ತಂತ್ರಜ್ಞಾನ ಸವಾಲು: ಚಿಪ್ ತಯಾರಿಕೆಯಲ್ಲಿ ಚೀನಾ ಹೆಚ್ಚಿನ ಪ್ರಗತಿ ಸಾಧಿಸಿಲ್ಲ. ಚಿಪ್ಗಳನ್ನು ವಿನ್ಯಾಸಗೊಳಿಸಲು ಈ ದೇಶದ ಕಂಪನಿಗಳು ಹೆಚ್ಚಾಗಿ ಅಮೆರಿಕ ಸಾಫ್ಟ್ವೇರ್ ಹಾಗೂ ಉಪಕರಣಗಳನ್ನು ಬಳಸುತ್ತವೆ. ಅಲ್ಲದೆ, ತೈವಾನ್, ದಕ್ಷಿಣ ಕೊರಿಯಾ ಮತ್ತು ಅಮೆರಿಕದಲ್ಲಿನ ಚಿಪ್ ತಯಾರಿಕೆ ಕಂಪನಿಗಳಿಗೆ ಹೋಲಿಸಿದರೆ ಚೀನಾ ಈ ಕ್ಷೇತ್ರದಲ್ಲಿ ಸಾಕಷ್ಟು ಹಿಂದೆ ಉಳಿದಿದೆ. ಹೀಗಾಗಿಯೇ ಆಧುನಿಕ ಚಿಪ್ಗಳನ್ನು ವಿದೇಶದಿಂದ ಆಮದು ಮಾಡಿಕೊಳ್ಳಲು ಚೀನಾ ದೇಶವು ಪೆಟ್ರೋಲ್ ಖರೀದಿಗಿಂತಲೂ ಹೆಚ್ಚಿನ ಹಣವನ್ನು ವ್ಯಯಿಸುತ್ತಿದೆ. ಈಗ ಚಿಪ್ ತಯಾರಿಕೆಗೆ ತನ್ನದೇ ತಂತ್ರಜ್ಞಾನ ಮತ್ತು ಉಪಕರಣ ಸಿದ್ಧಪಡಿಸಿಕೊಳ್ಳುವುದು ಚೀನಾಕ್ಕೆ ಬಹುದೊಡ್ಡ ಸವಾಲಾಗಿದೆ. ಚಿಪ್ ತಯಾರಿಕೆ ಯಂತ್ರೋಪಕರಣಗಳು ಮಾನವ ಇತಿಹಾಸದಲ್ಲಿಯೇ ಅತಿಹೆಚ್ಚು ಸಂಕೀರ್ಣ ಮತ್ತು ನಿಖರವಾದವು ಆಗಿವೆ. ಉದಾಹರಣೆಗೆ, ಅಲ್ಟ್ರಾವಾಯಲೆಟ್ ಲಿಥೋಗ್ರಫಿ ಸಿಸ್ಟಂನ ಒಂದು ಭಾಗವಾದ ಲೇಸರ್ ತಯಾರಿಸಲು 4,57,320ಕ್ಕೂ ಹೆಚ್ಚಿನ ಬಿಡಿಭಾಗಗಳು ಬೇಕಾಗುತ್ತವೆ. ಹೀಗಾಗಿ, ಚೀನಾಕ್ಕೆ ಈ ತಂತ್ರಜ್ಞಾನ ದೊರಕಿಸಿಕೊಳ್ಳುವುದು ಸವಾಲಿನ, ದುಬಾರಿಯಾದ ಸಂಗತಿಯಾಗಿದೆ.
