ಬೈಡೆನ್ ಆಡಳಿತದಲ್ಲಿ ಏಷ್ಯಾ ಅಥವಾ ಭಾರತದ ಪ್ರಾಮುಖ್ಯ ಕಡಿಮೆ ಆಗುವುದಿಲ್ಲ. ವಿಶ್ವಶಾಂತಿ ಸ್ಥಾಪನೆಯಲ್ಲಿ ಏಷ್ಯಾದ ಪಾತ್ರ ಪ್ರಮುಖ ಎಂಬುದನ್ನು ಡೆಮಾಕ್ರಟಿಗರು ಅರಿತಿದ್ದಾರೆ. ಕಳೆದ 20 ವರ್ಷಗಳಲ್ಲಿ ಅಮೆರಿಕ-ಭಾರತ ಸಂಬಂಧ, ಸ್ನೇಹ ದೃಢಗೊಂಡಿದ್ದು, ಅದು ಹೊಸ ಎತ್ತರಕ್ಕೆ ಏರಲಿದೆ. ಮಿಲಿಟರಿ ಸಹಕಾರ ಸೇರಿ ಹಲವು ವಲಯಗಳಲ್ಲಿ ಮೈತ್ರಿ ಮುಂದುವರಿಯಲಿದೆ. ಬರಾಕ್ ಒಬಾಮ ಅವಧಿಯಲ್ಲಿ ಉಪಾಧ್ಯಕ್ಷರಾಗಿದ್ದ ಬೈಡೆನ್ ಭಾರತದ ಆಳಅಗಲವನ್ನು ಅರ್ಥಮಾಡಿಕೊಂಡಿದ್ದಾರೆ. ಹಾಗಾಗಿ, ಅಮೆರಿಕದ ವಿದೇಶಾಂಗ ನೀತಿ ಬೈಡೆನ್ ಅವಧಿಯಲ್ಲಿ ಬದಲಾಗುವುದಿಲ್ಲ. ಇನ್ನು, ಚೀನಾ ತನ್ನ ನೀತಿ, ನಿರ್ಧಾರಗಳನ್ನು ಜಗತ್ತಿನ ಮೇಲೆ ಹೇರಲು ಹೊರಟಿದೆ ಎಂಬುದನ್ನು ಡೆಮಾಕ್ರಟಿಗರೂ ಅರಿತುಕೊಂಡಿದ್ದಾರೆ. ಚೀನಾದ ವಿಸ್ತರಣಾವಾದದ ನೀತಿಗೆ ಮತ್ತು ದಕ್ಷಿಣ ಚೀನಾ ಸಮುದ್ರದಲ್ಲಿ ಪಾರಮ್ಯ ಸಾಧಿಸುವ ಹಪಾಹಪಿಗೆ ಹೊಸ ಸರ್ಕಾರವೂ ಕಡಿವಾಣ ಹಾಕಲಿದೆ.
