ಫೇಸ್​ಬುಕ್​ ಲೈವ್​ನಲ್ಲಿ ಬೈಕ್​ ರೈಡ್​ ಮಾಡುತ್ತಾ ಕೆಳಗೆ ಬಿದ್ದ ಯುವಕ ದಾರುಣ ಸಾವು

ಕೋಲ್ಕತ: ಫೇಸ್​ಬುಕ್​ನಲ್ಲಿ ಲೈವ್​ ವಿಡಿಯೋ ಮಾಡಿಕೊಂಡು ಬೈಕ್​ ಸವಾರಿ ಮಾಡುತ್ತಿದ್ದ 24 ವರ್ಷದ ಯುವಕನೊಬ್ಬ ನಿಯಂತ್ರಣ ತಪ್ಪಿ ಕೆಳಗೆ ಬಿದ್ದು ದಾರುಣವಾಗಿ ಸಾವಿಗೀಡಾಗಿರುವ ಘಟನೆ ಪಶ್ಚಿಮ ಬಂಗಾಳದ ಪಶ್ಚಿಮ ಬುರ್ದ್ವಾನ್​ ಜಿಲ್ಲೆಯ ಅಂದಾಲ್​ ಪಟ್ಟಣದಲ್ಲಿ ನಡೆದಿದೆ.

ಚಂಚಲ್​ ಧಿಬೊರ್​ ಮೃತ ದುರ್ದೈವಿ. ತಲೆಗೆ ಬಲವಾದ ಪೆಟ್ಟು ಬಿದ್ದಿದ್ದ ಧಿಬೊರ್​ನನ್ನು ಖಾಸಗಿ ಆಸ್ಪತ್ರೆಗೆ ದಾಖಲಿಸಿದಾದರೂ ಚಿಕಿತ್ಸೆ ಫಲಕಾರಿಯಾಗದೆ ಶನಿವಾರ ರಾತ್ರಿ ಸಾವಿಗೀಡಾಗಿದ್ದಾನೆ.

ಮೃತ ಧಿಬೊರ್​ ಕುಟುಂಬದ ಪ್ರಕಾರ ಶನಿವಾರ ಸಂಜೆ ಕಾಳಿ ದೇವಸ್ಥಾನದಲ್ಲಿ ಪ್ರಾರ್ಥನೆ ಮುಗಿಸಿ ಉಖ್ರಾದ ಧಿಬೊರ್ಪರಾದಲ್ಲಿರುವ ತನ್ನ ಮನೆಗೆ ಹಿಂದಿರುಗುವಾಗ ಘಟನೆ ಸಂಭವಿಸಿದೆ.

ಅಪಘಾತಕ್ಕೂ ಮುನ್ನ ಬೈಕ್​ ರೈಡ್​ ಮಾಡುತ್ತಾ ಫೇಸ್​ಬುಕ್​ ಲೈವ್​ನಲ್ಲಿದ್ದ. ಆ ಸಮಯದಲ್ಲಿ ಬೈಕ್ ಮೇಲಿನ ಗಮನವನ್ನು ಕಳೆದುಕೊಂಡು ನಿಯಂತ್ರಣ ತಪ್ಪಿ ಕೆಳಗೆ ಬಿದ್ದಿದ್ದಾನೆ. ತಲೆಗೆ ತೀವ್ರವಾದ ಪೆಟ್ಟುಬಿದ್ದು ಚಿಕಿತ್ಸೆ ಫಲಿಸದೆ ಮೃತಪಟ್ಟಿದ್ದಾನೆ ಎಂದು ಕುಟುಂಬ ಸದಸ್ಯರು ಮಾಹಿತಿ ನೀಡಿದ್ದಾರೆ. (ಏಜೆನ್ಸೀಸ್​)