ಜಗತ್ತಿನಾದ್ಯಂತ ಖ್ಯಾತಿ ಗಳಿಸಿರುವ ‘ಬೆಂಗಳೂರು ಗುಲಾಬಿ ಈರುಳ್ಳಿ’ಗೆ (ರೋಸ್ ಆನಿಯನ್) 2015ರಲ್ಲಿ ಜಿಐ ಟ್ಯಾಗ್ ದೊರೆತಿದೆ. ಅಷ್ಟೇ ಅಲ್ಲ, ಬೆಂಗಳೂರು ಗುಲಾಬಿ ಈರುಳ್ಳಿ ಮೇಲಿನ ರಫ್ತು ಸುಂಕಕ್ಕೆ ಕೇಂದ್ರ ಸರ್ಕಾರವು 2023ರಲ್ಲೇ ಷರತ್ತು ಬದ್ಧ ವಿನಾಯಿತಿ ನೀಡಿದೆ. ಇದರಿಂದಾಗಿ, ಈರುಳ್ಳಿ ಬೆಳೆಗಾರರು ಹಾಗೂ ವ್ಯಾಪಾರಿಗಳು ರಫ್ತು ಸುಂಕವಿಲ್ಲದೆ ‘ಬೆಂಗಳೂರು ಈರುಳ್ಳಿಯನ್ನು ವಿದೇಶಕ್ಕೆ ರಫ್ತು ಮಾಡಬಹುದಾಗಿದೆ. ಬೆಂಗಳೂರು ಗ್ರಾಮಾಂತರ, ಕೋಲಾರ ಮತ್ತು ಚಿಕ್ಕಬಳ್ಳಾಪುರದ 16 ತಾಲೂಕುಗಳಲ್ಲಿ ಬೆಳೆಯುವ ಈ ಗುಲಾಬಿ ಈರುಳ್ಳಿಗೆ ವಿದೇಶಗಳಲ್ಲಿ ಭಾರಿ ಬೇಡಿಕೆ ಇದೆ. ಸುಮಾರು 5 ಸಾವಿರ ಎಕರೆಯಲ್ಲಿ ರಫ್ತು ಮಾರುಕಟ್ಟೆಗೆ ಪ್ರತ್ಯೇಕವಾಗಿ ಬೆಳೆಯಲಾಗುತ್ತದೆ. ಮಲೇಷ್ಯಾ, ಥಾಯ್ಲೆಂಡ್, ಸಿಂಗಾಪುರ, ಬಾಂಗ್ಲಾದೇಶ, ಶ್ರೀಲಂಕಾ ಮತ್ತು ತೈವಾನ್ಗೆ ರಫ್ತಾಗುತ್ತದೆ. ಉಪ್ಪಿನಕಾಯಿ, ಮಸಾಲೆ ತಯಾರಿಕೆಯಲ್ಲಿ ಇದನ್ನು ಬಳಸಲಾಗುತ್ತದೆ. ವಿಶಿಷ್ಟ ಗುಣಮಟ್ಟ ಮತ್ತು ರುಚಿಗೆ ಈ ಈರುಳ್ಳಿ ಖ್ಯಾತಿಯಾಗಿದೆ. ವಾರ್ಷಿಕ ಉತ್ಪಾದನೆ 65 ಸಾವಿರ ಟನ್ಗಳಿಗಿಂತ ಹೆಚ್ಚಿದೆ. ಈ ಪೈಕಿ ಶೇಕಡ 50ಕ್ಕಿಂತಲೂ ಹೆಚ್ಚು ಅಂದರೆ 30 ಸಾವಿರ ಟನ್ಗೂ ಅಧಿಕ ಈರುಳ್ಳಿ ವಿದೇಶಗಳಿಗೆ ರಫ್ತಾಗುತ್ತದೆ.
