ವಿವಿಧ ವ್ಯಾಖ್ಯಾನ: ಹೈಕಮಾಂಡ್ ನೀಡಲಿರುವ ಸೂಚನೆ ಪಾಲಿಸುವೆ. ಪಕ್ಷದ ಸಂಘಟನೆಗೆ ಒತ್ತು ನೀಡುವೆ ಎಂಬ ಸಿಎಂ ಹೇಳಿಕೆ ವಿವಿಧ ವಿಶ್ಲೇಷಣೆ, ವ್ಯಾಖ್ಯಾನಗಳಿಗೆ ಎಡೆಮಾಡಿಕೊಟ್ಟಿದೆ. ಇದರಿಂದಾಗಿ ನಾಯಕತ್ವ ಬದಲಾವಣೆ ಚರ್ಚೆ ಮತ್ತಷ್ಟು ತುರುಸು ಪಡೆದುಕೊಂಡಿದೆ. ಹೊರಗಿನ ಚರ್ಚೆ, ಹೇಳಿಕೆಗಳಿಗೆ ತಲೆಕೆಡಿಸಿಕೊಳ್ಳದ ಬಿಎಸ್ವೈ ದೈನಂದಿನ ಚಟುವಟಿಕೆಗಳಲ್ಲಿ ಮಗ್ನರಾಗಿದ್ದಾರೆ. ದೆಹಲಿಗೆ ಹೋಗಿ ವರಿಷ್ಠರನ್ನು ಭೇಟಿ ಮಾಡಿ ಬಂದ ನಂತರ ಸಿಎಂ ಮೌನಕ್ಕೆ ಶರಣಾದರೆ, ವದಂತಿಗೆ ಕಾರಣ ಹುಡುಕಿಕೊಂಡು ಅವರ ‘ಕಾವೇರಿ’ ನಿವಾಸಕ್ಕೆ ದೊಡ್ಡ ಸಂಖ್ಯೆಯಲ್ಲಿ ಧಾವಿಸಿದ್ದ ಮಠಾಧೀಶರು ನೈತಿಕ ಬೆಂಬಲ ನೀಡಿದ್ದರು. ಅಲ್ಲದೆ, ಬಿಎಸ್ವೈಗೆ ಅವಧಿ ಪೂರ್ಣಗೊಳಿಸಲು ಅವಕಾಶ ಕೊಡಬೇಕು ಎಂದು ವರಿಷ್ಠರಿಗೆ ಆಗ್ರಹಿಸಿ ಬದಲಾವಣೆ ಮಾಡಿದರೆ ಪಕ್ಷಕ್ಕೆ ಹಾನಿಯಾಗಲಿದೆ ಎಂಬ ಎಚ್ಚರಿಕೆಯನ್ನೂ ಕೊಟ್ಟರು. ಸ್ವಾಮೀಜಿಗಳ ಭೇಟಿ, ಚರ್ಚೆ ಸಂದರ್ಭದಲ್ಲಿ ಬಿಎಸ್ವೈ ರಾಜೀನಾಮೆ ಬಗ್ಗೆ ತುಟಿಬಿಚ್ಚಿಲ್ಲ. ವರಿಷ್ಠರ ತೀರ್ವನದಂತೆ ನಡೆದು ಕೊಳ್ಳುವೆ, ಯಾವುದೂ ನನ್ನ ಕೈಯ್ಯಲ್ಲಿಲ್ಲವೆಂದು ಹೇಳಿದ್ದರು.
