ಅಲರ್ಜಿ, ಅಸ್ತಮಾ, ಕೆಮ್ಮು, ಸೈನಸ್ ಸಮಸ್ಯೆಗಳು ಆನುವಂಶೀಯವಾಗಿ ಬರುತ್ತವಾದರೂ ಬಹುತೇಕ ಸಲ ಜೀವನಶೈಲಿಯೇ ಮುಖ್ಯ ಕಾರಣ. ಹಾಗಾಗಿ ಅಸ್ತಮಾ ಹತೋಟಿಯಲ್ಲಿಟ್ಟುಕೊಂಡು ಯಾವುದೇ ಔಷಧವನ್ನೂ ಬಳಸದೆ ಕೊನೆಯವರೆಗೂ ಬದುಕಬೇಕೆಂದರೆ ದಿನಚರಿಯಲ್ಲಿ ಕೆಲವು ಬದಲಾವಣೆಗಳನ್ನು ಮಾಡಿಕೊಳ್ಳಬೇಕು. ಪ್ರತಿದಿನ ಸೂರ್ಯನಮಸ್ಕಾರದಂತಹ ಯೋಗಾಸನಗಳನ್ನು ಮಾಡಬೇಕು. ಬಹುಶಃ ಅಸ್ತಮಾವನ್ನು ಹತೋಟಿಯಲ್ಲಿಡಲು ಪ್ರಾಣಾಯಾಮದಷ್ಟು ಪರಿಣಾಮಕಾರಿ ವಿಧಾನ ಇನ್ನೊಂದಿರಲಿಕ್ಕಿಲ್ಲ. ಹಾಗಾಗಿ ನಿತ್ಯ ಪ್ರಾಣಾಯಾಮ ಬೇಕೇ ಬೇಕು. ಬೆಳಗ್ಗೆ ಸಮಯ ಸಾಲದೆ ಹೋದರೆ ಸಂಜೆಯಾದರೂ ಮಾಡಲೇಬೇಕು. ನಮಗೆ ಸಾಮಾಜಿಕ ಜಾಲತಾಣ ನೋಡಲು ಹತ್ತು ನಿಮಿಷ ಸಮಯವಿದ್ದರೂ ಐದು ನಿಮಿಷ ಕಪಾಲಭಾತಿ ಮಾಡಲು ಸಮಯವಿಲ್ಲವೆಂದು ನಾಳೆಗೆ ಮುಂದೂಡುತ್ತೇವೆ. ನಾವೇ ರೋಗ ಬೆಳೆಯಲು ಬಿಡುತ್ತೇವೆ. ಜಲನೇತಿ, ಸೂತ್ರನೇತಿಗಳಂಥ ಕ್ರಿಯೆಗಳನ್ನು ನಿಯತವಾಗಿ ಮನೆಯಲ್ಲೇ ಮಾಡುವುದರಿಂದ ಅನುಕೂಲವಾಗುವುದಲ್ಲದೆ ಪ್ರಾರಂಭಿಕ ಹಂತದ ಸೈನಸ್, ಅಲರ್ಜಿ, ಅಸ್ತಮಾ ಸಮಸ್ಯೆಗಳು ಇವುಗಳಿಂದಲೇ ವಾಸಿಯಾಗಿಬಿಡುತ್ತವೆ.
