ಕೊರ್ಬಿವ್ಯಾಕ್ಸ್ ಬೂಸ್ಟರ್ ಲಸಿಕೆ: ಕೋವಿಶೀಲ್ಡ್, ಕೊವ್ಯಾಕ್ಸಿನ್ ಬಳಕೆಗೆ ವ್ಯಕ್ತವಾಗದ ತಜ್ಞರ ಒಲವು

ನವದೆಹಲಿ: ಕರೊನಾ ಸೋಂಕನ್ನು ಪರಿಣಾಮಕಾರಿಯಾಗಿ ಕಟ್ಟಿಹಾಕಲು ಪ್ರಧಾನಿ ನರೇಂದ್ರ ಮೋದಿ ಘೋಷಣೆ ಮಾಡಿರುವ ‘ಮುನ್ನೆಚ್ಚರಿಕೆ ಡೋಸ್’ಗೆ ಕೊರ್ಬಿವ್ಯಾಕ್ಸ್ ಲಸಿಕೆ ಬಳಕೆಯಾಗುವ ಸಾಧ್ಯತೆ ಹೆಚ್ಚಿದೆ. ದೇಶದ ಉನ್ನತ ತಾಂತ್ರಿಕ ಸಲಹಾ ಮಂಡಳಿಯಲ್ಲಿ ಈ ಬಗ್ಗೆ ಒಮ್ಮತ ವ್ಯಕ್ತವಾಗಿದೆ ಎಂದು ಉನ್ನತ ಸರ್ಕಾರಿ ಮೂಲಗಳು ತಿಳಿಸಿವೆ. ಕೋವಿಶೀಲ್ಡ್ ಅಥವಾ ಕೊವ್ಯಾಕ್ಸಿನ್ ಬದಲು ಕೊರ್ಬಿವ್ಯಾಕ್ಸ್ ಲಸಿಕೆ ಬಳಸಲು ತಜ್ಞರು ಶಿಫಾರಸು ಮಾಡಿದ್ದಾರೆ ಎನ್ನಲಾಗಿದೆ. ‘ಮುನ್ನೆಚ್ಚರಿಕೆ’ ಎಂಬ ಪರಿಭಾಷೆಯೇ ಮುಂದಿನ ಡೋಸ್ ಕೇವಲ ಮೂರನೇ ಡೋಸ್ ಆಗಿರದೆ ಹೊಸ ವ್ಯಾಕ್ಸಿನ್ ಆಗಲಿದೆ ಎನ್ನುವುದರ ಸೂಚನೆಯಾಗಿದೆ ಎಂಬುದು ಅಧಿಕಾರಿಗಳ ಅಭಿಪ್ರಾಯವಾಗಿದೆ. ಹೈದರಾಬಾದ್ ಮೂಲದ ಬಯಾಲಾಜಿಕಲ್-ಇ ಕಂಪನಿಯ ಕೊರ್ಬಿವ್ಯಾಕ್ಸ್ ಸಹಿತ ಹಲವು ಲಸಿಕೆಗಳು ಬೂಸ್ಟರ್ ಡೋಸ್ ಆಗುವ ಸಾಧ್ಯತೆಯಿದೆ. ಕೊರ್ಬಿವ್ಯಾಕ್ಸ್, ಪ್ರೊಟೀನ್ ಸಬ್-ಯುನಿಟ್ ಕೋವಿಡ್-19 ಲಸಿಕೆಯಾಗಿದೆ. ನಿಷ್ಕ್ರಿಯ ಪೂರ್ಣ-ಕೋಶದ ವ್ಯಾಕ್ಸಿನ್​ಗಿಂತ ಇದು ಭಿನ್ನವಾಗಿದ್ದು ವೈರಸ್​ನ ಆಂಟಿಜೆನಿಕ್ ಭಾಗಗಳು ಮಾತ್ರ ಅದರಲ್ಲಿವೆ. ಇದರಿಂದ ರೋಗನಿರೋಧಕ ಶಕ್ತಿಯ ಪ್ರಮಾಣ ಹೆಚ್ಚುತ್ತದೆ ಎಂದು ತಜ್ಞರು ಹೇಳಿದ್ದಾರೆ.

