ನಮ್ಮ ಪೂರ್ವಜರ ಕಾಲದಿಂದಲೂ ಭಗವದ್ಗೀತೆ ಯನ್ನು ಸ್ವತಂತ್ರಶಾಸ್ತ್ರ ಗ್ರಂಥವೆಂದೇ ಪರಿಗಣಿಸಲಾಗಿದೆ. ಶಂಕರಾಚಾರ್ಯರು ಹೇಳುವಂತೆ ಇದು ಸಮಸ್ತ ವೇದಾರ್ಥಸಾರ ಸಂಗ್ರಹ. ಭಗವದ್ಗೀತೆಯು ಉಪನಿಷತ್ತುಗಳು ಹೇಳುವ ವಿಚಾರವನ್ನೇ ತಿಳಿಯಾಗಿ, ಎಲ್ಲರಿಗೂ ಮನದಟ್ಟಾಗುವಂತೆ ತಿಳಿಸುತ್ತದೆ. ವಿದ್ವಾಂಸರೊಬ್ಬರ ಅಭಿಪ್ರಾಯದಂತೆ, ‘ಉಪನಿಷತ್ತುಗಳು ಹಸುಗಳ ರೂಪವಾದರೆ, ಭಗವದ್ಗೀತೆಯು ಅದರಿಂದ ಕರೆದುಕೊಂಡ ಹಾಲಿನಂತೆ’. ಮೊದಲೇ ಹೇಳಿದಂತೆ, ಗೀತೆಯು ಮನುಷ್ಯನ ಶೋಕ, ದುಃಖವನ್ನು ನಿವಾರಣೆ ಮಾಡುತ್ತದೆ. ಇದೇ ಗೀತೆಯ ಮುಖ್ಯ ಉದ್ದೇಶ. ಗೀತೆಯ ಅರ್ಥವನ್ನು ಸರಿಯಾಗಿ ಮನವರಿಕೆ ಮಾಡಿಕೊಂಡಾಗ, ಅದನ್ನೇ ಮನಸ್ಸಿನಲ್ಲಿ ಮೆಲುಕು ಹಾಕಿದಾಗ, ನಮ್ಮ ನಮ್ಮ ಅನುಭವದಲ್ಲಿ ಅದನ್ನು ಒಳಹೊಕ್ಕು ನೋಡಿದಾಗ, ಅದರಲ್ಲಿರುವ ಸೂಚನೆಗಳನ್ನು ಬದುಕಿನಲ್ಲಿ ಪ್ರಯೋಗಿಸಲು ಪ್ರಯತ್ನಿಸಿದಾಗ ಗೀತೆಯ ಮಹತ್ವ ನಮ್ಮ ಅರಿವಿಗೆ ಬರುತ್ತದೆ. ಗೊಂದಲಗಳು, ಸಂದೇಹಗಳು ದೂರವಾಗಿ ಬದುಕಿನಲ್ಲಿ ಸಾಗಬೇಕಾದ ದಾರಿಯ ಬಗ್ಗೆ ಸ್ಪಷ್ಟತೆ ಸಿಗುತ್ತದೆ.
