5 ಸಾವಿರ ಕಲರ್​ ಜೆರಾಕ್ಸ್​ ನೋಟು ನೀಡಿ ವೃದ್ಧನಿಂದ ಕುರಿ ಖರೀದಿಸಿದ ವಂಚಕರು

ಮಂಡ್ಯ : ಹೊಲದಲ್ಲಿ ಕುರಿ ಮೇಯಿಸುತ್ತಿದ್ದ ವೃದ್ಧನಿಗೆ ಕಲರ್​ ಜೆರಾಕ್ಸ್​ ನಕಲಿ ನೋಟು ನೀಡಿ ಕುರಿ ಖರೀದಿಸಿರುವ ಆತಂಕಕಾರಿ ಘಟನೆ ಮದ್ದೂರು ತಾಲೂಕಿನ ಅಂಕನಾಥಪುರದಲ್ಲಿ ನಡೆದಿದೆ.

ಮಂಚಯ್ಯ ಎಂಬ ವೃದ್ಧ ಹೊಲದಲ್ಲಿ ಕುರಿ ಮೇಯಿಸುತ್ತಿದ್ದ ವೇಳೆ ಆಟೋದಲ್ಲಿ ಬಂದ ಮೂವರು 5 ಸಾವಿರ ರೂಪಾಯಿ ಕಲರ್​ ಜೆರಾಕ್ಸ್​ ನಕಲಿ ನೋಟು ನೀಡಿ ಕುರಿ ಖರೀದಿಸಿದರು. ಹಣ ಪಡೆದು ಮನೆಗೆ ತೆರಳಿದ ಮಂಚಯ್ಯ ನೋಟು ಚಲಾವಣೆ ಮಾಡದೆ ಸುಮ್ಮನಿದ್ದರು.

ಸೋಮವಾರ ಅದೇ ತಂಡ ಮತ್ತೊಬ್ಬ ವೃದ್ಧರ ಬಳಿಗೆ ತೆರಳಿ ಜೆರಾಕ್ಸ್​ ನೋಟು ನೀಡಲು ಮುಂದಾಯಿತು. ಅನುಮಾನ ಬಂದ ಆ ವೃದ್ಧ ಮರು ಪ್ರಶ್ನೆ ಹಾಕಿದ ಅದು ಜೆರಾಕ್ಸ್​ ನೋಟು ಎಂದು ಪತ್ತೆಯಾಯಿತು.

ಗ್ರಾಮದಲ್ಲಿ ಜೆರಾಕ್ಸ್​ ನೋಟು ನೀಡಿ ಕುರಿ ಖರೀದಿಸುತ್ತಿರುವ ವಿಷಯ ಬಹಿರಂಗಗೊಳ್ಳುತ್ತಿದ್ದಂತೆ ಮಂಚಯ್ಯ ತನ್ನ ಬಳಿ ಇದ್ದ ನೋಟುಗಳನ್ನು ಪರೀಕ್ಷಿಸಿದಾಗ ಅವು ಕೂಡ ಜೆರಾಕ್ಸ್​ ಎಂದು ಗೊತ್ತಾಗಿ ಗಾಬರಿಗೊಂಡಿದ್ದಾರೆ. ಕುರಿ ಹಾಗೂ ಹಣ ಕಳೆದುಕೊಂಡ ಮಂಚಯ್ಯ ರೋಧಿಸುತ್ತಿದ್ದಾರೆ. (ದಿಗ್ವಿಜಯ ನ್ಯೂಸ್​)