ಬೋಯಿಂಗ್ ಜೆಟ್ ವಿತರಣೆ ನಿಲ್ಲಿಸುವಂತೆ ಸೂಚನೆ; ಚೀನಾ ವಿಮಾನಯಾನ ಸಂಸ್ಥೆಗಳಿಗೆ ಜಿನ್‌ಪಿಂಗ್ ಕಟ್ಟುನಿಟ್ಟಿನ ಆದೇಶ | China

ಬೀಜಿಂಗ್​​: ಅಮೆರಿಕ ಅಧ್ಯಕ್ಷ ಡೊನಾಲ್ಡ್​​ ಟ್ರಂಪ್ ಅವರ ಸುಂಕ ಯುದ್ಧವು ವಿಶ್ವ ಆರ್ಥಿಕತೆಯಲ್ಲಿ ಅವ್ಯವಸ್ಥೆಯನ್ನು ಸೃಷ್ಟಿಸಿದೆ. ಅಮೆರಿಕ ಮತ್ತು ಚೀನಾ ನಡುವಿನ ಸಂಬಂಧಗಳು ಬಹಳಷ್ಟು ಹದಗೆಟ್ಟಿವೆ. ಅಮೆರಿಕ ಚೀನಾದ(China) ಮೇಲೆ ಶೇ.145ರಷ್ಟು ಸುಂಕ ವಿಧಿಸಿದೆ. ಇದಕ್ಕೆ ಪ್ರತೀಕಾರವಾಗಿ ಚೀನಾ ಕೂಡ ಅಮೆರಿಕದ ಮೇಲೆ ಶೇ.125ರಷ್ಟು ಸುಂಕ ವಿಧಿಸಿದೆ. ಏತನ್ಮಧ್ಯೆ ಚೀನಾ ಅಮೆರಿಕಕ್ಕೆ ದೊಡ್ಡ ಹೊಡೆತ ನೀಡಿದೆ

ಇದನ್ನು ಓದಿ: ಟಿಟ್​​ ಫಾರ್​​ ಟ್ಯಾಟ್; ಅಮೆರಿಕ ಸರಕುಗಳ ಮೇಲಿನ ಸುಂಕ 125% ಹೆಚ್ಚಳ.. ಚೀನಾ ಪ್ರತಿಕಾರ | China

ಅಮೆರಿಕದ ಬೋಯಿಂಗ್ ಕಂಪನಿಯಿಂದ ಜೆಟ್ ವಿಮಾನಗಳ ವಿತರಣೆಯನ್ನು ತೆಗೆದುಕೊಳ್ಳದಂತೆ ಚೀನಾ ತನ್ನ ವಿಮಾನಯಾನ ಸಂಸ್ಥೆಗಳಿಗೆ ಆದೇಶಿಸಿದೆ. ಅಮೆರಿಕದಿಂದ ವಿಮಾನ ಸಂಬಂಧಿತ ಯಂತ್ರಗಳು ಮತ್ತು ಭಾಗಗಳನ್ನು ಖರೀದಿಸುವುದನ್ನು ನಿಲ್ಲಿಸುವಂತೆ ಚೀನಾ ಸರ್ಕಾರ ತನ್ನ ವಿಮಾನಯಾನ ಸಂಸ್ಥೆಗಳಿಗೆ ಸೂಚನೆ ನೀಡಿದೆ.

ಏವಿಯೇಷನ್ ​​ಫ್ಲೈಟ್ಸ್ ಗ್ರೂಪ್‌ನ ದತ್ತಾಂಶದ ಪ್ರಕಾರ, ಸುಮಾರು 10 ಬೋಯಿಂಗ್ 737 ಮ್ಯಾಕ್ಸ್ ವಿಮಾನಗಳು ಚೀನಾದ ವಿಮಾನಯಾನ ಸಂಸ್ಥೆಗಳ ಗುಂಪಿಗೆ ಸೇರಲಿವೆ. ಇದರಲ್ಲಿ ಚೀನಾ ಸದರ್ನ್ ಏರ್‌ಲೈನ್ಸ್ ಕಂಪನಿ, ಏರ್ ಚೀನಾ ಲಿಮಿಟೆಡ್ ಮತ್ತು ಕ್ಸಿಯಾಮೆನ್ ಏರ್‌ಲೈನ್ಸ್ ಕಂಪನಿಯ ತಲಾ ಎರಡು ಸೇರಿವೆ.

