ಬೆಂಗಳೂರು: ವಿಶ್ವಸಂಸ್ಥೆಯ ಶೈಕ್ಷಣಿಕ, ವೈಜ್ಞಾನಿಕ ಮತ್ತು ಸಾಂಸ್ಕೃತಿಕ ಸಂಸ್ಥೆ (ಯುನೆಸ್ಕೋ ) ವಿಶ್ವ ಪರಂಪರೆ ಸಮಿತಿಯ ವಿಸ್ತೃತ 45ನೇ ಸಭೆ ರಿಯಾದ್ನಲ್ಲಿ (ಸೌದಿ ಅರೇಬಿಯಾ) ಸೆಪ್ಟೆಂಬರ್ 10 ಆರಂಭವಾಗಿದ್ದು, 25ರವರೆಗೆ ನಡೆಯುತ್ತಿದೆ.
ವಿಶ್ವಪಾರಂಪರಿಕ ತಾಣದ ಪಟ್ಟಿಗೆ ಹೊಸ ತಾಣಗಳನ್ನು ಪರಿಗಣಿಸುವ ಸಂಬಂಧ ಸೆ.16ರಿಂದ ನಾಮನಿರ್ದೇಶನ, ಚರ್ಚಾ ಪ್ರಕ್ರಿಯೆ ಆರಂಭವಾಗಿದೆ. ಮಾಹಿತಿಗಳ ಪ್ರಕಾರ ಭಾನುವಾರ ಪಶ್ಚಿಮ ಬಂಗಾಳದ ಶಾಂತಿನಿಕೇತನವನ್ನು ವಿಶ್ವಪಾರಂಪರಿಕ ತಾಣವೆಂದು ಪರಿಗಣಿಸುವ ಬಗ್ಗೆ ಚರ್ಚೆಗಳು ನಡೆದಿವೆ.
ನೊಬೆಲ್ ಪ್ರಶಸ್ತಿ ವಿಜೇತ ರವೀಂದ್ರನಾಥ ಟ್ಯಾಗೋರ್ ತಮ್ಮ ಜೀವನದ ಬಹುಭಾಗವನ್ನು ಕಳೆದ ಪಶ್ಚಿಮ ಬಂಗಾಳದ ಬಿರ್ಭುಮ್ ಜಿಲ್ಲೆಯ ಶಾಂತಿನಿಕೇತನವನ್ನು ಯುನೆಸ್ಕೋ ವಿಶ್ವ ಪರಂಪರೆಯ ಪಟ್ಟಿಯಲ್ಲಿ ಸೇರಿಸುವ ಬಗ್ಗೆ ಪ್ರಸ್ತಾವನೆ ಸಲ್ಲಿಕೆಯಾಗಿತ್ತು.
ಅದೇ ರೀತಿ ಸೆ.18ರಂದು ಭಾರತದ ಹೊಯ್ಸಳರ ಪ್ರಮುಖ ಸ್ಥಳಗಳ ಕುರಿತು ಚರ್ಚೆಯಾಗಲಿದೆ. ಯುನೆಸ್ಕೋ ಸಭೆಯ ಅಜೆಂಡಾದಲ್ಲಿ ಹೊಯ್ಸಳರ ಪ್ರಮುಖ ಸ್ಥಳಗಳ ಕುರಿತು ವಿಚಾರ ಮಂಡನೆಯಾಗಲಿದೆ. ಪ್ರಮುಖವಾಗಿ ಹಾಸನ ಜಿಲ್ಲೆ ಬೇಲೂರು ಹಾಗೂ ಹಳೆಬೀಡಿನ ಕುರಿತು ಪ್ರಸ್ತಾಪವಾಗುವ ಸಾಧ್ಯತೆ ಇದೆ.
ಒಟ್ಟಾರೆ ಈ ಬಾರಿಯ ಸಭೆಗೆ 50 ಸ್ಥಳ ಅಥವಾ ಪ್ರದೇಶ, ಕಟ್ಟಡಗಳು ನಾಮನಿರ್ದೇಶನಗೊಂಡಿವೆ. ಇದರಲ್ಲಿ 34 ಸಾಂಸ್ಕೃತಿಕ ಸ್ಥಳಗಳು, 9 ಪ್ರಾಕೃತಿಕ ಹಾಗೂ 2 ಸಮಗ್ರ ಮತ್ತು 5 ಗಡಿಗಳ ಮಾರ್ಪಾಡು ಸಂಬಂಧ ಪ್ರಸ್ತಾವನೆಗಳಿವೆ.