ಮೆಡಿಕಲ್ ಸರ್ಟಿಫಿಕೆಟ್ ಕಡ್ಡಾಯ: ಹಿರಿಯ ನಾಗರಿಕರು ಬೂಸ್ಟರ್ ಡೋಸ್ ಪಡೆಯಬೇಕಾದರೆ ವೈದ್ಯಕೀಯ ಪ್ರಮಾಣ ಪತ್ರ ಸಲ್ಲಿಸುವುದನ್ನು ಕೇಂದ್ರ ಸರ್ಕಾರ ಕಡ್ಡಾಯಗೊಳಿಸಿದೆ. ವೃದ್ಧರಲ್ಲಿರುವ ಅನ್ಯ-ವ್ಯಾಧಿಗಳನ್ನು ಸಾಬೀತುಪಡಿಸಲು ಸರ್ಟಿಫಿಕೆಟ್ ಅಗತ್ಯ ಎಂದು ರಾಷ್ಟ್ರೀಯ ಆರೋಗ್ಯ ಪ್ರಾಧಿಕಾರದ (ಎನ್​ಎಚ್​ಎ) ಮುಖ್ಯ ಕಾರ್ಯನಿರ್ವಹಣಾ ಅಧಿಕಾರಿ ಆರ್.ಎಸ್. ಶರ್ಮಾ ತಿಳಿಸಿದ್ದಾರೆ. 20 ಅನ್ಯವ್ಯಾಧಿಗಳ ಪಟ್ಟಿಯನ್ನು ಬಿಡುಗಡೆ ಮಾಡಲು ಸರ್ಕಾರ ನಿರ್ಧರಿಸಿದೆ. 45-59 ವಯಸ್ಸಿನವರಿಗೆ ಲಸಿಕೆ ಅಭಿಯಾನದ ಆರಂಭದಲ್ಲಿ ಅನ್ಯವ್ಯಾಧಿಗಳ ಒಂದು ಪಟ್ಟಿ ಬಿಡುಗಡೆ ಮಾಡಲಾಗಿತ್ತು. ಈಗಲೂ ಪ್ರಕ್ರಿಯೆ ಅದೇ ಆಗಿರಲಿದ್ದು ಈ ಬಾರಿ ವಯೋಗುಂಪು ಮಾತ್ರ ಭಿನ್ನವಾಗಿರುತ್ತದೆ ಎಂದು ಶರ್ಮಾ ಹೇಳಿದ್ದಾರೆ.

58 ಕೋಟಿ ಡೋಸ್ ಖರೀದಿ: ಮಕ್ಕಳಿಗೆ ಲಸಿಕೆ ನೀಡಲು ಹಾಗೂ ಕೆಲವು ನಿರ್ದಿಷ್ಟ ವಯಸ್ಕ ವಿಭಾಗಗಳಿಗೆ ಬೂಸ್ಟರ್ ಡೋಸ್ ಲಸಿಕೆ ಹಾಕಲು ಸಜ್ಜಾಗಿರುವ ಭಾರತ, ಈ ಗುರಿ ಸಾಧಿಸಲು 50 ಕೋಟಿ ಡೋಸ್ ವ್ಯಾಕ್ಸಿನ್ ಖರೀದಿಸುವ ಸಾಧ್ಯತೆಯಿದೆ. ಲಸಿಕೆ ಜಾಲ ಕೊವ್ಯಾಕ್ಸ್ ನಿಂದ ಭಾರತ 20 ಕೋಟಿ ಡೋಸ್ ಲಸಿಕೆ ಪಡೆಯುವ ಸಾಧ್ಯತೆಯಿದೆ.

