ವಿದೇಶಿ ಹೂಡಿಕೆ ಹೆಚ್ಚಳದಿಂದ ಕರಡಿ ಕುಣಿತ: ಮತ್ತೆ ಸಾರ್ವಕಾಲಿಕ ಗರಿಷ್ಠ ಮಟ್ಟ ಮುಟ್ಟಿದ ಸೂಚ್ಯಂಕ

ಮುಂಬೈ: ವಿದೇಶಿ ಬಂಡವಾಳದ ಒಳಹರಿವಿನ ಇತ್ತೀಚಿನ ಏರಿಕೆಯ ನಡುವೆ ಮಾರುಕಟ್ಟೆಯ ಪ್ರಮುಖ ಷೇರುಗಳಾದ ರಿಲಯನ್ಸ್, ಐಸಿಐಸಿಐ ಬ್ಯಾಂಕ್ ಮತ್ತು ಎಚ್‌ಡಿಎಫ್‌ಸಿ ಬ್ಯಾಂಕ್‌ಗಳ ತೀವ್ರ ಖರೀದಿಯಿಂದ ಉತ್ತೇಜಿತವಾದ ಬೆಂಚ್‌ಮಾರ್ಕ್ ಈಕ್ವಿಟಿ ಸೂಚ್ಯಂಕಗಳು ಗುರುವಾರ ಹೊಸ ಜೀವಮಾನದ ಗರಿಷ್ಠ ಮಟ್ಟಕ್ಕೆ ಏರಿದವು.

30-ಷೇರುಗಳ ಬಿಎಸ್‌ಇ ಸೂಚ್ಯಂಕವು 141.34 ಅಂಕಗಳು ಅಥವಾ ಶೇ. 0.18 ರಷ್ಟು ಏರಿಕೆ ಕಂಡು 77,478.93 ಕ್ಕೆ ಸ್ಥಿರವಾಯಿತು. ದಿನದ ಅವಧಿಯಲ್ಲಿ, ಇದು 305.5 ಅಂಕಗಳು ಅಥವಾ ಶೇ. 0.39 ರಷ್ಟು ಏರಿಕೆಯಾಗಿ 77,643.09 ಕ್ಕೆ ತಲುಪಿತ್ತು. ಬಿಎಸ್‌ಇಯಲ್ಲಿ 2,282 ಸ್ಟಾಕ್‌ಗಳ ಬೆಲೆಗಳು ಏರಿಕೆ ಕಂಡರೆ, 1,571 ಷೇರುಗಳ ಬೆಲೆಗಳು ಕುಸಿತ ಕಂಡಿತು. 128 ಸ್ಟಾಕ್​ಗಳ ಬೆಲೆಗಳು ಬದಲಾಗದೆ ಉಳಿದವು.

ಎನ್‌ಎಸ್‌ಇ ನಿಫ್ಟಿ 50 ಸೂಚ್ಯಂಕಗಳು 51 ಅಂಕಗಳು ಅಥವಾ ಶೇಕಡಾ 0.22 ರಷ್ಟು ಏರಿಕೆಯಾಗಿ 23,567 ರ ಹೊಸ ಮುಕ್ತಾಯಕ್ಕೆ ಸ್ಥಿರವಾಯಿತು. ದಿನದ ವಹಿವಾಟಿನಲ್ಲಿ ಇದು 108 ಅಂಕಗಳು ಅಥವಾ ಶೇ. 0.45ರಷ್ಟು ಏರಿಕೆಯಾಗಿ 23,624 ಕ್ಕೆ ಮುಟ್ಟಿತ್ತು.

"ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು (ಎಫ್​ಐಐ) ಕಳೆದ ಮೂರು ದಿನಗಳಿಂದ ಭಾರತೀಯ ಷೇರುಗಳಲ್ಲಿ ನಿವ್ವಳ ಖರೀದಿದಾರರಾಗಿದ್ದು, 12,600 ಕೋಟಿ ರೂ.ಗಳ ಷೇರುಗಳನ್ನು ಖರೀದಿಸಿದ್ದಾರೆ, ಇದರಲ್ಲಿ ಕೆಲವು ದೊಡ್ಡ ಬ್ಲಾಕ್ ಡೀಲ್‌ಗಳು ಸೇರಿವೆ. ಬಲವಾದ ಎಫ್‌ಐಐ ಹರಿವುಗಳು ಮತ್ತು ಆರೋಗ್ಯಕರ ಮ್ಯಾಕ್ರೋಗಳ ನಡುವೆ ಮಾರುಕಟ್ಟೆಯು ಸಕಾರಾತ್ಮಕವಾಗಿ ಸಾಗುತ್ತಿದೆ. ಅಲ್ಲದೆ, ಬೆಳವಣಿಗೆಯು ಬಜೆಟ್‌ ನಿರೀಕ್ಷೆಯ ಭಾವನೆಗಳಿಗೆ ಸಹಾಯ ಮಾಡುತ್ತದೆ”ಎಂದು ಮೋತಿಲಾಲ್ ಓಸ್ವಾಲ್ ಫೈನಾನ್ಷಿಯಲ್ ಸರ್ವಿಸಸ್‌ನ ರಿಟೇಲ್ ರಿಸರ್ಚ್ ಮುಖ್ಯಸ್ಥ ಸಿದ್ಧಾರ್ಥ ಖೇಮ್ಕಾ ಹೇಳಿದ್ದಾರೆ.

