ಡಿಜಿಟಲ್ ಕಲಿಕೆಯ ಅಡ್ಡಪರಿಣಾಮಗಳು: ಶಿಕ್ಷಕರು ಮತ್ತು ವಿದ್ಯಾರ್ಥಿಗಳ ಸಂಪರ್ಕ ದೂರದೂರ ಸರಿದಿದ್ದರೂ ಮೊಬೈಲ್/ಕಂಪ್ಯೂಟರ್ ತೆರೆಗಳ ಮೂಲಕ ಕಲಿಕೆ ಸಾಧ್ಯವಾಗುತ್ತಿದ್ದು ಅದೇ ಸರಾಗ ಎನ್ನುವ ಅಭಿಪ್ರಾಯವೂ ಬಲವಾಗುತ್ತಿದೆ. ಆದರೆ, ಮಕ್ಕಳ ಸಮಗ್ರ ಮಾನಸಿಕ ವಿಕಾಸದ ಮೇಲೆ ಒಳ್ಳೆಯದಲ್ಲದ ಪರಿಣಾಮಗಳೇ ಹೆಚ್ಚು ಎನ್ನುವ ಅಭಿಪ್ರಾಯ ಪಾಲಕರಲ್ಲಿದೆ. ಇದೇನು ಹುಸಿಭಾವನೆಯಂತೂ ಅಲ್ಲ. ನೂರಾರು ವರ್ಷಗಳ ಹಳೆಯ ಕಲಿಕೆಯ ಪದ್ಧತಿಗಳು ಏಕಾಏಕಿ ಬದಲಾಗಿಬಿಟ್ಟಾಗ ಹೀಗೆನಿಸುವುದು ಸಹಜ. ಕೋವಿಡ್ ಪೂರ್ವದ ವರ್ಷದಲ್ಲಿದ್ದಂತಹ ಶಾಲಾ ಕಲಿಕೆಯ ಅವಧಿ ಮತ್ತು ಕಲಿಸಿದ ವಿಷಯಗಳ ಗ್ರಹಿಕೆ ಕೋವಿಡ್ ಸಮಯದಲ್ಲಿ ಶೇಕಡ 40ಕ್ಕೆ ಇಳಿದಿರುವುದನ್ನು ಕೆಲ ಸಮೀಕ್ಷೆಗಳು ಬೊಟ್ಟುಮಾಡಿವೆ. ಹೌದು, ಮನೆಯ ಆವರಣವೇ ತರಗತಿಯ ತದ್ರೂಪವಾಗಲಾರದು. ಮನೆಯ ವಾತಾವರಣ, ಸಾಧನ, ಸಲಕರಣೆಗಳ ಗುಣಮಟ್ಟ, ಮಾಹಿತಿ ಒದಗಿಬರುವ ವೇಗ ಮತ್ತು ಹೊಸತನದ ಕಾರಣದಿಂದ ಹುಟ್ಟುವಂಥ ಕುತೂಹಲದ ಜೊತೆಯಲ್ಲಿ ಏಕಾಗ್ರತೆಗೆ ಅಡ್ಡಿಪಡಿಸುವಂಥ ಹೊಸ ಆವರಣವೂ ಕಲಿಕೆಗೆ ಅಡ್ಡಿಪಡಿಸುತ್ತವೆ. ಇನ್ನು ಡಿಜಿಟಲ್ ಸೌಲಭ್ಯ ಒದಗಿಸುವ ಮತ್ತು ಡಿಜಿಟಲ್ ಅಂತರವನ್ನು ನೀಗಿಸುವ ಕಾರ್ಯ ಸರ್ಕಾರಗಳ ಬದ್ಧತೆಯನ್ನು ಅವಲಂಬಿಸಿರುತ್ತದೆ. ಗ್ರಾಮಾಂತರ ಪ್ರದೇಶದ ಮಕ್ಕಳು ಡಿಜಿಟಲ್ ಕಲಿಕೆಯ ಮುಖ್ಯವಾಹಿನಿಯನ್ನು ಸೇರುವಂತೆ ಮಾಡುವ ಕಾರ್ಯಕ್ರಮಗಳಲ್ಲಿ ಸ್ವಯಂಸೇವಾ ಸಂಸ್ಥೆಗಳ ಭಾಗವಹಿಸುವಿಕೆ ಬಹುಮುಖ್ಯ. ಡಿಜಿಟಲ್ ಕಲಿಕೆಯ ಬಗ್ಗೆ ಪಾಲಕರಲ್ಲಿ ಅರಿವು ಮೂಡಿಸುವುದು ಸುಲಭದ ಮಾತಲ್ಲ. ಮುಂದಿನ ದಶಕಗಳಲ್ಲಿ ನಿತ್ಯದ ಬದುಕು ತಂತ್ರಜ್ಞಾನವನ್ನೇ ಹೆಚ್ಚು ಅವಲಂಬಿಸಿದೆ ಎನ್ನುವ ಅರಿವು, ವಿಶೇಷವಾಗಿ ಗ್ರಾಮಾಂತರ ಪ್ರದೇಶಗಳಲ್ಲಿ ಮೂಡಿಸಬೇಕಿದೆ.
