ಮಾಸ್ಕೊ: ರಷ್ಯಾ ಅಧ್ಯಕ್ಷ ವ್ಲಾದಿಮಿರ್ ಪುತಿನ್ ಅವರ ಆಡಳಿತ ಮುಂದುವರಿಕೆಗೆ ಮೂರನೇ ಎರಡಂಶದ ಬಹುಮತ ಪ್ರಾಪ್ತಿಯಾಗುವ ಸಾಧ್ಯತೆ ದಟ್ಟವಾಗಿದೆ. 2024ರ ಅಧ್ಯಕ್ಷೀಯ ಚುನಾವಣೆಯಲ್ಲಿ ಗೆಲ್ಲುವುದಕ್ಕೆ ಸಂಸದೀಯ ಚುನಾವಣೆಯಲ್ಲಿ ಬಹುಮತ ಪಡೆಯುವುದು ಅವಶ್ಯ. ಸೆ.17ರಿಂದ 19ರ ತನಕ ನಡೆದ ಸಂಸದೀಯ ಚುನಾವಣೆಯ ಮತ ಎಣಿಕೆ ಸೋಮವಾರ ಆರಂಭವಾಗಿದೆ. ವರದಿ ಪ್ರಕಾರ, ಶೇಕಡ 85 ಮತ ಎಣಿಕೆ ಪೂರ್ಣಗೊಂಡಿದೆ. ಯುನೈಟೆಡ್ ರಷ್ಯಾ ಪಾರ್ಟಿಗೆ ಮೂರನೇ ಎರಡಂಶದ ಬಹುಮತ ಸಿಗುವುದು ಖಾತರಿಯಾಗಿದೆ. 225 ಸಂಸತ್ ಸ್ಥಾನಗಳಿಗೆ ನಡೆದ ಚುನಾವಣೆಯು 2024 ಅಧ್ಯಕ್ಷೀಯ ಚುನಾವಣೆಗೆ ಅಧ್ಯಕ್ಷ ಪುತಿನ್ ಅವರನ್ನು ಅಭ್ಯರ್ಥಿತನವನ್ನು ಬಲಪಡಿಸುವ ವೇದಿಕೆಯಂತೆಯೇ ಭಾಸವಾಗಿತ್ತು. ಸದ್ಯದ ಫಲಿತಾಂಶ ಪ್ರಕಾರ, ಶೇಕಡ 85 ಮತ ಎಣಿಕೆ ಪೂರ್ಣಗೊಂಡಿದ್ದು, ಯುನೈಟೆಡ್ ರಷ್ಯಾ ಪಾರ್ಟಿಗೆ 49.7% ಮತಗಳು ಸಿಕ್ಕಿವೆ. ಇದು 225 ಸ್ಥಾನಗಳಿಗೆ ಪಕ್ಷ ಆಯ್ಕೆ ಮಾಡಿದ ಅಭ್ಯರ್ಥಿಗಳ ಭವಿಷ್ಯವನ್ನು ನಿರ್ಣಯಿಸಲಿವೆ. ಇನ್ನೊಂದೆಡೆ 225 ಸ್ಥಾನಗಳಿಗೆ ವೈಯಕ್ತಿಕ ಸ್ಪರ್ಧೆ ನಡೆದಿದ್ದು, ಇದರಲ್ಲಿ ಯುನೈಟೆಡ್ ರಷ್ಯಾ ಪಾರ್ಟಿಯ 195 ಅಭ್ಯರ್ಥಿಗಳು ಮುಂಚೂಣಿಯಲ್ಲಿದ್ದಾರೆ. ಇದು ಏಕ ಕ್ಷೇತ್ರಕ್ಕೆ ಸಂಬಂಧಿಸಿದ್ದು ಎಂದು ಕೇಂದ್ರೀಯ ಚುನಾವಣಾ ಆಯೋಗ ತಿಳಿಸಿದೆ.
