ಯಾದಗಿರಿ ಜಿಲ್ಲೆ ಸುರಪುರ ತಾಲೂಕಿನ ಕೂಡಲಗಿ ಗ್ರಾಮದ ಸದ್ಗುರು ಶ್ರೀ ಶಾಂತಾನಂದ ಸರಸ್ವತಿ (ಬಾಬಾ ಮಹಾರಾಜ್) ಮಠದಲ್ಲಿ ಏಕಶಿಲೆಯಲ್ಲಿ ಹೆಸರೇ ಸೂಚಿಸುವಂತೆ ಒಡಮೂಡಿದ ಸ್ವಯಂಭೂ ಸಿದ್ಧಿ ವಿನಾಯಕ ಅಸಂಖ್ಯ ಭಕ್ತರನ್ನು ಉದ್ಧರಿಸಿ, ಅವರ ಕಷ್ಟ-ಕಾರ್ಪಣ್ಯಗಳನ್ನು ನಿವಾರಣೆ ಮಾಡಿದ್ದಾನೆ. ವಿಶೇಷವಾಗಿ ಬಂಜೆತನ ನಿವಾರಣೆಗೆ ಪ್ರಸಿದ್ಧಿ ಪಡೆದ ದೇವಸ್ಥಾನ ಇದಾಗಿದ್ದು, ದೇಶದ ಮೂಲೆಮೂಲೆಗಳಿಂದ ಹಲವಾರು ಜನ ಇಲ್ಲಿಗೆ ಭೇಟಿ ನೀಡಿ ವಿನಾಯಕನಿಗೆ ವಿಶೇಷ ಪೂಜೆ ಸಲ್ಲಿಸುವ ಮೂಲಕ ಬಂಜೆತನ ಸಮಸ್ಯೆಗೆ ಶಾಶ್ವತ ಪರಿಹಾರ ಕಂಡುಕೊಂಡಿದ್ದಾರೆ. ಪ್ರತಿ ಸೋಮವಾರದ ವಿಶೇಷ ಪೂಜೆ ನಡೆಯುತ್ತದೆ. ಭಕ್ತಿಯಿಂದ ಬೇಡಿದ್ದನ್ನೆಲ್ಲ ಕೊಡುವ ಸ್ವಯಂಭೂ ಸಿದ್ಧಿ ವಿನಾಯಕ ಭಕ್ತರ ಪಾಲಿನ ಆರಾಧ್ಯದೈವ. ಈ ಮಠದಲ್ಲಿ ಶಾಂತಾನಂದ ಸರಸ್ವತಿಗಳ ಗದ್ದುಗೆ, ಶಿವ, ಅನ್ನಪೂರ್ಣೆಶ್ವರಿ ಹಾಗೂ ಸ್ವಯಂಭೂ ಸಿದ್ಧಿ ವಿನಾಯಕನ ದೇವಸ್ಥಾನವಿದ್ದು, ನಿತ್ಯ ಧಾರ್ವಿುಕ ವಿಧಿ-ವಿಧಾನದಂತೆ ಪೂಜಾಕೈಂಕರ್ಯ ನೆರವೇರುತ್ತದೆ. ದೇವಸ್ಥಾನಕ್ಕೆ ಬರುವ ಭಕ್ತರಿಗೆ ಅನ್ನದಾಸೋಹ ಜತೆಗೆ ಭಕ್ತಿ, ಜ್ಞಾನ, ವೈರಾಗ್ಯ ಕರುಣಿಸುವ ಶ್ರದ್ಧಾಕೇಂದ್ರವೆನಿಸಿದೆ. ಬೆಂಗಳೂರಿನಿಂದ 550 ಕಿ.ಮೀ. ಹಾಗೂ ಜಿಲ್ಲಾಕೇಂದ್ರ ಯಾದಗಿರಿಯಿಂದ 80 ಕಿ.ಮೀ. ದೂರದಲ್ಲಿದ್ದು, ಸುರಪುರ, ಕೆಂಭಾವಿಯಿಂದ ಬಸ್ ಹಾಗೂ ಖಾಸಗಿ ವಾಹನಗಳ ಸೌಕರ್ಯವಿದೆ.
