ಮನೆಯಲ್ಲಿ ಸದಾ ಶಾಂತಿ, ನೆಮ್ಮದಿ ನೆಲೆಸಿರಬೇಕು. ಧರ್ಮ, ಸಂಸ್ಕೃತಿ, ಆದರ್ಶ, ಮೌಲ್ಯಗಳ ಅರಿವು-ಆಚರಣೆ ಇರಲೇಬೇಕು. ಮನೆ ಸ್ವಚ್ಛವಾಗಿಡಲು ಪೊರಕೆ, ಕತ್ತಲೆ ಕಳೆಯಲು ಹಣತೆ, ಸುಗಂಧ ಹರಡಲು ಹೂ ಬೇಕು. ಇವುಗಳಿಲ್ಲದ ಮನೆ ಮನೆಯಲ್ಲ. ಇವುಗಳಿಂದಲೇ ಮನೆಗೆ-ಮನುಷ್ಯನಿಗೆ ಬೆಲೆ ಬರಲು ಸಾಧ್ಯ. ಅರಮನೆಯಾದರೇನು ಗುಡಿಸಲು ಆದರೇನು ಬೆಳಕಿನ ಹಣತೆ ಬೇಕಲ್ಲವೇ? ಪೊರಕೆ, ಹೂವಿಲ್ಲದ ಮನೆಗೆ ಬೆಲೆ ಬರಲು ಸಾಧ್ಯವಾಗುವುದಿಲ್ಲ. ಅದರಂತೆ ಮನುಷ್ಯನಿಗೆ ಅಧ್ಯಾತ್ಮಜ್ಞಾನ ಇರದಿದ್ದರೆ ಬದುಕು ಸುಂದರಗೊಳ್ಳಲು ಅಸಾಧ್ಯ. ಸುವಾಸನೆ ಇರದಿದ್ದರೆ ಬದುಕು ಸುಂದರಗೊಳ್ಳದು. ಸುವಾಸನೆಯು ಪ್ರೀತಿಗೆ, ಹಣತೆ ಜ್ಞಾನಕ್ಕೆ, ಪೊರಕೆ ಸದ್ಗುಣಗಳಿಗೆ ಸಂಕೇತವಾಗಿವೆ.
