ಹೈಕಮಾಂಡ್ ಸೂಚನೆ: ಬೆಳಗಾವಿ ಲೋಕಸಭಾ ಚುನಾವಣೆಯಲ್ಲಿ ಪ್ರಯಾಸದ ಗೆಲುವು, ಹಾನಗಲ್- ಮಸ್ಕಿ ಸೋಲು, ಮೇಲ್ಮನೆ ಚುನಾವಣೆಯಲ್ಲಿ ನಿರೀಕ್ಷಿಸಿದಷ್ಟು ಸ್ಥಾನಗಳನ್ನು ಗೆಲ್ಲದಿರುವುದು, ಸ್ಥಳೀಯ ಸಂಸ್ಥೆಗಳ ಚುನಾವಣೆಯಲ್ಲಿ ಅಧಿಕಾರದಲ್ಲಿದ್ದು ಎರಡನೇ ಸ್ಥಾನದಲ್ಲಿರುವುದು ವರಿಷ್ಠರ ಕೆಂಗಣ್ಣಿಗೆ ರಾಜ್ಯ ಘಟಕ ತುತ್ತಾಗಿದೆ. ಆದ್ದರಿಂದಲೇ ಹೈಕಮಾಂಡ್ನಿಂದ ಮುಂದಿನ ಚುನಾವಣೆಗೆ ಸಜ್ಜಾಗಲು ಏನೇನು ಮಾಡಬೇಕೆಂಬ ಬಗ್ಗೆ ಕೆಲವೊಂದು ಸಲಹೆ ಸೂಚನೆ ಬಂದಿವೆ ಎಂದು ಮೂಲಗಳು ತಿಳಿಸಿವೆ. ಪ್ರತಿ ಮತಗಟ್ಟೆಗೆ ಶಕ್ತಿ ಕೇಂದ್ರದ ಪ್ರಮುಖರು ಭೇಟಿ ನೀಡಬೇಕು. ವಾರಕ್ಕೆರಡು ದಿನ ಈ ಭೇಟಿ ಇರಬೇಕು. ಆ ಸಂದರ್ಭದಲ್ಲಿ ಮತದಾರರನ್ನು ಭೇಟಿಯಾಗಬೇಕು. ಮಂಡಲ ಮಟ್ಟದಲ್ಲಿ ನಿರಂತರವಾಗಿ ವಿಸõತ ಸಭೆ ನಡೆಸಬೇಕು. ಪ್ರತಿ ಮತಗಟ್ಟೆಯಲ್ಲಿ ಪಕ್ಷ ಸಶಕ್ತಿಕರಣವಾಗಬೇಕು. ಪರಿಶಿಷ್ಟ ಜಾತಿ- ಪಂಗಡ, ಹಿಂದುಳಿದ ಮತದಾರನ್ನು ಸೆಳೆಯಲು ತಳಹಂತದಲ್ಲಿ ಕಾರ್ಯಕ್ರಮ ರೂಪಿಸಬೇಕು. ಸಹಕಾರ ಸಂಘಗಳ ಪದಾಧಿಕಾರಿಗಳು, ಸ್ವಸಹಾಯ ಗುಂಪುಗಳ ಸದಸ್ಯರು, ಸ್ತ್ರೀಶಕ್ತಿ ಸಂಘಗಳ ಮುಖಂಡರನ್ನು ಬಿಜೆಪಿಗೆ ಸೇರಿಸಬೇಕು. ಬೇರೆ ಪಕ್ಷದವನ್ನು ಅದರಲ್ಲೂ ಸೋತವರನ್ನು ಸೆಳೆಯಲು ಯತ್ನಿಸಬೇಕು. ಪ್ರತಿ ಮತಗಟ್ಟೆಯಲ್ಲಿ ಬಿಜೆಪಿ ಸಾಧನೆಗಳ ಪರಿಚಯದ ಗೋಡೆ ಬರಹ, ಭಿತ್ತಿಪತ್ರ ಹಾಕಬೇಕು. ಪೆೇಜ್ ಪ್ರಮುಖರ ನೇಮಕ, ಕಾಂಗ್ರೆಸ್ ವಿರುದ್ಧ ಚಾರ್ಜ್ಶೀಟ್ ಸಿದ್ದಪಡಿಸಿ ಮನೆಮನೆಗೆ ಹಂಚಬೇಕೆಂಬ ಸೂಚನೆಗಳಿವೆ. ಈ ಬಗ್ಗೆ ಪಕ್ಷದಲ್ಲಿಯೂ ಚರ್ಚೆಯಾಗಿದೆ. ಫೆಬ್ರವರಿಯಿಂದ ಹಂತಹಂತವಾಗಿ ಜಾರಿಯಾಗುತ್ತವೆ ಎಂದು ಮೂಲಗಳು ಖಚಿತಪಡಿಸಿವೆ.
