ಇವೆಲ್ಲದರ ಮಧ್ಯೆಯೂ ದೇಶದಲ್ಲಿ ವನ್ಯಜೀವಿಗಳು ಅದರಲ್ಲೂ ಹುಲಿಗಳು ಉತ್ತಮ ಸಂಖ್ಯೆಯಲ್ಲಿ ಉಳಿದಿವೆ. ‘ವಿಶ್ವ ಹುಲಿ ದಿನಾಚರಣೆ’ಯ ಅಂಗವಾಗಿ ಸರ್ಕಾರ ರಾಜ್ಯದಲ್ಲಿ ನಡೆದ ಹುಲಿ ಸಮೀಕ್ಷೆಯ ಫಲಿತಾಂಶವನ್ನು ಬಿಡುಗಡೆಗೊಳಿಸಿದೆ. ರಾಜ್ಯದಲ್ಲಿ 435 ಪ್ರತ್ಯೇಕ ಹುಲಿಗಳನ್ನು ಗುರುತಿಸಲಾಗಿದೆ. ಇವುಗಳಲ್ಲಿ ಶೇ. 68ಕ್ಕೂ ಹೆಚ್ಚು ಹುಲಿಗಳನ್ನು ನಾಗರಹೊಳೆ ಮತ್ತು ಬಂಡೀಪುರದಲ್ಲಿ ಗುರುತಿಸಲಾಗಿದೆ. ರಾಜ್ಯದ ಇನ್ನುಳಿದ ಮೂರು ಹುಲಿ ಸಂರಕ್ಷಣಾ ಪ್ರದೇಶಗಳು ಸೇರಿ ಶೇ. 19ರಷ್ಟು ಹುಲಿಗಳು ದಾಖಲಾಗಿವೆ. ಅಂದರೆ ರಾಜ್ಯದ ಉಳಿದ ಕಾಡುಗಳೆಲ್ಲ ಸೇರಿ ಇರುವುದು ಬಹಳ ಕಡಿಮೆ ಹುಲಿಗಳು. ರಾಜ್ಯದ ಹಾಸನ, ಚಿಕ್ಕಮಗಳೂರು, ಕೊಡಗು, ಶಿವಮೊಗ್ಗ, ಉತ್ತರ ಕನ್ನಡ, ದಕ್ಷಿಣ ಕನ್ನಡ ಇನ್ನಿತರ ಜಿಲ್ಲೆಗಳ ಹಲವಾರು ಪ್ರದೇಶಗಳಲ್ಲಿ ಹುಲಿ ಇರಲು ಯೋಗ್ಯವಾದ ಆವಾಸಸ್ಥಾನವಿದ್ದರೂ, ಆ ಕಾಡುಗಳಲ್ಲಿ ಕಡಿಮೆ ಹುಲಿಗಳಿರುವುದು ಈ ಕಾಡುಗಳಲ್ಲಿ ಇರುವ ತೊಂದರೆಗಳನ್ನು ಎತ್ತಿ ತೋರುತ್ತದೆ. ಬಹುಶಃ ನಮ್ಮ ರಾಜ್ಯದಲ್ಲಿ ಅಂದಾಜು 800 ಹುಲಿಗಳಿಗೆ ಆವಾಸಸ್ಥಾನವಿದೆ. ಆದರೆ, ಆ ಗುರಿ ತಲುಪಲು ಬಹು ಮುಖ್ಯವಾದ ತಡೆಯೆಂದರೆ ಹುಲಿಗಳ ಉಳಿವಿಗೆ ಅತ್ಯವಶ್ಯವಾಗಿ ಬೇಕಾದ ಜಿಂಕೆ, ಕಡವೆ, ಕಾಟಿಯಂತಹ ಬಲಿಪ್ರಾಣಿಗಳ ಕೊರತೆ. ಆವಾಸಸ್ಥಾನದ ಛಿದ್ರೀಕರಣ ಮತ್ತು ಯಥೇಚ್ಛವಾಗಿ ಬಲಿಪ್ರಾಣಿಗಳ ಲಭ್ಯತೆಯಿದ್ದರೆ ಕರ್ನಾಟಕವು 800 ಹುಲಿಗಳ ಗುರಿ ತಲುಪುವುದು ಅಸಾಧ್ಯವೇನಲ್ಲ. ಆದರೆ, ಅದಕ್ಕೆ ರಾಜಕೀಯ ಇಚ್ಛಾಶಕ್ತಿ, ಅಧಿಕಾರಿಗಳ ಬದ್ಧತೆ ಮತ್ತು ಸಾರ್ವಜನಿಕರ ಬೆಂಬಲ ಬೇಕಷ್ಟೆ.
