ಸ್ಪರ್ಧಾತ್ಮಕ ಪರೀಕ್ಷೆ ಬರೆಯಲು ಮೊದಲು ಯಾವುದೇ ತಯಾರಿ ನಡೆಸಿರಲಿಲ್ಲ. ಆದರೆ, ಇಂಜಿನಿಯರಿಂಗ್ ಮುಗಿಯುತ್ತಿರುವಂತೆ ಇನ್ನೂ ಹೆಚ್ಚು ಓದಬೇಕು ಅನಿಸಿತು. ವಿದೇಶ, ದೇಶ, ರಾಜ್ಯ, ಆರ್ಥಿಕತೆ, ಇತಿಹಾಸ, ಭೌಗೋಳಿಕ ಶಾಸ್ತ್ರ, ಅಂತಾರಾಷ್ಟ್ರೀಯ ಸಂಬಂಧ ಹೀಗೆ ಹಲವಾರು ವಿಷಯಗಳ ಬಗ್ಗೆ ತಿಳಿದುಕೊಳ್ಳಲು ಸ್ಪರ್ಧಾತ್ಮಕ ಪರೀಕ್ಷೆ ಒಳ್ಳೆಯ ಮಾರ್ಗ ಅನಿಸಿತು. ಹಾಗಾಗಿ ಯುಪಿಸ್ಸಿ ಪರೀಕ್ಷೆ ಬರೆಯಲು ನಿರ್ಧಾರ ಮಾಡಿದೆ.. ಇದು ಇತ್ತೀಚೆಗೆ ಪ್ರಕಟಗೊಂಡ ಕೇಂದ್ರ ನಾಗರಿಕ ಸೇವಾ ಪರೀಕ್ಷೆಯಲ್ಲಿ 55ನೇ ರ್ಯಾಂಕ್ ಪಡೆದು ಕರ್ನಾಟಕದ ಟಾಪರ್ ಆಗಿರುವ ಎಚ್.ಎಸ್. ಭಾವನಾ ಯಶಸ್ಸಿನ ಗುಟ್ಟು. ಪ್ರಸ್ತುತ ಭಾರತೀಯ ರೈಲ್ವೇ ಸೊಲ್ಲಾಪುರ ವಿಭಾಗದಲ್ಲಿ ಅಸಿಸ್ಟೆಂಟ್ ಆಪರೇಟಿಂಗ್ ಮ್ಯಾನೇಜರ್ ಆಗಿ ಕಾರ್ಯನಿರ್ವಹಿಸುತ್ತಿರುವ ಭಾವನಾ ಅವರು ವಿಜಯವಾಣಿಗೆ ನೀಡಿರುವ ವಿಶೇಷ ಸಂದರ್ಶನದಲ್ಲಿ ಯುಪಿಎಸ್ಸಿ ಕನಸುಗಾರರಿಗೆ ಗೆಲುವಿನ ದಾರಿ ತೋರಿಸಿದ್ದಾರೆ.