ಕೆಲವು ವಿಮಾನಗಳು ಅಮೆರಿಕದ ಸಿಯಾಟಲ್‌ನಲ್ಲಿರುವ ಬೋಯಿಂಗ್ ಕಾರ್ಖಾನೆ ನೆಲೆಯ ಬಳಿ ನಿಂತಿದ್ದರೆ, ಇನ್ನು ಕೆಲವು ಪೂರ್ವ ಚೀನಾದ ಝೌಶಾನ್‌ನಲ್ಲಿರುವ ಅದರ ಫಿನಿಶಿಂಗ್ ಕೇಂದ್ರದಲ್ಲಿವೆ. ಚೀನಾ ವಿಶ್ವದ ಎರಡನೇ ಅತಿದೊಡ್ಡ ವಾಯುಯಾನ ಮಾರುಕಟ್ಟೆಯಾಗಿದೆ. ಬೋಯಿಂಗ್ 2018ರಲ್ಲಿ ತನ್ನ ಒಟ್ಟು ವಿಮಾನಗಳಲ್ಲಿ ಶೇಕಡಾ 25 ಕ್ಕಿಂತ ಹೆಚ್ಚು ಭಾಗವನ್ನು ಚೀನಾಕ್ಕೆ ಪೂರೈಸಿತು. ಆದರೆ 2019ರಲ್ಲಿ ಎರಡು ವಿಮಾನ ಅಪಘಾತಗಳ ನಂತರ ಚೀನಾ ಬೋಯಿಂಗ್ 737 ಮ್ಯಾಕ್ಸ್ ಅನ್ನು ಮೊದಲು ಸ್ಥಗಿತಗೊಳಿಸಿತು.

ಶನಿವಾರ, ಅಮೆರಿಕವು ಚೀನಾ ಸೇರಿದಂತೆ ಇತರ ದೇಶಗಳಿಗೆ ಫೋನ್‌ಗಳು, ಕಂಪ್ಯೂಟರ್‌ಗಳು ಮತ್ತು ಇತರ ಎಲೆಕ್ಟ್ರಾನಿಕ್ ಸರಕುಗಳ ಮೇಲೆ ವಿಧಿಸಲಾದ ಪರಸ್ಪರ ಸುಂಕಗಳಿಂದ ವಿನಾಯಿತಿ ನೀಡಿತು. ಸುಂಕದ ವಿಷಯದಲ್ಲಿ ಅಮೆರಿಕ ಏಕಪಕ್ಷೀಯ ನಿರ್ಧಾರ ತೆಗೆದುಕೊಳ್ಳುತ್ತಿದೆ ಎಂದು ಚೀನಾ ಸ್ಪಷ್ಟವಾಗಿ ಹೇಳುತ್ತಿದೆ. ಅದೇ ಸಮಯದಲ್ಲಿ ಚೀನಾ ಅಮೆರಿಕಕ್ಕೆ ಗರಿಷ್ಠ ಹಾನಿಯನ್ನುಂಟುಮಾಡಲು ಪ್ರಯತ್ನಿಸುತ್ತಿದೆ ಎಂದು ಅಧ್ಯಕ್ಷ ಟ್ರಂಪ್ ಹೇಳಿಕೊಂಡಿದ್ದಾರೆ.(ಏಜೆನ್ಸೀಸ್​)

https://www.vijayavani.net/india-china-relationship-is-beijings-message-after-trumps-104-tariff