ಆ ಬಳಿಕ ವರ್ಷಕ್ಕೆ ಒಂದೆರಡು ಬಾರಿ ಶೀತ, ಕೆಮ್ಮು ಬಾಧಿಸುತ್ತದೆ. ವಿಶೇಷವಾದ ಉಪಚಾರವಿಲ್ಲದೆ ಹಾಗೆಯೇ ಕಡಿಮೆಯಾಗುತ್ತದೆ. ಮುಂದಿನ ವರ್ಷ ಕೆಮ್ಮು, ಶೀತ ನಾಲ್ಕು ಬಾರಿ ತೊಂದರೆ ಕೊಡುತ್ತದೆ. ಐದಾರು ದಿನಗಳಲ್ಲಿ ಅಲ್ಪ ಔಷಧದಿಂದ ವಾಸಿಯಾಗುತ್ತದೆ. ಮರು ವರ್ಷ ಬರುವ ಕೆಮ್ಮು, ಶೀತ ತಿಂಗಳು ಕಾಲ ಸತಾಯಿಸುತ್ತದೆ. ವರುಷದ ಮೂರ್ನಾಲ್ಕು ತಿಂಗಳು ಔಷಧ, ಪಥ್ಯ, ವೈದ್ಯರ ಬದಲಿಸುವಿಕೆ ಎಲ್ಲವೂ ನಡೆದು ಅಂತೂ ಇಂತೂ ತಹಬಂದಿಗೆ ಬರುತ್ತದೆ. ಹೀಗಿದ್ದರೂ ಉಸಿರಾಟದಲ್ಲಿ ಕಷ್ಟವೇನೂ ಆಗಿರುವುದಿಲ್ಲ. ಹತ್ತನೇ ವರ್ಷ ಜ್ವರ, ಶೀತ, ನೆಗಡಿಗಳು ಪದೇಪದೇ ಕಾಡತೊಡಗುತ್ತವೆ. ಧೂಳಿಗೆ ಒಡ್ಡಿಕೊಂಡರೆ ಕೆಮ್ಮು, ತಣ್ಣಗಿನ ಆಹಾರ ತೆಗೆದುಕೊಂಡರೆ ಜ್ವರ, ಹೊಗೆಯನ್ನು ಆಘ್ರಾಣಿಸಿದರೆ ನೆಗಡಿ, ಹಳೆಯ ಪುಸ್ತಕವನ್ನು ತಿರುವಿದರೆ ಶೀತ - ಹೀಗೆ ನಾನಾ ವಿಧವಾಗಿ ತಾಪತ್ರಯಗಳು ಬೆಂಬಿಡದೆ ಕಾಡುತ್ತವೆ. ಇದೀಗ ಬೆಂಗಳೂರಿಗೆ ಬಂದು ಹನ್ನೆರಡು ವರ್ಷಗಳು ಪೂರೈಸಿವೆ. ರಾತ್ರಿ ನೆಂಟರ ಮನೆಯಲ್ಲಿ ಎಣ್ಣೆಯಲ್ಲಿ ಕರಿದ ತಿಂಡಿ, ಬಗೆಬಗೆಯ ಸಿಹಿ ತಿಂಡಿಗಳು, ಭೂರಿ ಭೋಜನ, ಕೊನೆಯಲ್ಲಿ ತಂಪಾದ ಐಸ್ಕ್ರೀಮ್ ಎಲ್ಲವನ್ನೂ ಸವಿದು ಸವಿ ನಿದ್ದೆಯಲ್ಲಿದ್ದಾಗ ಉಸಿರಾಟದ ತೊಂದರೆ ತೀವ್ರವಾಗಿ ಬಡಿದೆಬ್ಬಿ ಸುತ್ತದೆ. ಇಲ್ಲಿ ವಾತಾವರಣ ಮೊದಲಿನಂತೆಯೇ ಇದೆ. ಆಸ್ತಮಾ ರೋಗಿಯ ದೇಹ ಬಲಿಷ್ಟವಾಗಿರಬಹುದು. ಆದರೆ ಶ್ವಾಸಕೋಶ ವರ್ಷಕಳೆದಂತೆ ಬಲ ಕಳೆದುಕೊಳ್ಳುತ್ತಾ ಹೋಗಿದೆ. ಹಾಗಾಗಿ ಸ್ಥಳ ಬದಲಿಸುವುದು ಇದಕ್ಕೆ ಶಾಶ್ವತ ಪರಿಹಾರ ಅಲ್ಲವೇ ಅಲ್ಲ.
