ಮನುಷ್ಯರ ಕೂದಲು ರಫ್ತಿಗೆ ನಿಷೇಧ

ನವದೆಹಲಿ: ಪ್ರತಿ ಕಿಲೋಗೆ 65 ಡಾಲರ್​ಗಿಂತ (ಸುಮಾರು 5600 ರೂ.) ಕಡಿಮೆ ಬೆಲೆ ಹೊಂದಿರುವ ‘ಮನುಷ್ಯರ ಕಚ್ಚಾ ಕೂದಲ’ನ್ನು ವಿದೇಶಗಳಿಗೆ ರಫ್ತು ಮಾಡುವುದಕ್ಕೆ ಕೇಂದ್ರ ಸರ್ಕಾರ ಸೋಮವಾರ ನಿಷೇಧ ಹೇರಿದೆ. 2022ರ ಜನವರಿಯಲ್ಲಿ ಈ ರಫ್ತಿನ ಮೇಲೆ ನಿರ್ಬಂಧ ವಿಧಿಸಲಾಗಿತ್ತು. ಈಗ ನಿರ್ಬಂಧವನ್ನು ನಿಷೇಧವನ್ನಾಗಿ ಪರಿವರ್ತಿಸಲಾಗಿದೆ.

65 ಡಾಲರ್​ಗಿಂತ ಹೆಚ್ಚಿನ ಬೆಲೆ ಹೊಂದಿದ್ದರೆ ರಫ್ತಿಗೆ ಅನುಮತಿ ಇದೆ ಎಂದು ವಿದೇಶ ವ್ಯಾಪಾರ ಮಹಾನಿರ್ದೇಶನಾಲಯ (ಡಿಜಿಎಫ್​ಟಿ) ಅಧಿಸೂಚನೆಯಲ್ಲಿ ತಿಳಿಸಲಾಗಿದೆ. ಮಯನ್ಮಾರ್, ಚೀನಾ ಮುಂತಾದ ರಾಷ್ಟ್ರಗಳಿಗೆ ‘ಮನುಷ್ಯರ ಕೂದಲು’ ಕಳ್ಳಸಾಗಾಣಿಕೆ ಮಾಡಲಾಗುತ್ತಿದ್ದು, ಸ್ಥಳೀಯ ಕೈಗಾರಿಕೆಗಳಿಗೆ ಮತ್ತು ರಫ್ತಿಗೆ ಇದರಿಂದ ಧಕ್ಕೆ ಆಗುತ್ತಿದೆ ಎಂಬ ವರದಿಗಳ ಹಿನ್ನೆಲೆಯಲ್ಲಿ ಕೇಂದ್ರ ಸರ್ಕಾರ ಈ ಕ್ರಮ ಕೈಗೊಂಡಿದೆ.

ಭಾರತದಲ್ಲಿ ಆಂಧ್ರ, ತೆಲಂಗಾಣ, ತಮಿಳುನಾಡು, ಪಶ್ಚಿಮ ಬಂಗಾಳ ಈ ಉದ್ಯಮದಲ್ಲಿ ತೊಡಗಿಕೊಂಡಿವೆ. ಭಾರತಕ್ಕೆ ಈ ಕ್ಷೇತ್ರದಲ್ಲಿ ಚೀನಾ, ಕಾಂಬೋಡಿಯಾ, ವಿಯೆಟ್ನಾಂ, ಮಯನ್ಮಾರ್ ಪ್ರತಿಸ್ಪರ್ಧಿಗಳಾಗಿವೆ. ಮನೆ, ದೇವಸ್ಥಾನಗಳಿಂದ ಮನುಷ್ಯರ ಕೂದಲು ಸಂಗ್ರಹಿಸಿ ಜಾಗತಿಕ ಸೌಂದರ್ಯ ಮಾರುಕಟ್ಟೆಗೆ ವಿಗ್ ಮತ್ತಿತರ ವಸ್ತುಗಳನ್ನು ತಯಾರಿಸುವುದಕ್ಕಾಗಿ ಪೂರೈಸಲಾಗುತ್ತದೆ. ಏಪ್ರಿಲ್​ನಿಂದ ನವೆಂಬರ್​ವರೆಗೆ 123.96 ದಶಲಕ್ಷ ಡಾಲರ್ ಮೌಲ್ಯದ ಕೂದಲನ್ನು ರಫ್ತು ಮಾಡಲಾಗಿದೆ.