ಗೃಹಪ್ರವೇಶದಲ್ಲಿ ದಾಂಧಲೆ ನಡೆಸಿದ್ದ ಮೂವರು ತೃತೀಯಲಿಂಗಿಗಳ ಸೆರೆ

ಬೆಂಗಳೂರು: ಗೃಹಪ್ರವೇಶ ನಡೆಯುತ್ತಿದ್ದ ಮನೆಗೆ ನುಗ್ಗಿ 10 ಸಾವಿರ ರೂ. ಹಣ ಕೊಡುವಂತೆ ಒತ್ತಾಯಿಸಿ ದಾಂಧಲೆ ನಡೆಸಿದ್ದ ಮೂವರು ತೃತೀಯಲಿಂಗಿಗಳನ್ನು ವೈಯಾಲಿಕಾವಲ್ ಪೊಲೀಸರು ಬಂಧಿಸಿದ್ದಾರೆ.

ಶ್ರೀರಾಂಪುರ ನಿವಾಸಿಗಳಾದ ಕ್ರಿತಿಕ (24), ಪ್ರಶಾಂತ್ ಅಲಿಯಾಸ್ ಪ್ರೀತಿ (20) ಮತ್ತು ಮಣಿಕಂಠನ್ ಅಲಿಯಾಸ್ ಪೂಜಾ (23) ಬಂಧಿತ ತೃತೀಯಲಿಂಗಿಗಳು. ಕೋರ್ಟ್‌ಗೆ ಹಾಜರು ಪಡಿಸಿ ಕಾನೂನು ಕ್ರಮ ತೆಗೆದುಕೊಳ್ಳಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ವೈಯಾಲಿಕಾವಲ್ ಬಳಿಯ ರಾಜೇಶ್, ಬುಧವಾರ ಹೊಸ ಮನೆ ಗೃಹಪ್ರವೇಶ ಕಾರ್ಯಕ್ರಮ ಆಯೋಜನೆ ಮಾಡಿದ್ದರು. ಪೂಜಾ ಕಾರ್ಯಗಳು ನಡೆಯುತ್ತಿದ್ದವು, ಸಂಬಂಧಿಕರು ಸೇರಿದ್ದರು. ಏಕಾಏಕಿ ಒಳನುಗ್ಗಿದ ತೃತೀಯಲಿಂಗಿಗಳು, ಹಣ ಕೊಡುವಂತೆ ಒತ್ತಾಯಿಸಿದ್ದಾರೆ. ರಾಜೇಶ್ 500 ರೂ. ಕೊಡಲು ಹೋಗಿದ್ದು, ಹಣ ಪಡೆಯದೆ ಆರೋಪಿಗಳು 10 ಸಾವಿರ ರೂ. ಕೊಡುವಂತೆ ತಾಕೀತು ಮಾಡಿದ್ದಾರೆ.

ಅಷ್ಟೊಂದು ಹಣ ಇಲ್ಲವೆಂದು ಹೇಳಿದಾಗ ಜೊರಾಗಿ ಕಿರುಚಾಡಿ, ಅವಾಚ್ಯ ಶಬ್ದಗಳಿಂದ ನಿಂದಿಸಿ ಗಲಾಟೆ ಮಾಡಿದ್ದರು. ಕೊನೆಗೆ ಸ್ಥಳೀಯರು ಮತ್ತು ಸಂಬಂಧಿಕರು ತಿರುಗಿ ಬಿದ್ದಾಗ ಸ್ಥಳದಿಂದ ಪರಾರಿ ಆಗಿದ್ದರು. ಇದರಿಂದ ರಾಜೇಶ್ ನೊಂದಿದ್ದರು. ಇದರ ವಿಡಿಯೋ ಎಲ್ಲೆಡೆ ವೈರಲ್ ಆಗಿತ್ತು. ಇದರ ಮೇರೆಗೆ ಪ್ರಕರಣ ದಾಖಲು ಮಾಡಿಕೊಂಡ ಪೊಲೀಸರು, ಆರೋಪಿಗಳನ್ನು ಬಂಧಿಸಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

https://www.vijayavani.net/27-year-old-youth-who-went-to-picnic-died-by-heart-attack

https://www.vijayavani.net/mother-and-her-two-children-died-in-a-river