ಹಿಂದೆ ರಾಜರನ್ನು ಪ್ರಜೆಗಳು ದೇವರಂತೆ ಗೌರವಿಸುತ್ತಿದ್ದರು. ಅದಕ್ಕೆ ಕಾರಣ ರಾಜ ಯಾವುದೇ ಜಾತಿ, ಮತ, ಪಂಥ, ಪ್ರದೇಶ, ಭಾಷೆ, ಸಮುದಾಯ ಎಂಬ ಭೇದವಿಲ್ಲದೆ ಸರ್ವರನ್ನೂ ಸಮನಾಗಿ ಕಾಣುತ್ತಿದ್ದ. ರಾಜನಿಗೆ ಸರಿಯಾದ ಮಾರ್ಗದರ್ಶನ ಮಾಡಲು ರಾಜಗುರುಗಳು ಇರುತ್ತಿದ್ದರು. ಅಂತೆಯೇ ಯಡಿಯೂರಪ್ಪ ಕೂಡ ವಿರೋಧಿಗಳ ಟೀಕೆ ಟಿಪ್ಪಣಿಗಳು ಎಷ್ಟೇ ಬಂದರೂ ಧರ್ಮಗುರುಗಳ ಸಲಹೆ, ಮಾರ್ಗದರ್ಶನ ಪಡೆಯಲು ಮಠಗಳಿಗೆ ಹೋಗುತ್ತಾರೆ. ಜತೆಗೆ ಸರ್ಕಾರ ಮಾಡಬೇಕಾದ ಕೆಲಸವನ್ನು ಮಠಗಳು ಮಾಡುತ್ತಿವೆ ಎಂಬ ಕಾರಣಕ್ಕೆ ಅನುದಾನ ನೀಡಿದರು. ವಿಪರ್ಯಾಸವೆಂದರೆ ವಿರೋಧಿಸಿದವರೂ ಅನಿವಾರ್ಯವಾಗಿ ಯಡಿಯೂರಪ್ಪ ಆರಂಭಿಸಿದ ಸತ್ಸಂಪ್ರದಾಯವನ್ನು ತಮ್ಮ ಸರ್ಕಾರದ ಅವಧಿಯಲ್ಲೂ ಮುಂದುವರಿಸಬೇಕಾಯಿತು. ಬಿಎಸ್ವೈ ಹುಟ್ಟಿನಿಂದ ವೀರಶೈವ ಸಮಾಜದವರಾದರೂ ಆ ಕಾಲದಿಂದ ಇವರ ಆಪ್ತ ವಲಯದಲ್ಲಿ ಇತರ ಸಮುದಾಯದವರೇ ಹೆಚ್ಚಿನ ಸಂಖ್ಯೆಯಲ್ಲಿದ್ದಾರೆ. ತಮ್ಮನ್ನು ನಂಬಿರುವ ಯಾವುದೇ ಸಮುದಾಯದ ಬೆಂಬಲಿಗರಿದ್ದರೂ ಅವರಿಗೆ ಸ್ಥಾನ ನೀಡಿದ ದೊಡ್ಡತನ ಬಿಎಸ್ವೈ ಅವರದ್ದು. ಇತ್ತೀಚೆಗೆ ನಡೆದ ಆಪರೇಷನ್ ಕಮಲದಲ್ಲಿ ರಾಜೀನಾಮೆ ನೀಡಿದ 17 ಶಾಸಕರಲ್ಲಿ ಮೂವರು ಮಾತ್ರ ವೀರಶೈವರು. ಉಪಚುನಾವಣೆಯಲ್ಲಿ ಗೆದ್ದ 12 ಜನರಲ್ಲಿ ಓರ್ವ ವೀರಶೈವ ಶಾಸಕನಿಗೆ ಮಾತ್ರ ಸಚಿವ ಸ್ಥಾನ ನೀಡಿ, ಇನ್ನುಳಿದ 10 ಜನ ಇತರ ಸಮುದಾಯಗಳ ನಾಯಕರನ್ನು ಸಚಿವರನ್ನಾಗಿ ಮಾಡಿ ರಾಜಧರ್ಮ ಪರಿಪಾಲಿಸಿದ್ದಾರೆ. ಆಡಳಿತ, ರಾಜಕೀಯದಲ್ಲಿ ಯಾವುದೇ ಪಕ್ಷಪಾತ, ಜಾತಿವಾದ ಅನುಸರಿಸದೆ ಇರುವುದರಿಂದಲೇ ಸರ್ವಧರ್ಮ ನಾಯಕ ಎನಿಸಿಕೊಂಡಿದ್ದಾರೆ.
