ಅಲ್ಲಮನು ವ್ಯಕ್ತಾವ್ಯಕ್ತ ರೂಪದಲ್ಲಿ ಸಿಂಹಾಸನವನ್ನು ಏರಿದ್ದು ಅಚ್ಚರಿಯ ಸಂಗತಿಯೇನೂ ಅಲ್ಲ. ಅವನು ಅನುಭಾವಿ, ಯೋಗಿ, ಸಿದ್ಧ, ಅವಧೂತ ಮುಂತಾದ ನಾನಾ ಅವಸ್ಥೆಗಳನ್ನು ಕಂಡವನು. ಇದನ್ನೆಲ್ಲ ಮೀರಿ ನೆಲೆನಿಂತವನು. ಅಲ್ಲಮನು ಆರು ಬಗೆಗಳನ್ನು ದಾಟಿದ ನಂತರ ಕುಂಡಲಿಯನ್ನು ಬಂಧಿಸಿಕೊಂಡ. ಸೂರ್ಯ-ಚಂದ್ರ ಮಂಡಲಗಳನ್ನು ದಾಟಿ ಮುಂದೆ ಹೋದ. ಎಲ್ಲಾ ಬಗೆಯ ಅಪೇಕ್ಷೆಗಳು ತಮಗೆ ತಾವೇ ಮುಚ್ಚಿಕೊಂಡವು. ಲೋಕವ್ಯಾಪಾರಗಳೆಲ್ಲ ಅವನಲ್ಲಿ ಸ್ಥಗಿತಗೊಂಡವು. ಆಗ ಅಲ್ಲಮನು ಸುಷುಮ್ನಾನಾಳದೊಳಗೆ ಏರಿ ನೆಲೆನಿಂತ. ಅವನು ಅಖಂಡ ಜ್ಯೋರ್ತಿಮೂರ್ತಿ ತಾನೆ? ಎಲ್ಲಾ ಯೋಗದ ನೆಲೆಗಳನ್ನು ತಿಳಿದ ಕಾರಣ ತನಗೇ ತಾನೇ ಜ್ಯೋತಿರೂಪದಲ್ಲಿ ಶೂನ್ಯಪೀಠದ ಮೇಲೆ ವಿರಾಜಮಾನನಾದ! ಅವನು ಶೂನ್ಯಸಿಂಹಾಸನದಲ್ಲಿ ಕುಳಿತ ಬಗೆಯಂತೂ ಅಪೂರ್ವ.