ಪ್ರಮುಖ ಷೇರುಗಳಾದ ಜೆಎಸ್‌ಡಬ್ಲ್ಯೂ ಸ್ಟೀಲ್, ಟಾಟಾ ಸ್ಟೀಲ್, ಆಕ್ಸಿಸ್ ಬ್ಯಾಂಕ್, ರಿಲಯನ್ಸ್ ಇಂಡಸ್ಟ್ರೀಸ್, ಐಸಿಐಸಿಐ ಬ್ಯಾಂಕ್, ಹಿಂದೂಸ್ತಾನ್ ಯೂನಿಲಿವರ್, ಕೋಟಕ್ ಮಹೀಂದ್ರಾ ಬ್ಯಾಂಕ್ ಮತ್ತು ಏಷ್ಯನ್ ಪೇಂಟ್ಸ್ ಹೆಚ್ಚು ಲಾಭ ಗಳಿಸಿದವು. ಇದಕ್ಕೆ ವ್ಯತಿರಿಕ್ತವಾಗಿ, ಮಹೀಂದ್ರಾ ಆ್ಯಂಡ್​ ಮಹೀಂದ್ರಾ, ಸನ್ ಫಾರ್ಮಾ, ಎನ್‌ಟಿಪಿಸಿ, ವಿಪ್ರೋ, ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಮತ್ತು ಪವರ್ ಗ್ರಿಡ್ ಷೇರುಗಳು ಕುಸಿತ ದಾಖಲಿಸಿದವು.

ಬಿಎಸ್‌ಇ ಸ್ಮಾಲ್‌ಕ್ಯಾಪ್ ಸೂಚ್ಯಂಕ ಶೇ. 1ರಷ್ಟು ಏರಿಕೆ ಕಂಡರೆ, ಮಿಡ್‌ಕ್ಯಾಪ್ ಸೂಚ್ಯಂಕವು ಶೇಕಡಾ 0.55 ರಷ್ಟು ಹೆಚ್ಚಳವಾಯಿತು. ವಲಯವಾರು ಸೂಚ್ಯಂಕಗಳ ಪೈಕಿ, ರಿಯಾಲ್ಟಿ ಶೇ. 1.97, ಸರಕುಗಳು ಶೇ. 1.88, ಲೋಹವು ಶೇ. 1.87, ಇಂಧನವು ಶೇ. 0.90 ಮತ್ತು ಕೈಗಾರಿಕೆಗಳು (ಶೇ 0.50) ಏರಿಕೆ ಕಂಡವು. ದೂರಸಂಪರ್ಕ, ಉಪಯುಕ್ತತೆಗಳು, ಆಟೋ, ಪವರ್ ಮತ್ತು ಟೆಕ್ ವಲಯಗಳ ಷೇರುಗಳು ಕುಸಿತ ಕಂಡವು.

ಏಷ್ಯಾದ ಮಾರುಕಟ್ಟೆಗಳ ಪೈಕಿ, ಸಿಯೋಲ್ ಮತ್ತು ಟೋಕಿಯೊ ಲಾಭ ಕಂಡರೆ, ಶಾಂಘೈ ಮತ್ತು ಹಾಂಗ್ ಕಾಂಗ್ ಕುಸಿತ ದಾಖಲಿಸಿದವು. ಐರೋಪ್ಯ ಮಾರುಕಟ್ಟೆಗಳು ಸಕಾರಾತ್ಮಕವಾಗಿ ವಹಿವಾಟು ನಡೆಸಿದವು. ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು (ಎಫ್‌ಐಐ) ಬುಧವಾರ 7,908.36 ಕೋಟಿ ರೂಪಾಯಿ ಮೌಲ್ಯದ ಷೇರುಗಳನ್ನು ಖರೀದಿಸಿದ್ದಾರೆ ಎಂದು ವಿನಿಮಯ ಕೇಂದ್ರ ತಿಳಿಸಿದೆ.

ಬುಧವಾರದ ಸತತ ಐದನೇ ಏರಿಕೆಯಾಗಿದ್ದ ಬಿಎಸ್‌ಇ ಬೆಂಚ್‌ಮಾರ್ಕ್ ಸೂಚ್ಯಂಕ 36.45 ಅಂಕಗಳು ಅಥವಾ ಶೇಕಡಾ 0.05 ರಷ್ಟು ಹೆಚ್ಚಳವಾಗಿ 77,337.59 ಕ್ಕೆ ಸ್ಥಿರವಾಗಿತ್ತು. ನಿಫ್ಟಿ ಸೂಚ್ಯಂಕವು 41.90 ಅಂಕಗಳು ಅಥವಾ ಶೇ. 0.18 ರಷ್ಟು ಕುಸಿದು 23,516ಕ್ಕೆ ತಲುಪಿತ್ತು.

https://www.vijayavani.net/gst-council-meeting-on-june-22-consideration-of-several-concession-proposals

https://www.vijayavani.net/sebi-clears-ola-electric-mcure-pharma-ipos

https://www.vijayavani.net/permission-to-export-2000-white-rice-to-malawi-zimbabwe