... ಈ ಪ್ರಯಾಣಿಕನಿಗೆ ಸೀಟಿನ ಅವಶ್ಯಕತೆ ಬಿದ್ದಿಲ್ಲ, ಏಕೆಂದರೆ ಅವನು ವಿಮಾನದ ಹೊರಗಿನ ಲ್ಯಾಂಡಿಂಗ್ ಗೇರ್ ಹಿಡಿದು ಪಯಣಿಸಿದ್ದಾನೆ!

ಹೌದು! ನೆದರ್​ಲ್ಯಾಂಡಿನ ಮ್ಯಾಸ್ಟ್ರಿಚ್​ ವಿಮಾನ ನಿಲ್ದಾಣದಲ್ಲಿ ಫೆಬ್ರವರಿ 4 ರಂದು ಟರ್ಕಿಶ್ ಏರ್ಲೈನ್ಸ್ ಒಂದರ ಕಾರ್ಗೋ ಪ್ಲೇನು ಬಂದಿಳಿಯಿತು. ಆ ವಿಮಾನದ ಲ್ಯಾಂಡಿಂಗ್ ಗೇರ್​ಗೆ 16 ವರ್ಷದ ಬಾಲಕನೊಬ್ಬ ಜೋತುಹಾಕಿಕೊಂಡಿದ್ದನ್ನು ವಿಮಾನಾಧಿಕಾರಿಗಳು ನೋಡಿದರು. ವಿಚಾರಿಸಿದಾಗ ಆತ ಲಂಡನ್​ನ ಸ್ಟಾನ್​ಸ್ಟೆಡ್​ ವಿಮಾನ ನಿಲ್ದಾಣದಿಂದ ಇಲ್ಲಿಗೆ ವಿಮಾನದ ಹೊರಗೆಯೇ ಇದ್ದು ಪ್ರಯಾಣಿಸಿರುವುದು ತಿಳಿದುಬಂತು. ದೇಹದ ತಾಪಮಾನವು ಬಹಳ ಕಡಿಮೆ ಆಗಿದ್ದ (ಹೈಪೋಥರ್ಮಿಯಾ) ಆತನನ್ನು ಕೂಡಲೇ ಆಸ್ಪತ್ರೆಗೆ ಸೇರಿಸಿ ಚಿಕಿತ್ಸೆ ಆರಂಭಿಸಲಾಯಿತು ಎನ್ನಲಾಗಿದೆ.

ಇದನ್ನೂ ಓದಿ: ಮೇಡ್ ಇನ್ ಇಂಡಿಯಾ ಕರೊನಾ ಲಸಿಕೆಗಾಗಿ 25 ದೇಶಗಳು ಕ್ಯೂನಲ್ಲಿವೆ

ಈ ವಿಮಾನವು 19,000 ಅಡಿಗಳ ಎತ್ತರದಲ್ಲಿ ಅತಿತಣ್ಣನೆಯ ತಾಪಮಾನದಲ್ಲಿ ಒಂದು ಗಂಟೆಯ ಕಾಲ ಹಾರಿ ಬಂದಿದ್ದು, ವಿಮಾನದ ಹೊರಗಡೆ ಇದ್ದೂ ಬದುಕುಳಿದಿರುವುದು ಏರ್​ಪೋರ್ಟ್ ಅಧಿಕಾರಿಗಳಿಗೆ ಅಚ್ಚರಿ ಉಂಟುಮಾಡಿದೆ ಎಂದು ಡೈಲಿಮೇಲ್ ವರದಿ ಮಾಡಿದೆ. ಇದು ಹ್ಯೂಮನ್ ಟ್ರಾಫಿಕ್ಕಿಂಗ್​ ಪ್ರಕರಣವೇ ಎಂದು ನೆದರ್ಲ್ಯಾಂಡಿನ ಪೊಲೀಸ್ ಅಧಿಕಾರಿಗಳು ತನಿಖೆ ನಡೆಸುತ್ತಿದ್ದಾರೆ ಎನ್ನಲಾಗಿದೆ.(ಏಜೆನ್ಸೀಸ್)

https://www.vijayavani.net/5-year-old-boy-driven-land-cruiser-and-drawn-attention-of-people/

https://www.vijayavani.net/this-photoshoot-of-bride-turns-into-hilarious/