ಫ್ರಾನ್ಸ್​ನಲ್ಲಿ ಲಕ್ಷ ಕೇಸ್: ಫ್ರಾನ್​ನಲ್ಲಿ ಕರೊನಾ ಸೋಂಕಿನ 1,04,611 ದೈನಿಕ ಪ್ರಕರಣಗಳು ಪತ್ತೆಯಾ ಗಿದ್ದು ವ್ಯಾಧಿ ಸ್ಪೋಟಗೊಂಡಾಗಿನಿಂದ ದಾಖಲಾದ ಅತಿ ಹೆಚ್ಚಿನ ದೈನಿಕ ಕೇಸ್ ಆಗಿದೆ. ಇದರೊಂದಿಗೆ ದೇಶದಲ್ಲಿ ವ್ಯಾಧಿಪೀಡಿತರ ಸಂಖ್ಯೆ 90,88,371ಕ್ಕೆ ಏರಿದೆ. ಸದ್ಯಕ್ಕೆ 16,162 ರೋಗಿಗಳು ಆಸ್ಪತ್ರೆಗೆ ದಾಖಲಾಗಿದ್ದು ಆ ಪೈಕಿ 3,282 ಜನರು ಐಸಿಯುನಲ್ಲಿದ್ದಾರೆ ಎಂದು ಫ್ರೆಂಚ್ ಸಾರ್ವಜನಿಕ ಆರೋಗ್ಯ ಸಂಸ್ಥೆ ತಿಳಿಸಿದೆ. 84 ಜನರು ಹೊಸದಾಗಿ ರೋಗಕ್ಕೆ ಬಲಿಯಾಗಿದ್ದು ಮೃತರ ಸಂಖ್ಯೆ 1,22,546ಕ್ಕೆ ತಲುಪಿದೆ. ಒಮಿಕ್ರಾನ್ ರೂಪಾಂತರಿ ವೇಗವಾಗಿ ಹರಡುತ್ತಿರುವ ಹಿನ್ನೆಲೆಯಲ್ಲಿ ಕಠಿಣ ಮುಂಜಾಗೃತಾ ಕ್ರಮಗಳನ್ನು ಕೈಗೊಳ್ಳುವಂತೆ ಫ್ರೆಂಚ್ ವೈಜ್ಞಾನಿಕ ಮಂಡಳಿಯು ಗುರುವಾರ ಸರ್ಕಾರಕ್ಕೆ ಸಲಹೆ ಮಾಡಿತ್ತು.

• 7.4 ಕೋಟಿ: ಲಸಿಕೆ ಪಡೆಯ ಲಿರುವ 15-18 ವಯೋಮಿತಿಯ ಮಕ್ಕಳ ಸಂಖ್ಯೆ
• 20 ಕೋಟಿ: ಆರೋಗ್ಯಸೇವೆ, ಮುಂಚೂಣಿ ಕಾರ್ಯಕರ್ತರು ಮತ್ತು ಅನ್ಯವ್ಯಾಧಿಯುಳ್ಳ 60 ವರ್ಷ ಮೇಲ್ಪಟ್ಟ ಜನರು 

ತಿಂಗಳ ಕಾಲ ಇರುತ್ತೆ ವೈರಸ್: ಇಡೀ ದೇಹವನ್ನು ಸಂಚರಿಸಿದ ನಂತರ ಕರೊನಾ ವೈರಸ್ ಹಲವು ತಿಂಗಳ ಕಾಲ ದೇಹದಲ್ಲಿ ಇರಬಲ್ಲದು ಎಂದು ಅಮೆರಿಕದ ರಾಷ್ಟ್ರೀಯ ಆರೋಗ್ಯ ಸಂಸ್ಥೆಯ ವಿಜ್ಞಾನಿಗಳು ಹೇಳಿದ್ದಾರೆ. ವೈರಸ್ ಸೋಂಕಿದ ಕೆಲವೇ ದಿನಗಳಲ್ಲಿ ಅದು ಉಸಿರಾಟದ ಮಾರ್ಗದ ಮೂಲಕ ಹೃದಯ, ಮಿದುಳು ಮತ್ತು ದೇಹದ ಪ್ರತಿ ಅಂಗಕ್ಕೆ ಹರಡಬಹುದು ಎಂದು ಅವರು ತಿಳಿಸಿದ್ದಾರೆ.

422ಕ್ಕೇರಿದ ಒಮಿಕ್ರಾನ್ ಪ್ರಕರಣ: ವೇಗವಾಗಿ ಹರಡುವ ಕರೊನಾ ವೈರಸ್​ನ ಒಮಿಕ್ರಾನ್ ಪ್ರಭೇದದ ಪ್ರಕರಣಗಳ ಸಂಖ್ಯೆ ಭಾರತದಲ್ಲಿ 422ಕ್ಕೆ ಏರಿದೆ. ಮಹಾರಾಷ್ಟ್ರದಲ್ಲೇ ಅತಿ ಹೆಚ್ಚು, 108 ಒಮಿಕ್ರಾನ್ ಸೋಂಕಿತರಿದ್ದಾರೆ.

https://www.vijayavani.net/twist-to-rti-activist-arrest-case-talk-with-woman-officer-went-viral/

https://www.vijayavani.net/person-shot-himself-with-pistol-and-lost-life/