‘ಪೆನ್ನಿ ಸೇವ್ಡ್ ಈಸ್ ಪೆನ್ನಿ ಅರ್ನ್ಡ್’ ಎಂಬ ಮಾತಿದೆ. ಇದನ್ನು ಗೃಹಿಣಿಯರು, ವಿದ್ಯಾರ್ಥಿಗಳು, ಸಂಬಳದಾರರು ಹೀಗೆ ಎಲ್ಲರೂ ಪಾಲಿಸಬೇಕಾದ ಸಂದರ್ಭ ಬಂದಿದೆ. ಆರೋಗ್ಯದ ದೃಷ್ಟಿಯಿಂದ, ಭವಿಷ್ಯದ ದೃಷ್ಟಿಯಿಂದ ಉಳಿಕೆ ಸೂತ್ರವನ್ನು ನಾವು ಅಳವಡಿಸಿಕೊಳ್ಳಬೇಕಾಗುತ್ತದೆ. ಹೋಟೆಲ್ಗೆ ಹೋಗಿ ತಿನ್ನುವುದನ್ನು ಕಡಿಮೆ ಮಾಡಿ, ಮನೆಯಲ್ಲೇ ಯೂಟ್ಯೂಬ್ ನೋಡಿ ವಿಶೇಷ ತಿನಿಸು ಸಿದ್ಧಪಡಿಸಿಕೊಂಡರೆ ಆರೋಗ್ಯ ಮತ್ತು ಉಳಿತಾಯಕ್ಕೂ ಅನುಕೂಲ. ಉಪ್ಪಿನಕಾಯಿ, ಮಸಾಲೆ ಪದಾರ್ಥ, ಸೂಪ್ ಮುಂತಾದ ಪದಾರ್ಥಗಳನ್ನು ಮನೆಯಲ್ಲೇ ಸಿದ್ಧ ಮಾಡಿಕೊಳ್ಳಲು ಅವಕಾಶವುಂಟು. ವೀಕೆಂಡ್ ಪ್ರವಾಸ ಸದ್ಯಕ್ಕೆ ಮುಂದೂಡಿದರೆ ಜೇಬಿಗೆ ಹಿತ. ಬಹಳಷ್ಟು ಜನರಿಗೆ ಅಲ್ಮೆರಾ ತುಂಬಾ ಬಟ್ಟೆಗಳಿದ್ದರೂ ಹೊಸದನ್ನು ಕೊಳ್ಳುವ ಕ್ರೇಜ್ ಇರುತ್ತದೆ. ಸೈಜ್ನಲ್ಲಿ ಸಣ್ಣ ವ್ಯತ್ಯಾಸವಾದರೂ ಬದಲಿಸುತ್ತಾರೆ. ಆಂತಹ ಮನಸ್ಥಿತಿಗೆ ಕೆಲದಿನಗಳ ಮಟ್ಟಿಗಾದರೂ ಗುಡ್ಬೈ ಹೇಳುವುದು ಒಳ್ಳೆಯದು. ಇರುವುದನ್ನೇ ಸಣ್ಣಪುಟ್ಟ ರಿಪೇರಿ ಮಾಡಿಕೊಂಡು ಬಳಸಬಹುದು. ಯೋಚಿಸಿ ಖರೀದಿಸಿದರೆ ಮತ್ತು ಖರೀದಿಸಿದ್ದನ್ನು ಎಚ್ಚರಿಕೆಯಿಂದ ಬಳಸಿದರೆ ಹಣ ಉಳಿಯುತ್ತದೆ. ಹೊಸ ವರ್ಷದ ಸಂದರ್ಭದಲ್ಲಿ ಹೊಸ ರೀತಿಯ ಗಳಿಕೆಗೆ ನನ್ನ ಮೂರು ಸಲಹೆಗಳಿವೆ. ಉಪ್ಪಿಟ್ಟು, ಕಿಚಡಿ ಮುಂತಾದ ರೆಡಿ ಟು ಕುಕ್ ಉತ್ಪನ್ನಗಳ ತಯಾರಿಕೆ- ಮಾರಾಟವನ್ನು ಒಂದು ಒಳ್ಳೆಯ ಉದ್ಯಮವಾಗಿಸಿಕೊಳ್ಳಬಹುದು. ವಿಶೇಷ ಕಲೆ ಇರುವವರು ಆನ್ಲೈನ್ ಕೋಚಿಂಗ್ ನೀಡಬಹುದು. ಇಂಗ್ಲಿಷ್, ಹಿಂದಿಯಂತಹ ಭಾಷೆ ಮೇಲೆ ಹಿಡಿತ ಇದ್ದರೆ ಆನ್ಲೈನ್ ಕ್ಲಾಸ್ ಮಾಡಿ ಗಳಿಸಬಹುದು. ಭಾಷಾಂತರ, ಕಂಟೆಂಟ್ ರೈಟಿಂಗ್ನಲ್ಲಿ ತೊಡಗಬಹುದು. ಕೃಷಿಯಲ್ಲಿ ಆಸಕ್ತಿ ಇದ್ದರೆ ಮಿಲೆಟ್ಸ್ ಬೆಳೆಯಬಹುದು, ಮೌಲ್ಯವರ್ಧಿತ ಉತ್ಪನ್ನವನ್ನು ಸಿದ್ಧ ಮಾಡಿ ಮಾರ್ಕೆಟ್ ಮಾಡಬಹುದು. ಉದಾಹರಣೆಗೆ ನುಗ್ಗೆ ಬೆಳೆಯುವವರು ಅದರ ಎಲೆ ಪುಡಿ ಮಾಡಿ ಮಾರಬಹುದು. ಕೃಷಿ ಸಂಬಂಧಿ ಸಲಕರಣೆಗಳ ಉತ್ಪಾದನೆ, ಅವುಗಳ ಸೇವೆ ನೀಡುವ ಉದ್ಯಮಕ್ಕೂ ಬೇಡಿಕೆ ಇದೆ.
