ಭಾರತವು ರಷ್ಯಾದಿಂದ ಶಸ್ತ್ರಾಸ್ತ್ರ ಮತ್ತು ಕಚ್ಚಾ ತೈಲ ಖರೀದಿಸುತ್ತಿರುವುದಕ್ಕಾಗಿ ಒಂದಿಷ್ಟು ದಂಡವನ್ನೂ ತೆರಬೇಕಿದೆ ಎಂದು ಟ್ರಂಪ್ ಹೇಳಿದ್ದಾರೆ. ಯುರೋಪಿಯನ್ ಒಕ್ಕೂಟ (ಇಯು) ಮತ್ತು ಅಮೆರಿಕ ಭಾರತವನ್ನು ಆರ್ಥಿಕ ರಂಗದಲ್ಲಿ ಕಟ್ಟಿಹಾಕಲು ಹವಣಿಸುತ್ತಿದ್ದು, ಆ ನಿಟ್ಟಿನಲ್ಲಿ ವಿವೇಚನಾರಹಿತ ಕ್ರಮಗಳನ್ನು ಕೈಗೊಳ್ಳುತ್ತಿವೆ. ಅಷ್ಟಕ್ಕೂ, ಭಾರತ ಯಾವ ರಾಷ್ಟ್ರದಿಂದ ಸರಕುಗಳನ್ನು ಖರೀದಿಸಬೇಕು, ಯಾರೊಂದಿಗೆ ಖರೀದಿಸಬಾರದು ಎಂದು ನಿರ್ಧರಿಸುವ ಅಥವಾ ಆ ಬಗೆಯ ಒತ್ತಡ ಹೇರುವ ಯಾವುದೇ ಹಕ್ಕು ಅಮೆರಿಕಕ್ಕೆ ಇಲ್ಲ. ಎಲ್ಲ ರಂಗಗಳಲ್ಲೂ ಸುಧಾರಣೆಯ ಮಹತ್ವದ ಹೆಜ್ಜೆಗಳನ್ನು ಇರಿಸಿರುವ ಭಾರತ ವ್ಯಾಪಾರ, ಹೂಡಿಕೆ ರಂಗದಲ್ಲಿ ಮಹತ್ವದ ದೇಶಗಳೊಂದಿಗೆ ಮುಕ್ತ ವ್ಯಾಪಾರ ಒಪ್ಪಂದ ಮಾಡಿಕೊಂಡಿದೆ. ಮಾತ್ರವಲ್ಲ, ಅಮೆರಿಕದಲ್ಲೂ ಅಲ್ಲಿನ ಬೆಳವಣಿಗೆಗೆ ಭಾರತೀಯ ಮೂಲದವರು ಮಹತ್ವದ ಕೊಡುಗೆ ನೀಡುತ್ತಿರುವುದನ್ನು ಟ್ರಂಪ್ ಮರೆತಂತಿದೆ.
