ಕರೊನಾ ಬಳಿಕ ಅಮೆರಿಕದಲ್ಲಿ ಗರ್ಭಿಣಿಯರ ಸಾವಿನ ಪ್ರಮಾಣದಲ್ಲಿ ಶೇ. 80 ಏರಿಕೆ ಕಂಡುಬಂದಿದೆ ಎಂದು ಅಲ್ಲಿನ ಸರ್ಕಾರಿ ವರದಿಯೊಂದು ಹೇಳಿದೆ. ಮಹಿಳೆಯರು ಖಿನ್ನತೆಗೆ ಒಳಗಾಗುವುದು, ಕಡಿಮೆ ತೂಕದ ಮಕ್ಕಳ ಜನನ, ಹೆರಿಗೆ ಸಂದರ್ಭದಲ್ಲಿ ತೊಂದರೆ ಕಂಡುಬಂದ ಪ್ರಕರಣಗಳಲ್ಲೂ ಗಮನಾರ್ಹ ಏರಿಕೆ ಕಂಡುಬಂದಿದೆ ಎಂದು ವರದಿಯಲ್ಲಿ ಉಲ್ಲೇಖ ಮಾಡಲಾಗಿದೆ. ಗರ್ಭಿಣಿಯಾದ ವೇಳೆ ಕರೊನಾ ವೈರಸ್ಗೆ ತುತ್ತಾಗಿರುವುದು, ದೇಶಾದ್ಯಂತ ವಿಧಿಸಲಾಗಿರುವ ಲಾಕ್ಡೌನ್, ಖಿನ್ನತೆ ಇನ್ನಿತರ ಕಾರಣಗಳಿಂದ ಸಾವಿನ ಪ್ರಮಾಣ ಏರಿಕೆ ಆಗಿದೆ ಎಂದು ಅಧಿಕಾರಿಗಳು ಅಭಿಪ್ರಾಯಪಟ್ಟಿದ್ದಾರೆ. ಕಳೆದ ವರ್ಷ ಜುಲೈನಿಂದ ಡಿಸೆಂಬರ್ ವರೆಗೆ ಡೆಲ್ಟಾ ರೂಪಾಂತರಿ ತೀವ್ರ ಪ್ರಮಾಣದಲ್ಲಿ ಪ್ರಸರಣವಾದ ಸಮಯದಲ್ಲಿ ಸಾವಿನ ಸಂಖ್ಯೆ ಅತ್ಯಧಿಕ ಪ್ರಮಾಣದಲ್ಲಿ ದಾಖಲಾಗಿದೆ. ಪ್ರತಿ 10 ಲಕ್ಷ ಕಪು್ಪ ಮಹಿಳೆಯರಲ್ಲಿ ಸುಮಾರು 44 ಮಂದಿಗೆ ಹೆರಿಗೆ ಸಂದರ್ಭದಲ್ಲಿ ಸಮಸ್ಯೆ ಉಂಟಾಗುತ್ತದೆ. ಆದರೆ ಕರೊನಾ ಪರಿಣಾಮ ಇದು 68.9ಕ್ಕೆ ಏರಿಕೆ ಕಂಡಿದೆ. ಶ್ವೇತ ವರ್ಣೀಯರಲ್ಲಿ ಇದು 17.9ರಿಂದ 26ಕ್ಕೆ ಏರಿಕೆ ಕಂಡಿದೆ ಎಂದು ವರದಿ ಹೇಳಿದೆ.
